Կիրակի, 1 Սեպտեմբեր 2024-ին յետ Ս. Պատարագի, Առաջնորդ Սրբազան Հայրը նախագահեց՝ արժանաւորապէս «հայ էսդրատային երգի իշխան» մակդիրին տիրացած լիբանանահայ աշխարհահռչակ երգիչ Ատիս Հարմանտեանի մահուան 5-րդ տարելիցի հոգեհանգստեան պաշտօնին եւ այս առիթով նշեց, որ թէեւ հոգեհանգիստը առնչուած է մարդոց եւ ընտանիքներու, սակայն կայ նաեւ ժողովուրդին պատկանող հոգեհանգիստի տեսակ մը, որ պայմանաւորուած կ՛ըլլայ հանգուցեալին վարած կեանքով ու գործունէութեամբ՝ ի նպաստ իր շրջապատին, ժողովուրդին, ազգին ու հայրենիքին:
«Ատիս Հարմանտեան մէկն է անոնցմէ, որոնց հոգեհանգիստը ոչ միայն ընտանեկան, այլեւ ժողովրդային հնչեղութիւն ունի», շեշտեց Առաջնորդ Սրբազանը՝ շարունակելով, թէ երգիչ Ատիս աւելի քան կէս դար Սփիւռքի զանազան օճախներու եւ Հայաստանի մէջ տարածեց հայ էսդրատային երգարուեստը եւ մինչեւ իր մահը մնաց պատնէշի վրայ, մինչ անոր երգերը սորվեցան եւ երգեցին սերունդներ՝ բարձր գնահատելով հայ էսդրատային երգի իշխանին արուեստը, ալպոմները, քասէթներն ու ելոյթները, որոնք աննախընթաց եւ յիշարժան էին բոլորին համար:
Յայտնենք, որ յետ հոգեհանգստեան արարողութեան, Գեղամ Արքեպիսկոպոս ներկայ գտնուեցաւ Կլենտէյլի «Արմինիըն Արթ Սենթըր» մշակութային կեդրոնին մէջ կազմակերպուած յատուկ ցուցահանդէսի մը, ուր Ատիսի ընտանեկան պարագաները ի մի խմբած էին սիրելի երգիչին անձնական իրերը, անոր արուեստին ու անձին մասին գրուած թերթերու յօդուածներ, լուսանկարներ, երգարուեստային ալպոմներ, երգապնակներ, քասէթներ, խտասալիկներ եւ այլն:
Գեղեցիկ համադրումով դասաւորուած այս եւ նկարչական իրեր կը պատմէին արուեստագէտ Ատիս Հարմանտեան հռչակաւոր երգիչի տասնամեակներու կեանքը՝ բեմերու վրայ, պարահանդէսներու եւ աշխարհի տարբեր անկիւններու մէջ, իսկ անոր նկարչական տաղանդին մասին կը վկայէին կեդրոնին պատերը զարդարող գունագեղ պաստառներ, որոնք երգիչ Ատիսի մտայղացումներն էին:
Արդարեւ, Առաջնորդ Սրբազան Հայրը հանգուցեալի յիշատակին նուիրուած ցուցահանդէսը արժեւորեց՝ յիշեցնելով, որ տարիներ առաջ, Արամ Ա. Կաթողիկոս Մեսրոպ Մաշտոց շքանշանով պատուեց Սփիւռքի մէջ հայ էսդրատային երգի հիմնադիր եւ տարածող, համահայկական երգիչ Ատիս Հարմանտեանը, իսկ Լիբանանի մէջ առաջնորդութեան իր օրերուն, ինք եւս պատուած է Ատիսը՝ գնահատանքի եւ օրհնութեան յատուկ գիրով:
