Միացեալ Նահանգները չի արձանագրել որեւէ մէկ փաստ, որ Ռուսաստանի զինուած ուժերը նպաստում են Հարաւային Կովկասի խաղաղութեանն ու կայունութեանը, լրագրողների հետ ճեպազրոյցին յայտնել է ԱՄՆ պէտքարտուղարութեան փոխխօսնակ Վեդանտ Պատելը՝ ի պատասխան ռուս խաղաղապահների՝ Լեռնային Ղարաբաղից դուրս բերման եւ դրա հեեւանքների մասին հարցին:
Պատելը նկատել է, որ Վաշինգտօնը չի հանդիսանում եռակողմ պայմանաւորուածութեան մաս, որով դադարեցուեց կրակը 2020 թուականին, իսկ ռուսական զօրքերը տեղակայուեցին Լեռնային Ղարաբաղում: Իր խօսքում նա ընդգծում է.
«Անկեղծ ասած, մենք չենք տեսել որեւէ փաստ, որը ի ցոյց կը դնի, որ Ռուսաստանի զինուած ուժերը նպաստում են աւելի խաղաղ եւ կայուն հարաւկովկասեան տարածաշրջանին, եւ անցեալ տարուայ աշնանը Լեռնային Ղարաբաղում տեղի ունեցած իրադարձութիւնները բաւականին ընդգծում են այդ տեսակէտը: Դա եւս մէկ կարեւոր վկայութիւնն է կամ օրինակ, թէ որքան անվստահելի դաշնակից կամ գործընկեր է Ռուսաստանը»,- ընդգծել է պէտքարտուղարութեան փոխխօսնակը:
Նա յաւելել է, որ ԱՄՆ-ը վճռականօրէն աջակցում է Հայաստանի եւ Ադրբեջանի ջանքերին՝ տեւական եւ արժանապատիւ խաղաղութեանը հասնելու համար, եւ պատրաստ է շարունակել աջակցել այս գործընթացին:
VOA
