ԱՄՆ պետդէպարտամենտը պատասխանել է ԵԱՀԿ Մինսկի խմբի նոր համանախագահ նշանակելու վերաբերեալ պաշտօնական Բաքուից հնչեցուած անհեթեթ յայտարարութեանն այն մասին, թէ նման քայլերը «չէն կարող նպաստել հայ-ադրբեջանական յարաբերութիւնների կարգաւորմանը»։
Գլոբալ հանրային կապերի գրասենեակի (Bureau of Global Public Affairs) փոխխօսնակ Վեդանթ Պանտելը, անդրադառնալով ադրբեջանական կողմի յայտարարութեանը, մասնաւորապէս նշել է, որ ԱՄՆ պէտքարտուղար Էնթօնի Բլինքէնը Ֆիլիպ Ռիքերին «Կովկասում բանակցութիւնների գծով աւագ խորհրդական է նշանակել՝ ընդգծելու մեր յանձնառութիւնը Հարաւային Կովկասում խաղաղութեան հաստատման գործում»։ «Որպէս երկիր՝ մենք յանձնառու ենք դիւրացնելու ուղիղ երկխօսութիւնը Ադրբեջանի եւ Հայաստանի հետ երկկողմ, բազմակողմ մակարդակներում, ինչպէս նաեւ համախոհ գործընկերների հետ համագործակցութեան միջոցով՝ հասնելու երկու երկրների միջեւ համապարփակ խաղաղ կարգաւորման»,- նշել է նա։
Պանտելը եւս մէկ անգամ յիշեցրել է, որ այսուհետ դեսպան Ռիքերը ներկայացնելու է ԱՄՆ-ն թէ՛ Մինսկի խմբում, թէ Ժնեւի միջազգային բանակցութիւններում։
Օգօստոսի 25-ին ԱՄՆ պէտքարտուղար Էնթօնի Բլինքէնը յայտարարել էր փորձառու դիւանագէտ Ֆիլիպ Ռիքերին Կովկասի հարցերով բանակցութիւններում գլխաւոր խորհրդական նշանակելու մասին։ Այս պաշտօնում Ռիքերը կատարելու է նաեւ ԵԱՀԿ Մինսկի խմբի ԱՄՆ համանախագահի գործառոյթներն ու հանդէս գալու որպէս Ժնեւի միջազգային բանակցութիւններում ԱՄՆ պատուիրակութեան գլխաւոր բանակցող։
Այս որոշմանը յաջորդել էր Ադրբեջանի ԱԳՆ հերթական անհիմն յայտարարութիւնը, որում նշուած էր, թէ «․․․գրեթէ չգործող Մինսկի խմբին վերակենդանացնելու փորձերը կարող են յանգեցնել Ադրբեջանի եւ Հայաստանի յարաբերութիւնների կարգաւորման գործընթացից ԱՄՆ-ի հեռացման»։ Ադրբեջանի ԱԳՆ-ից յայտարարել էին նաեւ, թէ «ղարաբաղեան հակամարտութիւնը կարգաւորուած է»՝ յաւելելով, որ հայ-ադրբեջանական յարաբերութիւնների կարգաւորումը ԼՂ հարցի հետ կապելը «որեւէ կերպով չի նպաստի այդ յարաբերութիւնների կարգաւորմանը»։
