Միացեալ Նահանգները շարունակում է աշխատանքը՝ հանուն Հայաստանի եւ Ադրբեջանի միջեւ համապարփակ եւ երկարաժամկէտ խաղաղութեան հաստատման։ Այս մասին լրագրողների հետ ճեպազրոյցում յայտարարել է պետդէպարտամենտի խօսնակ Նեդ Փրայսը։
Նա յիշեցրել է, որ ԱՄՆ պէտքարտուղար Էնթօնի Բլինկէնը վերջերս շփումներ է ունեցել Հայաստանի վարչապետ Նիկոլ Փաշինեանի եւ Ադրբեջանի նախագահ Իլհամ Ալիեւի հետ։ «Այդպիսով մենք մեր խորը մտահոգութիւնն ենք յայտնել Լեռնային Ղարաբաղում եւ դրա շուրջ գրանցուած վերջին մարտէրի առնչութեամբ, որոնց հետեւանքով գրանցուեցին մարդկային զոհեր ու վիրաւորներ։ Մենք կոչ արեցինք անյապաղ քայլեր ձեռնարկել՝ թուլացնելու լարուածութիւնը եւ խուսափելու կողմերի միջեւ յետագայ էսկալացիաներից։ Լարուածութեան վերջին աճը, կարծում ենք, ընդգծեց Լեռնային Ղարաբաղի հակամարտութեան հետ կապուած կամ դրանից բխող բոլոր մնացած հարցերը բանակցային, համապարփակ ու կայուն կերպով կարգաւորելու անհրաժեշտութիւնը»,- նշել է Փրայսը՝ ընդգծելով, որ ԱՄՆ-ն շարունակում է հաւատարիմ մնալ կողմերի հետ աշխատանքները շարունակելու իր յանձնառութեանը։
«Մենք շարունակելու ենք դա անել ինչպէս երկկողմ, այնպէս էլ համախոհ գործընկերների հետ Եւրամիութիւնում, ինչպէս նաեւ որպէս ԵԱՀԿ Մինսկի խմբի համանախագահ՝ օգնելու երկրներին գտնել երկարաժամկէտ համապարփակ խաղաղութիւն»,- ասել է պետդէպի խօսնակը։
Փրայսի խօսքով՝ չնայած վերջին շաբաթների լարուածութեան աճին, այնուամենայնիւ, Միացեալ Նահանգները շարունակում է տեսնել, որ կայ հնարաւորութիւն։ «Մենք մշտապէս ընդունել ենք, որ սա գծային գործընթաց չի լինելու։ Հաւատացած ենք, որ շարունակական երկխօսութեան, ներգրաւման՝ այդ թւում եւ ամենաբարձր մակարդակներով, շնորհիւ կը կարողանանք անել հնարաւոր ամէն բան՝ օգնելու առաջ տանել երկարաժամկէտ համապարփակ խաղաղութիւնը»,- եզրափակել է Փրայսը։
