Այս տարի ջահերով երթը կմեկնարկի Հանրապետութեան հրապարակից ժամը 19։15-ին։ Այս մասին Alpha News-ի ուղիղ եթերում ասաց ՀՅԴ ՀԵՄ Կենտրոնական վարչութեան ներկայացուցիչ Սեւակ Նազարեանը։
«Վերջին 2-3 տարիներին աւանդոյթի ուժով ջահերով երթը մեկնարկում է Հանրապետութեան հրապարակից։ Նախկինում երկար տարիներ այն մեկնարկել է Ազատութեան հրապարակից, բայց հաշուի առնելով իրադարձութեան կարեւորութիւնը եւ մասշտաբների ընդլայնումը՝ արդէն երրորդ տարին անընդմէջ այն մեկնարկում է Հանրապետութեան հրապարակից։ Այն այս տարի կը լինի ապրիլի 23-ին՝ 19։15-ին։ Երթուղին լինելու է Ամիրեան-Մաշտոց-Բաղրամեան-Կիեւեան փողոցներով՝ դէպի Ծիծեռնակաբերդի բարձունք։ Բոլորին կոչ եմ անում միանալ երթին»,- նշեց Նազարեանը։
Նա ընդգծում է՝ Թուրքիան պէտք է պատասխանատուութեան ենթարկուի, քանի որ այն այսօր էլ բացայայտ շարունակում է իր ցեղասպան քաղաքականութիւնը։
«Ջահերով երթը առաջին անգամ տեղի է ունեցել 1999թ-ին։ Այն ժամանակ հաշուի առնելով, որ Սովետական միութեան երկար լռութեան տարիներից յետոյ մենք ունէինք ձեռք բերուած անկախութիւն, կարիք կար վերաարժեւորելու նաեւ Հայոց Ցեղասպանութիւնը եւ Հայ դատը։ Եւ եթէ ապրիլի 24-ը մարդկանց մօտ արդէն իսկ տպաւորուել էր, որպէս յիշատակի, յարգանքի, սգոյ օր, ապա կարիք կար դրան զուգահեռ մեր քաղաքական պահանջատիրութիւնը յստակ սահմանել։ Ապրիլի 23-ը հէնց այն օրն է, երբ պահանջատիրութեան ջահը հայ մարդը իր հետ պէտք է բարձրացնի Ծիծեռնակաբերդ։ Կարելի է ասել՝ սա յարգանքի տուրք է մեր 1․5 միլիոն նահատակների յիշատակներին, որովհետեւ Ցեղասպանութիւնը իրականութեան մէջ քաղաքական գործողութիւն է։ Թուրքիայի կողմից քաղաքական գործողութիւն էր հայ ժողովրդի բնաջնջմամբ, թուրքիզմի գաղափարախօսութեան իրականացմամբ, եւ հետեւաբար սրա հատուցումն ու պատասխանատուութիւնը եւս պէտք է լինի քաղաքական։
Մեր քաղաքական ձեւակերպումը սրան հէնց պահանջատիրութիւնն է։ Այն պատասխանատուութեան պէտք է ենթարկի այսօրուայ Թուրքիային, որը ուրացման քաղաքականութիւն է վարում եւ բացայայտ շարունակում է իր ցեղասպան քաղաքականութիւնը իր եղբայր Ադրբեջանի հետ։ Այս ամէնը կանխելու մի տարբերակ կայ՝ Թուրքիային պէտք է ծնկի բերել եւ պահանջ դնել՝ ճանաչել Հաեօց ցեղասպանութիւնը, հատուցել իր գործած բոլոր մեղքերի համար։ Ապրիլի 23-ը հէնց այս պահանջատիրութեան օրն է»,- եզրափակեց Նազարեանը։
