Ապրիլ 28-ին կայանալիք Քանատայի դաշնակցային ընտրութիւններու նախօրեակին, ընդդիմադիր Պահպանողական կուսակցութիւնը Թորոնթոյի Scarborough-Agincourt ընտրատարածքին համար առաջադրած է Թորոնթոհայ Արիս Մովսէսեանի թեկնածութիւնը։ Այս մասին յայտարարած է նաեւ Արիս Մովսէսեանը, ընկերային ցանցերու իր անձնական հարթակներով։ 20-ամեայ Մովսէսեան ծնած է Գանատա եւ Թորոնթոյի ՀՕՄ-ի ամենօրեայ վարժարանի շրջանաւարտ է։ Ներկայիս բարձրագոյն ուսումը կը շարունակէ Թորոնթոյի Համալսարանին մէջ եւ որպէս մասնագիտութիւն կը հետեւի Business Administration ճիւղին։ Անցնող Դեկտեմբերին, «Թորոնթոհայ» ամսագրին հետ հարցազրոյցի մը ընթացքին, Մովսէսեան յայտնած էր, որ կարեւոր է Գանատայի խորհրդարանին մէջ ունենալ հայկական ձայն մը, որպէսզի աւելի ծաւալուն լոյս սփռուի վերջին տարիներուն հայերուն հանդէպ գործադրուած անարդարութիւններուն առնչութեամբ եւ յաւելեալ աջակցութիւն ցուցաբերուի յատկապէս Արցախի ժողովուրդին։
