Լեւոն Արոնեանը բաց նամակ է հրապարակել՝ ուղղուած շախմատային հանրութեանը: Նամակում հայ գրոսմայստէրն անդրադառնում է Արախում ստեղծուած իրավիճակին եւ Արցախի շրջափակմանն ուղղում իր ընթերցողների ուշադրութիւնը:
«Ես գրում եմ ձեզ յարգանքով, շփոթմունքով եւ իմ զգացմունքները ձեզ հետ կիսելու ցանկութեամբ:
Ես գրում եմ ձեզ այն մասին, ինչի մասին մտածում եմ ամէն օր, եւ գրում եմ ինձ հարազատ լեզուով` ռուսերէնով, քանի որ յուսով եմ, որ դա ինձ թոյլ կը տայ յստակ արտայայտուել:
Ստեփանակերտ քաղաքը, որտեղ ապրում են ինձ մերձաւոր մարդիկ, եւ ամբողջ Արցախն աւելի քան ինը ամիս շրջափակման մէջ է։ Սա նշանակում է, որ այնտեղ գործնականում չի մատակարարւում սննդամթերք, այդ թւում՝ երեխաների բնականոն զարգացման համար անհրաժեշտ սննդամթերք. դեղամիջոցներ, ներառեալ նրանք, որոնք անհրաժեշտ են սրտի հիւանդութեան հետ կապուած խնդիրներ ունեցող տարէցների համար:
Աշխարհն արդէն սկսում է արտասանել «ցեղասպանութիւն» բառը։ Եւ սա 21-րդ դարում։
Շրջափակումը պայմանաւորուած չէ անհրաժեշտութեամբ, ռազմավարական նշանակութեամբ կամ որեւէ այլ պատճառով։ Ընդհանրապէս, դժուար է նշել, թէ որն է պատճառը, երբ հասարակ մարդիկ զրկուած են ամենաանհրաժեշտ բաներից։ Առաջին հերթին սնունդ. Եւ նաեւ գազ եւ էլեկտրականութիւն։
Ես կարծում եմ, որ հասարակ ադրբեջանցիներին այս շրջափակումը պէտք չէ։ Սա ընդամէնը մի մասն է այն մարդու վարքագծի, ով իրեն վեր է դասում Աստծոյ օրէնքից եւ համընդհանուր բարոյականութիւնից: Այն մարդը, ով իմ ժողովրդի անդամներին շներ է անուանում։ Այս մարդու անունը Իլհամ Ալիեւ է։
Ես չեմ հաւատում, որ մարդկային որակները որոշւում են ազգութեամբ։ Բոլոր ազգերում կան վատ մարդիկ, եւ կան լաւ մարդիկ, սա մանրուք է:
Բայց կան լաւ մարդիկ, ովքեր լռում են, քանի որ վախենում են վատէրից։ Ես յոգնել եմ լռելուց, եւ կարծում եմ, որ մարդիկ, ովքեր կարեկցում են եւ չէն կարողանում դիտել, թէ ինչպէս են սովամահ 120 հազար մարդիկ, մեծամասնութիւն են:
Դիմում եմ իմ ընկեր գրոսմայստէրներին. Մենք իրաւունք չունենք մեր լռութեամբ արդարացնել տեղի ունեցողը։ Եւ ես վստահ եմ, որ իմ ադրբեջանցի գործընկերներին ամենեւին էլ չի հետաքրքրում այն անմարդկային իրավիճակը, որը Իլհամ Ալիեւը ստեղծում է Ղարաբաղի ժողովրդի համար»,– գրել է Արոնեանը։
Նա նաեւ արթնանալու կոչ է արել.
«Մենք չենք կարող մեր լռութեամբ թոյլ տալ, որ տեղի ունենայ մի բան, որի համար մարդկութիւնը դարեր շարունակ ամաչելու է»:
Արոնեանը նշել է, որ իրենք պարտաւոր են խօսել կատարուածի մասին եւ փորձել հասնել նրանց, ովքեր կարող են փոխել այս ամօթալի իրավիճակը։
alphanews.am
