ՀՀ վարչապետի պաշտօնն զբաղեցնող Նիկոլ Փաշինեանի՝ Հայոց ցեղասպանութեան եղելութեան դրդապատճառների վերաբերեալ Ցիւրիխում արած յայտարարութիւնն ու հարցադրումները ոչ միայն հակաբանական են, հակագիտական, հակաքաղաքակրթական, այլեւ հայ ժողովրդի եւ համաշխարհային պատմութեան ամենատգէտ, ամենաամօթալի ու ամենաստորացուցիչ դէպքերից մէկը: Սա ուժեղ հարուած է հայ ժողովրդի քաղաքական պայքարին, մարտահրաւէր` ամբողջ քաղաքակիրթ աշխարհին, որը հազարաւոր հատորներով ուսումնասիրել, հետազօտել, եզրակացրել, ճանաչել ու դատապարտել է Հայոց ցեղասպանութեան անքննելի իրողութիւնը։ Այս մասին յայտարարութիւն է տարածել «Genesis Armenia»-ն։
Այսօր, երբ միջազգային հանրութիւնը միասնաբար պայքարում է մարդկութեան դէմ ուղղուած յանցագործութիւնների դէմ, Նիկոլ Փաշինեանի նման յայտարարութիւնները ոչ միայն ժխտում են հայ ժողովրդի իրաւունքն արդարութեան հասնելու, սասանում հայկական պետականութեան իրաւաքաղաքական ու անվտանգային հիմքերը, այլեւ ոտնահարում համաշխարհային պատմութեան եւ քաղաքակրթութեան արժէքները: Փաշինեանն, ըստ էութեան, իր խօսքում զերծ մնալով ցեղասպանութեան իրականացման հարցում թուրքական իշխանութիւնների ամբողջական եւ անուիճարկելի մեղսակցութիւնից ու պատասխանատուութիւնից, փորձ է անում պատմութեան վերանայման՝ ռեւիզիոնիզմի, որի նկատմամբ քաղաքակիրթ աշխարհը տուել է յստակ դատապարտելի գնահատական:
Փաշինեանը փորձում է վերաշարադրել համաշխարհային պատմութիւնը՝ Օսմանեան կայսրութեան եւ նրա իրաւայաջորդ Թուրքիայի հանրապետութեան իրականացրած յանցագործութիւնները արդարացնելու կամ մոռացութեան մատնելու նպատակով։ Սա ոչ այլ ինչ է, քան դաւաճանութիւն՝ ընդդէմ հայկական պատմական ժառանգութեան, զոհուած սերունդների յիշատակի եւ մարդկային քաղաքակրթութեան արժէքների, հերթական ապացոյցը, որ ՀՀ գործող վարչախումբը սպասարկում է թուրք-ադրբեջանական ժխտողական տանդէմի օրակարգը եւ այդ նախապայմանն իրականացնում որպէս բարի կամքի դրսեւորում՝ Անկարայի եւ Բաքուի հետ թուացեալ հաշտեցման ու յարաբերութիւնների կարգաւորմանն ընդառաջ:
Ամոթալի է, որ Հայոց ցեղասպանութեան պատասխանատուութեան հարցի քննարկումն ու պատմութեան վերանայման փորձը ՀՀ բարձրաստիճան ղեկավարի պաշտօնն զբաղեցնողը կատարում է այն երկրում, որը դեռեւս 2006 թ. ազատազրկման դատապարեց եւ տուգանեց թուրք յայտնի ժխտողական, ազգայնամոլ Դողու Փերինչեքին՝ Հայոց ցեղասպանութեան իրողութիւնը վիճարկելու համար, բայց առաւել ամօթալի է շուեյցարահայ համայնքի ներկայացուցիչների կրաւորական պահուածքն ու շահադիտական լռութիւնն այս հարցում, բացառութեամբ Հայոց ցեղասպանութեան միջազգային ճանաչման ու դատապարտման, նաեւ Արցախի հայրենազրկման հարցի միջազգայնացման, դատապարտման եւ հայութեան իրաւունքների վերականգնման հարցում հետեւողականօրէն աշխատանք տարած որոշ կառոյցների ու գործիչների։
Միջազգային իրաւունքի շրջանակներում ցեղասպանութիւնը ճանաչուել է որպէս մարդկութեան դէմ ուղղուած ոճրագործութիւն, դրա ժխտումը կամ մոռացութեան մատնելը՝ հակաբարոյական պատմական կեղծիք ու յանցագործութիւն։
Ջենեսիս Արմենիա ուղեղային կենտրոն/հիմնադրամը հաստատակամօրէն հաւատարիմ է որդեգրած ազգային-պետական ուղուն, գաղափարաբանութեանը, արժէքներին, պատմական ճշմարտութեան եւ արդարութեան վերականգնման պայքարին:
