Հայաստանի Հանրապետական կուսակցութեան Գործադիր մարմնի յայտարարութիւնը
Հայաստանի եւ Ադրբեջանի միջեւ պայմանագրի շուրջ այսպէս կոչուած բանակցութիւնների աւարտի, իսկ իրականում՝ օրուայ կառավարիչների կողմից միակողմանի հակապետական զիջողականութեան արդիւնք կրկնակապիտուլեացիայի առնչութեամբ Հայաստանի Հանրապետական կուսակցութիւնը՝
• պահանջում է անյապաղ հրապարակել վերջնական տեքստը,
• յայտարարում է, որ Նիկոլ Փաշինեանը չունի մանդատ եւ լեգիտիմութիւն հայ ժողովրդի անունից նման պայմանագրեր ստորագրելու,
• արձանագրում է, որ ՀՀ քաղաքացիների համար անընդունելի է ուժի գործադրման բացայայտ սպառնալիքով բանակցութիւնների ցանկացած արդիւնք, եւ այն չի կարող ապահովել արդար եւ երկարաժամկէտ խաղաղութիւն տարածաշրջանում,
• անընդունելի է համարում առանց միջազգային միջնորդների եւ առանց անվտանգութեան միջազգային երաշխիքների փաստաթուղթը,
• անթոյլատրելի է համարում ՀՀ գործող Սահմանադրութեան՝ արտաքին ճնշման տակ իրականացուող փոփոխութիւնը, որը հարցականի տակ է դնելու Հայաստանի երրորդ Հանրապետութեան պատմութիւնն ու գոյութիւնը,• վերահաստատում է, որ միջազգային դատարաններում հայցերից հրաժարումը ադրբեջանական հերթական ուլտիմատումի հնազանդ կատարում է,
• ընդգծում է ԵԱՀԿ Մինսկի խմբի լուծարման կենսական վտանգաւորութիւնը,
• դատապարտում է Բաքւում հայերի նկատմամբ իրականացուող շինծու դատական գործընթացի վերաբերեալ Հայաստանի այսօրուայ կառավարիչների կրաւորական կեցուածքը եւ անգործութիւնը:
Որպէս համապարփակ պայմանագիր ներկայացուող փաստաթղթի շուրջ բանակցութիւնների աւարտի յայտարարմանը զուգահեռ՝ ադրբեջանական կողմը շարունակում է այսպէս կոչուած «միջանցքի» տրամադրման, ՀՀ ապառազմականացման, նոր ագրեսիայի վերաբերեալ եւ Հայաստանի Հանրապետութեան գոյութեան դէմ ուղղուած այլ ռազմատենչ յայտարարութիւններ անել։
Արտաքին որոշ ուժերի կամակատար Նիկոլ Փաշինեանի կառավարման իւրաքանչիւր օրը վտանգում է Հայաստանի պետականութիւնը եւ ինքնիշխանութիւնը:
