ԵՐԵՎԱՆ, 9 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետութեան դատախազութիւնը ստացել է «Սիներջի» ընկերութեան կալանաւորուած աշխատակիցների՝ Աշոտ Հովհաննիսեանի, Անի Գեւորգեանի եւ Լիլի Մկրեանի խափանման միջոցները փոխելու հարցով ԱԺ իշխող «Քաղաքացիական պայմանագիր» խմբակցութեան պատգամաւորների միջնորդութիւնը:
«Արմենպրես»-ը Դատախազութիւնից տեղեկացաւ. «Դատախազութիւնը ստացել է ԱԺ «Քաղաքացիական պայմանագիր» խմբակցութեան պատգամաւորների՝ անձնական երաշխաւորութիւն կիրառելու մասին միջնորդութիւնը»:
Խորհրդարանական ճեպազրոյցում խմբակցութեան քարտուղար Արթուր Հովհաննիսեանն էլ նշեց, որ միջնորդութիւնն ուղարկուել է: «Մնացածը հընթացս կը հասկանանք, իրաւական գործընթաց է տեղի ունենում»,-ասաց նա:
Անդրադառնալով միջնորդութիւնը մերժելու վերաբերեալ խօսակցութիւններին՝ պատգամաւորն ասաց, որ որեւէ տեղեկութիւն ոչ կարող է հաստատել, ոչ հերքել:
Աւելի վաղ Էկոնոմիկայի նախարարութիւնում առերեւոյթ կոռուպցիոն չարաշահումների գործով ձերբակալուել էին Էկոնոմիկայի նախարարի՝ պաշտօնից ազատուած տեղակալ Անի Իսպիրեանը, ԱԺ նախագահ Ալէն Սիմոնեանի եղբօր կինը՝ Անի Գեւորգեանը, որն աշխատել է «Սիներջի» ընկերութիւնում, «Սիներջի» ընկերութեան հիմնադիր եւ ղեկավար Աշոտ Հովհաննիսեանը, ընկերութեան աշխատակից Լիլի Մկրեանը։ Աւելի ուշ Անի Իսպիրեանի նկատմամբ որպէս խափանման միջոց էր ընտրուել տնային կալանքը, միւս երեքը կալանաւորուել էին:
«Քաղաքացիական պայմանագիր» խմբակցութեան ղեկավար Հայկ Կոնջորեանը խափանման միջոցը փոխելու հարցով միջնորդութիւն ներկայացնելը հիմնաւորել էր յատկապէս նրանով, որ կանայք մանկահասակ երեխաներ ունեն: Իսկ Աշոտ Հովհաննիսեանի առումով խմբակցութիւնում հաշուի են առել այն հանգամանքը, որ նա իր ոլորտում վաստակաշատ անձնաւորութիւն է: Խմբակցութիւնում համոզուած են, որ խափանման միջոցի փոփոխութիւնը չի ազդի քննութեան որակի վրայ:
