Դիմադրութիւն» շարժման Պաշտպանութեան ու անվտանգութեան յանձնաժողովն այսօր հրաւիրել է ընդլայնուած նիստ, որին մասնակցել են ԱԺ պատգամաւորներ, պաշտպանական եւ իրաւապահ համակարգերի նախկին բարձրաստիճան ծառայողներ, ռազմական փորձագէտներ։
Նիստում քննարկուել է ՀՀ ՊՆ կողմից շրջանառութեան մէջ դրուած եւ հանրային քննարկման ներկայացուած «Զինուորական ծառայութեան եւ զինծառայողի կարգավիճակի մասին» օրէնքում փոփոխութիւններ եւ լրացումներ կատարելու մասին» ՀՀ օրէնքի նախագիծը։
Միաժամանակ արձանագրուել է, որ պարտադիր զինուորական ծառայութիւնից գումարի դիմաց ազատուելու դրոյթն անթոյլատրելի է եւ մերժելի։
Քննարկման մասնակիցները հաստատել են, որ ՀՀ զինուած ուժերի բարեփոխումների միասնական հայեցակարգի բացակայութեան պայմաններում նման չհամադրուած գործողութիւնները եւս մէկ անգամ փաստում են, որ 2018 թուականից սկսեալ, իշխանութեան գալով, այս քաղաքական ուժը հետեւողականօրէն նպատակ ունի կազմալուծել ՀՀ անվտանգութեան գլխաւոր երաշխաւոր Զինուած ուժերը, փոշիացնել Արցախեան ազատամարտով, զոհողութիւններով միս ու արիւն ստացած բանակը։
44-օրեայ պատերազմից յետոյ շարունակւում է Արցախի պաշտպանութեան համակարգի ապառազմականացումը, որից զերծ չէն մնում նաեւ ՀՀ Զինուած ուժերը։ Այս ամենն արւում է, թշնամի երկրի ղեկավարի կողմից Հաեօց բանակի թուլացման, զարգացման հնարաւորութիւնների բացառման՝ պարբերաբար հնչող յայտարարութիւնների ֆոնին։
Իշխանութեան ներկայացրած այս նախաձեռնութիւնը հերթական քայլն է վերացնելու ՀՀ Զինուած ուժերը։
Քննակմանն արձանագրուել է, որ այս նախագիծը հակասահմանադրական տարրեր է պարունակում եւ ոչ թէ ամրապնդելու է պաշտպանական համակարգը, այլ առաւել խորացնելու է ներհասարակական անհանդուրժողականութիւնը՝ ծառայութիւնը դարձնելով ոչ թէ պատուաբեր ու պարտադիր քայլ, այլ ձեւաւորելու է չակերտաւոր առանձնաշնորհեալների մի խումբ, որոնք իրենց սահմանադրական պարտքը կատարելուց ազատուելու են 24 միլիոն դրամանոց փրկագնով։
Քննարկումների արդիւնքում որոշուել է շարունակել այս հարցի արծարծումը տարբեր հարթակներում, իսկ վերջնական ու միասնական դիրքորոշում ձեւաւորելու համար առաջիկայ օրերին Պաշտպանութեան եւ անվտանգութեան յանձնաժողովի նախաձեռնութեամբ կազմակերպուելու է լայն շրջանակների ընդգրկմամբ հանրային քննարկում, որի մասին կտեղեկացուի աւելի ուշ։
Ի դէպ, քննակմանն անհանգստութիւն է յայտնուել նաեւ ՀՀ ՄԻՊ կողմից հանրային ծառայութեան առանձին տեսակների համար սահմանուած՝ արհեստակցական միութիւններին եւ կրօնական կազմակերպութիւններին անդամակցութեան արգելքի սահմանադրականութեան վերաբերեալ դիմումը՝ այն գնահատելով իբրեւ անվտանգային համակարգերի փլուզման իշխանական քաղաքականութեան մաս։
