Յանուն Հօր եւ Որդւոյ եւ Հոգւոյն Սրբոյ. ամէն։
«Եկիր ի փրկութիւն ազգի մարդկան,
Թագաւոր փառաց, Քո անճառ խոնարհութեամբդ»
(Շարական):
Սիրելի բարեպաշտ ժողովուրդ,
Մեր Տեր Հիսուս Քրիստոսի Սուրբ Ծննդեան եւ Աստուածայայտնութեան լուսաշող տօնին, համախմբուած մեր սուրբ եկեղեցիների կամարների ներքոյ, փառաբանում ենք Բարձրեալ Աստծուն, որ մարդկութեան հանդէպ անհուն սիրով ու ողորմութեամբ ուղարկեց Իր Միածին Որդուն՝ ազատելու մարդ արարածին մեղքից ու մահուան կապանքներից։ «Փառքի Թագաւոր, Քո անճառ խոնարհութեամբդ եկար մարդկութեան փրկութեան համար» — օրհներգում է շարականագիրը:
Այսօր Սուրբ Ծննդեան հրաշազարդ իրադարձութիւնն է վերստին յառնում մեր հայեացքի առջեւ։ Երկնային բարձունքներում գահին բազմող Փառքի Թագաւորը ծնւում է աղքատիկ մսուրում։ Փրկչի Ծննդեան հրեշտակաձայն աւետիսին ունկնդիր՝ պարզասիրտ հովիւները խոնարհւում են Մանուկ Աստուածորդու առջեւ։ Իմաստուն մոգերը երկրպագում են Փրկչին, Ով աստուածային խնամքով մարդկութեանը առաջնորդում է դէպի բարիք, հաճութիւն ու համերաշխութիւն։
Աստուածորդու հրաշափառ Սուրբ Ծնունդը անճառելի խորհուրդ է՝ մտքին անհասանելի, բայց հաւատքով ճանաչելի եւ ընկալելի։ Փրկիչը խոնարհուեց եւ մարմին առաւ նիւթականից դէպի հոգեւորն ու աստուածայինը բարձրացնելու մարդկային սրտէրն ու մտքերը։ Անմահը մահկանացու դարձաւ՝ ճշմարիտ կեանքի եւ յաւիտենութեան ճանապարհը ցոյց տալու մարդկութեանը՝ համաձայն Իր խօսքի. «Ես եմ Ճանապարհը եւ Ճշմարտութիւնը եւ Կեանքը» (Հովհ. 14.6)։ Այսօր էլ բեթղեհեմեան պայծառափայլ աստղը փորձութիւններով խռովայոյզ աշխարհում փրկութեան յոյսի ճանապարհն է ուղենշում։ Սուրբ Ծննդեան գիշերը վկայում է, որ անգամ նեղութիւնների խաւարում փայլատակում է Աստծոյ լոյսը, ծագում է Արդարութեան Արեգակը, ինչպէս անուանւում է Քրիստոս շարականներում եւ մարգարեութեան մէջ (Մաղաք. 4.2)։
Քրիստոսին ընդառաջ գնալը, Նրա պատուիրաններով ապրելը վեհացնում եւ զօրացնում է անձերին ու ժողովուրդներին, արժանի դարձնում աստուածային պարգեւների եւ օրհնութիւնների։ Խանձարուրով պարուրուած Աստուածորդուն ընդունելով մարդը զգեստաւորւում է փրկութեան շնորհով, որը հաւատացեալի կեանքում բխեցնում է երկնառաք բարիքների աղբիւրը։ Աստուածամերժ ընթացքները, սակայն, մարդկութեանը կանգնեցնում են չարիքների եւ կործանարար սպառնալիքների առջեւ։
Այսօր ամենքս ականատես ենք Աստծուց հեռացող աշխարհի դառնագին իրականութեանը՝ նիւթականի պաշտամունք, քաղաքական ու տնտեսական շահեր, տիրապետելու մոլուցք, որոնց զոհաբերւում են անհատի եւ ժողովուրդների իրաւունքները, բարոյականութեան սկզբունքները, համամարդկային խաղաղ համակեցութիւնը, երջանկութիւնն ու բարիքը։ Այս արհաւիրքների հետեւանքով մարդկութիւնը յայտնուել է աղէտալի իրողութիւնների առջեւ՝ պատերազմներ, զոհեր ու աւերածութիւններ, կարիքի ու դժուարութիւնների մէջ հասակ առնող որբացեալ եւ անօթեւան երեխաներ, հակամարտութիւնների դաժան պայմաններում գոյատեւող, գաղթական դարձած ընտանիքներ։ Այսպիսի տագնապալի իրավիճակները հրամայական են դարձնում աշխարհի բարեփոխումն ու ժողովուրդների համերաշխ գոյակցութիւնը, որը մշտապէս պատգամւում է Մանուկ Աստուածորդու Սուրբ Ծննդեան՝ «յերկիր խաղաղութիւն եւ ի մարդիկ հաճութիւն» (Ղուկ. 2.14) հրեշտակաձայն օրհներգութեամբ։
Սիրելինէր, աշխարհաքաղաքական ներկայ բարդ իրադրութեան մէջ ծանր փորձութիւնների ենթարկուեց մեր ժողովուրդը՝ բռնազաւթուեց եւ հայաթափուեց Արցախը, գրաւուած են մնում Հայաստանի ինքնիշխան տարածքներ, տակաւին գերութեան մէջ են եւ անյայտ կորած մեր բազում զաւակներ, Ադրբեջանի կողմից շարունակում են հնչեցուել նորանոր պահանջներ ու սպառնալիքներ։ Այսօր մեր երկիրը խռովայոյզ է ներքին խնդիրներով՝ կեղծիք, անօրինականութիւն, չարակամութիւն, քինախնդրութիւն, արատաւոր երեւոյթներ, որոնք հասարակութեան մէջ պատճառ են դառնում անվստահութեան, անտարբերութեան, թշնամանքի ու պառակտումի եւ յանգեցնում ազգի տկարացման։ Այս ամէնին զուգընթաց քրիստոնեական բարոյական ընկալումների եւ ազգային-հոգեւոր աւանդական արժէքների խեղաթիւրումը աղճատում է մեր ժողովրդի ինքնութեան դիմագիծը, թուլացնում ազգային ոգին, ներքաշում դէպի մեղքի, յուսահատութեան որոգայթներ։ Սուրբ Ծննդեան խորհրդով մէզ վերստին երկնային հրաւէրն է ուղղւում՝ ընթանալու սիրոյ, հաշտութեան, արդարութեան տէրունաւանդ ճանապարհով։ Այս կոչը իրագործելի է միայն քրիստոնեական կենսակերպով։ Այս կոչը իրագործելի է, եթէ անձնական բարեկեցութեանն ու յարմարաւետութեանը չզոհաբերէնք մեր ինքնութիւնը, ժողովրդի անվտանգութիւնն ու հայրենիքի բարօրութիւնը։ Չենք կարող ծառայել համընդհանուր բարիքին՝ տրուելով փառասիրութեանն ու իշխանատենչութեանը եւ առաջնայնութիւն տալով սեփական շահերին։ Մենք՝ որպէս ազգ, լինի հայրենիքում, թէ սփիւռքում, կը յաջողենք, եթէ միշտ հաւատարիմ մնանք Քրիստոսին, Նրա վարդապետութեանը, ընթանանք Աստծոյ Խոսքի եւ աստուածային կամքի համաձայն, ձերբազատուենք մոլորեցնող ու բաժանարար մարդկային նենգամտութիւնից։ Միաբանուենք հանուն մեր պետութեան անսասանութեան եւ անվտանգութեան, Արցախից բռնի տեղահանուած մեր քոյրերի ու եղբայրների նկատմամբ արդարութեան վերականգնման, հանուն մեր ազգի ու հայրենիքի ապահով եւ բարօր յարատեւութեան։ Լինենք միմեանց գործակից եւ ոչ՝ հակառակորդ, լինենք նախանձախնդիր ծառայելու եւ ոչ՝ դիրքն ու հանգամանքը չարաշահելու մէջ։ Տարագիր չդառնանք մեր երկրից, ապրենք ու արարէնք մեր հարազատ բնօրրանում։ Երեխաների նոր ծնունդով, արժանաւոր զաւակների դաստիարակութեամբ հզօրացնենք մեր ազգն ու հայրենիքը։ Յուրաքանչիւրս մեր կարողութեան չափով ներդրում բերէնք համազգային կեանքի առաջընթացին՝ ի պայծառութիւն մեր պետութեան եւ ի շահ մեր ժողովրդի լուսաւոր գալիքի։
Սուրբ Ծննդեան ուրախալի աւետիսով ողջունում ենք Առաքելական մեր Սուրբ Եկեղեցու Նուիրապետական Աթոռների Գահակալներին՝ Ն.Ս.Օ.Տ.Տ. Արամ Ա Մեծի Տանն Կիլիկիոյ Կաթողիկոսին, Երուսաղեմի Հայոց Պատրիարք Ամենապատիւ Տ. Նուրհան արքեպիսկոպոս Մանուկեանին, Կոստանդնուպոլսի Հայոց Պատրիարք Ամենապատիւ Տ. Սահակ արքեպիսկոպոս Մաշալեանին, մեր Սուրբ Եկեղեցու ուխտապահ ողջ հոգեւոր դասին: Մեր ողջոյնն ենք յղում ի Քրիստոս Մեր հոգեւոր եղբայրներին՝ քոյր Եկեղեցիների Պետէրին եւ հաւատաւոր իրենց հօտին: Հայրապետական Մեր սէրն ու օրհնութիւնն ենք բերում համայն մեր ժողովրդին ի հայրենիս եւ ի սփիւռս աշխարհի:
Սուրբ Ծննդեան հոգենորոգ այս օրը միասնաբար աղօթք մատուցենք մարդեղացեալ Աստուածորդուն եւ հայցենք, որ առատ լինէն երկնահեղ օրհնութիւնները ազգային ու հայրենական մեր անդաստանում, հաստատուն մնան տէրունաւանդ հաւատքը, յոյսն ու սէրը մեր կեանքում։ Խնդրենք Երկնաւոր Տիրոջ զօրակցութիւնը մեծ կորուստներ կրած եւ հարազատ բնօրրանից զրկուած արցախահայութեանը։ Խնդրենք Ամենակալից, որ խաղաղութիւն ու բարօրութիւն հաստատուի ողջ աշխարհում եւ հայրենի մեր երկրում։ Թող Աստծոյ ամենախնամ Աջը եւ Սուրբ Ծննդեան կէնարար շնորհները մշտապէս հովանի լինէն համայն մեր ժողովրդին այսօր եւ միշտ եւ յաւիտեանս. ամէն։
Քրիստոս ծնաւ եւ յայտնեցաւ,
Ձեզ եւ մէզ մեծ աւետիս
