Ն․Ս․Օ․Տ․Տ․ Գարեգին Բ Ծայրագոյն Պատրիարք եւ Ամենայն Հաեօց կաթողիկոսն ուղերձ է յղել Արցախի Հանրապետութեան անկախութեան օրուայ առիթով.
«Սիրելի ժողովուրդ,
Սեպտեմբերի 2-ը Արցախի անկախութեան օրն է:
Արցախի բռնազաւթման եւ ամբողջական հայաթափման պայմաններում մենք շարունակում ենք նշել պատմական այս օրը, քանզի Արցախն անցեալ չէ, այն պատմական հայրենիք է, ուր արցախահայութիւնը հազարամեակներով ապրել ու արարել է, արեամբ ու քրտինքով պաշտպանել իր ինքնութիւնը, հայրերի աւանդներն ու սրբազան արժէքները, փայփայել լուսաւոր գալիքի իր նուիրական երազները։
Մենք շարունակում ենք նշել Արցախի անկախութեան օրը նաեւ որպէս արդար ընդվզում ընդդէմ մեր ժողովրդի հանդէպ իրագործուած ցեղասպանութեան, բռնութեան ու ատելութեան: Բռնութիւնը չի կարող ջնջել մարդկային յիշողութիւնը եւ չի կարող խլացնել արդարութեան ձայնը: Մենք հաւատում ենք, որ պատմական մեր յիշատակները եւ մեր նախնեաց սխրանքները զօրացնելու են մէզ եւ մեր ժողովուրդը հաւատով ու յոյսով յաղթահարելու է պատերազմի աղէտալի հետեւանքները, հայրենասէր ու ազգանուէր ոգով հետամուտ է լինելու իր համազգային իղձերի ու տեսիլքների իրականացմանը:
Արցախի Անկախութեան օրուայ յիշատակումը եւս մէկ պատգամ է մեր ժողովրդին եւ մարդասիրութեան բարձր արժէքների ջատագով միջազգային հանրութեանը՝ գործուն ջանքեր ներդնելու հանուն արդարութեան ու ճշմարտութեան յաղթանակի, հանուն արցախահայութեան ոտնահարուած իրաւունքների պաշտպանութեան եւ Արցախի հայկական բազմադարեայ հոգեւոր-մշակութային ժառանգութեան պահպանութեան:
Նուիրական այս օրը մեր սրտաբուխ աղօթքը բարձրացնենք առ Աստուած հանուն Արցախի ազատագրութեան ու պաշտպանութեան իրենց կեանքն ընծայած բոլոր քաջորդիների, ինչպէս եւ Տիրոջ օգնականութիւնը հայցենք Արցախի պատանդառուած ռազմաքաղաքական ղեկավարների եւ գերեւարուած մեր բոլոր զաւակների շուտափոյթ ազատ արձակման համար:
Թող Երկնաւոր Տերը միշտ առկայծ պահի մեր ժողովրդի զաւակների հոգիներում սէրն ու հաւատարմութիւնը հանդէպ հայրենի երկիրը, խաղաղութիւն ու մխիթարութիւն սփռի հայրենական մեր կեանքում եւ դէպի լուսաւոր ու յաղթական հանգրուաններ առաջնորդի համայն ազգիս:
Ամէն»։
