Երեւանը վերջին շրջանում չի մասնակցում Հաւաքական անվտանգութեան պայմանագրի կազմակերպութեան քարտուղարութեան աշխատանքներին, սակայն կազմակերպութեանը Հայաստանի անդամակցութիւնը կասեցնելու մասին պաշտօնական յայտարարութիւններ չէն եղել. այս մասին ТАСС-ին տուած հարցազրոյցում ասել է ՀԱՊԿ գլխաւոր քարտուղար Իմանղալի Թասմաղամբետովը։
«Սա Հայաստանի որոշումն է այս փուլում, եւ մենք՝ որպէս միջազգային կազմակերպութիւն, յարգում ենք ինքնիշխան պետութեան ցանկացած որոշում։ Այնուամենանիւ, կազմակերպութեան գործունէութիւնը շարունակւում է ամբողջ ծաւալով, բոլոր ընթացակարգերը պահպանւում են ՀԱՊԿ կանոնակարգային դաշտին ամբողջութեամբ համապատասխան: Քարտուղարութիւնը պարբերաբար տեղեկացնում է Երեւանի համապատասխան կառոյցների ընդունած եւ ընդունուող որոշումների մասին։ Հայաստանի Հանրապետութեան պաշտօնատար անձանց նշուած յայտարարութիւնների առնչութեամբ նշեմ, որ Երեւանից քարտուղարութիւնը կազմակերպութեանն անդամակցութիւնը կասեցնելու վերաբերեալ պաշտօնական յայտարարութիւններ չի ստացել», – ասել է Թասմաղամբետովը։
Աւելի վաղ Հայաստանի վարչապետ Նիկոլ Փաշինեանը France 24 հեռուստաալիքին տուած հարցազրոյցում ասել էր, որ Երեւանը սառեցրել է մասնակցութիւնը ՀԱՊԿ-ին՝ նշելով, որ կազմակերպութիւնը չի կատարել հանրապետութեան նկատմամբ ստանձնած պարտաւորութիւնները Ադրբեջանի հետ սահմանին 2021-ին եւ 2022-ին սրման ժամանակ։ ՌԴ նախագահի մամուլի քարտուղար Դմիտրի Պեսկովը նշել է, որ Մոսկուան շարունակում է շփումը Երեւանի հետ՝ պարզաբանելու Փաշինեանի յայտարարութիւնները։
