Հայոց պետականութիւնը ոչնչացնելու մտադրութիւն ունեցող յանցաւոր վարչախմբի դէմ պայքարը դադար չի ունենալու:

ՀՅԴ Հայաստանի ԳՄ յայտարարութիւնը 2024թ. մայիսի 27-ին ոստիկանութեան գործողութիւնների մասին

2024թ. մայիսի 27-ին Հայաստանի Հանրապետութիւնում տեղի ունեցած քաղաքացիական խաղաղ անհնազանդութեան գործողութիւններն ուղեկցւում են ոստիկանութեան ծառայողների ակնյայտ ապօրինի հակազդեցութեամբ: Շուրջ 300-ի հասնող բերման ենթարկուած քաղաքացիներից շատերի, ինչպէս նաեւ ժողովրդի ներկայացուցիչներ հանդիսացող, անձեռնմխելիութեամբ օժտուած Ազգային ժողովի բազմաթիւ պատգամաւորների նկատմամբ կիրառուել է ֆիզիկական եւ հոգեբանական բռնութիւն: Քաղաքացիներին պատկանող բազմաթիւ աւտօմեքենաներ բերման են ենթարկուել: Կան վնասուածքներ ստացած քաղաքացիներ:

Ոստիկանութեան 6 տասնեակից աւելի ծառայողներ փորձել են ներխուժել ՀՅԴ «Սիմոն Վրացեան» կենտրոն, սադրելով եւ յարձակուելով գրասենեակ անօրինական մուտքն արգելող կուսակցութեան ղեկավար անդամների նկատմամբ: Գործադրելով բիրտ ուժ, ցուցաբերելով փողոցային խուլիգանին եւ կենդանական աշխարհում տարածուած ոհմակին բնորոշ վարքագիծ ոստիկանութեան տասնեակ ծառայողներ բացայայտ ֆիզիկական բռնութեան գործադրմամբ բերման ենթարկեցին քաղաքացիների, այդ թւում ՀՅԴ Հայաստանի Գերագոյն մարմնի նախագահ, ԱԺ պատգամաւոր Աշոտ Սիմոնեանին:

ՀՅԴ Հայաստանի Գերագոյն մարմինը այս անօրինակ ապօրինութիւնները գնահատում է որպէս կազմակերպուած յանցաւոր խմբի կողմից Հայաստանի սահմանադրական կարգը տապալելուն ուղղուած հերթական գործողութիւն: Հանցաւոր այս խմբի պարագլուխ եւ առաջնորդ Նիկոլ Փաշինեանը, հաւատարիմ մնալով հայրենադաւ իր ծրագիրն իրականացնելու, խառնակչութեան, քաղաքացիների եւ քաղաքական կուսակցութիւնների նկատմամբ բացայայտ հակաօրինական գործողութիւններ կազմակեպելու իր յանցաւոր մտադրութիւնները կեանքի կոչելու նպատակադրումներին, պետական հաստատութիւններն ու մարմինները վերածել է յանցագործութեան կոնկրէտ գործիքների:

Առ այդ, ընդգծելով ոստիկանական ծառայողների կողմից հակարգուած եւ պարբերական դարձած անօրինական բերման ենթարկելու դէպքերը, այդ թւում՝ անձեռնմխելիութեամբ օժտուած Ազգային ժողովի պատգամաւորների նկատմամբ, տեղեկացնելով ժողովրդաւարութեան եւ մարդու իրաւունքներով զբաղուող տեղական եւ միջազգային կազմակերպութիւններին ու օտարերկրեայ պետութիւնների դիւանագիտական ներկայացուցչութիւններին՝ պահանջում ենք կոնկրէտ գնահատական տալ Հայաստանի Հանրապետութեան սահմանադրական կարգը տապալած եւ պետութիւնը զաւթած յանցաւոր այս խմբաւորմանը:

Վերահաստատելով համոզումը, որ յանցագործութիւնները անպատիժ չէն մնալու, պահանջում ենք գլխաւոր դատախազութիւնից եւ քննչական մարմիններից անյապաղ քրէական վարոյթ նախաձեռնել եւ պատասխանատուութեան կանչել բացայայտ յանցագործութիւններ կատարած ոստիկանութեան ծառայողներին, վերջիններիս անօրինական հրահանգ տուած եւ յանցագործութիւնների անպատժելիութիւնը երաշխաւորող Նիկոլ Փաշինեանին՝ հակառակ դէպքում գլխաւոր դատախազութիւնն ու քննչական մարմինները կդիտարկուեն սահմանադրական կարգը տապալող ուժերին օժանդակողներ եւ առանձնապէս ծանր յանցագործութիւնները պարտակողներ՝ դրանցից բխող ծանրագոյն պատասխանատուութեամբ:

Կրկին արտայայտելով բազմիցս ապացուցուած համոզումը այն մասին, որ ՀՅ Դաշնակցութեանը նման մեթոդներով չէն կարող կանգնեցնել, յայտարարում ենք, որ պետութեան կազմաքադմանը տանող եւ Հայոց պետականութիւնը ոչնչացնելու մտադրութիւն ունեցող յանցաւոր վարչախմբի դէմ պայքարը դադար չի ունենալու:

Կոչ ենք անում համայն հայութեանը՝ հանուն Հայաստանի եւ Հայ ժողովրդի իրաւունքների պաշտպանութեան համախմբուել սրբազան շարժման շուրջ:

ՀՅԴ Հայաստանի Գերագոյն մարմին
27.05.2024թ.