Չորեքշաբթի՝ փետրւարի 19-ի երեկոյեան, Նոր Ջուղայի Հայ Մ. Մ. «Արարատ» միութեան սրահում, հանդիսաւոր տօնակատրութեամբ նշւեց Հայ Յեղափոխական Դաշնակցութեան կուսակցութեան հիմնադրութեան 135-ամեակը։
Երեկոյին ներկայ էին՝ Սպահանի հայոց թեմի առաջնորդ Տ. Սիփան արք. Քէչէճեանը, Իրանի Իսլ. խորհրդարանում զոյգ հայ պատգամաւորներ՝ Արա Շահվերդեանն ու Գեղարդ Մանսուրեանը, օրւայ բանախօս պատմաբան եւ ՀՀ ազգային ժողովի «Հայաստան» խմբակցութեան պատգամաւոր Գառնիկ Դանիէլեանը, Թեհրանից ժամանած հիւրեր՝ «ԱԼԻՔ» հաստատութեան ներկայացուցիչ Սեւան Դանիէլեանն ու «ԱԼԻՔ» օրաթերթի վարչութեան նախագահ Րաֆֆի Փիրումեանը, շրջանիս Հայ Դատի յանձնախմբի ներկայացուցիչ Արբի Բաբայեանը, թեմի ազգային մարմինների, միութիւնների եւ դպրոցների ներկայացուցիչներ, յոբելեար կուսակցութեան անդամներն ու ժողովուրդ։
Սկզբում դրօշակաիր խմբի միջոցով սրահ բերւեցին Իրանի Իսլամական եւ Հայաստանի Հանրապետութիւնների, ինչպէս նաեւ ՀՅԴ կուսակցութեան դրօշները, ապա երեկոն պաշտօնապէս բացւած յայտարարւեց Իրանի Իսլ. Հանրապետութեան օրհներգով եւ ՀՅԴ կուսակցութեան քայլերգ «Մշակ Բանւոր»-ով։
Այնուհետեւ երեկոյի հանդիսավար Մանիա Ղուկասեանը հանդէս եկաւ ողջոյնի եւ ՀՅԴ-ի 135-ամեայ երթին ակնարկող խօսքերով։
Շարունակութեան մէջ բանախօսեց ՀՀ Ազգային ժողովի պատգամաւոր Գառնիկ Դանիէլեանը։ Նա անդրադառնալով հայոց պատմութեան մէջ ՀՅԴ-ի անփոխարինելի դէրին՝ թւարկեց կուսակցութեան խոշորագոյն գործողութիւններից մի քանիսը եւ ընդգծեց, թէ հայութեան միաւորումը, քաղաքական եւ տնտեսական ազատութեան ապահովումը, պատմական արդարութեան վերականգնումն ու միացեալ-զօրեղ հայրենիքի կերտումը շարունակում են մնալ կուսակցութեան ազգային նպատակների շրջագծում։
Ազգային ժողովի պատգամաւորն իր խօսքի մի այլ բաժնում ընդգծելով, որ այսօր հայրենիքը կանգնած է լրճագոյն մարտահրաւէրների առջեւ, շեշտեց. «Ճիշտ է վերանկախացումից յետոյ մեր երիտասարդ կառավարութիւնների գործողութիւնների մէջ եղել են սխալներ եւ յաճախ ճիշտ չի օգտագործւել ամբողջ ներուժն ու չի ստեղծւել սոցիալական բաւարար արդարութիւն ու մթնոլորտ, սակայն այն ինչ տեղի է ունենում 2018 թւականից գիտակցւած դաւաճանական քայլ է սեփական ժողովրդի հանդէպ։ Հայաստանի այսօրւայ իշխանութիւնն ատում է ամէն հայկականն ու ազգայինը եւ մարտահրաւէր է նետում Հայ Առաքելական Սուրբ եկեղեցու, արժէքների ու աւանդոյթների դէմ»։
Պրն. Դանիէլեանն մատնանշելով Հայաստանի տարածքից թշնամուն կատարւող հողային զիջումները՝ յատկապէս շեշտ դրեց այն հանգամանքի վրայ, որ կառավարութեան յանցաւոր արտաքին քաղաքականութեան արդիւնքում վտանգւում են պատմականօրէն մշակութային, տնտեսական եւ քաղաքական ընդհանուր շահեր ունեցած բարեկամ երկրների՝ ի մասնաւորի Իրանի հետ ունեցած մեր սերտ յարաբերութիւնները։
Նա գնահատելով իրանահայ համայնքի գործադրած բոլոր ջանքերը՝ Իրան-Հայաստան յարաբերութիւնների սերտացման ուղղութեամբ, շնորհակալական խօսք ասաց Իրանի Իսլ. Հանրապետութեան իշխանութեանը՝ տարիների ընթացքում Հայաստանի Հանրապետութեան կողքին կանգնելու եւ յատկապէս Սիւնիքի հարցում իրենց դրսեւորած աննահանջ մօտեցման համար։
Բանախօսն իր ելոյթի աւարտին կոչ արեց համայն հայութեանը համախմբւել հայրենիքի փրկութեան օրակարգի շուրջ, քանի որ այլեւս կորցնելու բան չի մնացել։
Երեկոյի գեղարւեստական կատարումների բաժնում ազգային-յեղափոխական երգերի կատարումներով հանդէս եկան համայնքի տաղանդաւոր երգիչներ՝ Զարենուշ Աղուրեանը, Դաւիթ Թորոսեանն ու Վանանդ Իսաղուլեանը՝ նւագակցութեամբ «Անի» նւագախմբի։ Ասմունքով ելոյթ ունեցաւ Վանէ Յովսէփեանը։
