Հայաստանի գործող իշխանութիւնները հատել են ինչպէս իրաւական, այնպէս էլ բարոյական արժէքների սահմանը
Յունիսի 21-ին Հայաստանի Հանրապետութեան Արցախի Հանրապետութեան մշտական ներկայացուցչութեան տարածքում տեղի ունեցած միջադէպը վեր հանեց այն փաստը, որ Հայաստանի գործող իշխանութիւնները հատել են ինչպէս իրաւական, այնպէս էլ բարոյական արժէքների սահմանը: Արցախի հանդէպ նմանօրինակ վերաբերմունքը շարունակութիւնն է օրեր առաջ` յունիսի 12-ին իրականացուած բռնաճնշումների, ինչը վկայում է, որ յանուն իշխանութեան պահպանման նրանք պատրաստ են ոտնահարել երկրի Սահմանադրութիւնը եւ, անհամաչափ ուժ ու յատուկ միջոցներ կիրառելով սեփական ժողովրդի դէմ, կասկածի տակ դնել Հայաստանի Հանրապետութեան ժողովրդավարութիւնը եւ իրաւական պետութիւն լինելու յանձնառութիւնը: Մեզ համար անընդունելի ու խստիւ դատապարտելի են այսպիսի երեւոյթները:
Հայաստանի Հանրապետութեան իշխանութիւններն արդէն տեւական ժամանակ է, ինչ ժողովրդավարութեան քողի տակ թիրախաւորում են արցախցիների տարբեր խմբերի ու անհատների, կիրառելով նրանց դէմ բռնաճնշումներ, խտրական վերաբերմունք` օգտագործելով «հայաստանցի-ղարաբաղցի» պառակտիչ բառապաշար:
Նման պայմաններում միաժամանակ տեղին ենք համարում երախտագիտութեան խօսք յղել Հայաստանի Հանրապետութեան հազարաւոր մեր հայրենակիցներին, ովքեր արհամարհելով արհեստականօրէն ստեղծուած բաժանարար գծերը, անցած ինը ամիսների ընթացքում` մեզ համար դժուարին օրերին, ամէն ինչ արել են մեղմելու արցախահայութեան բարոյահոգեբանական եւ ֆիզիքական ցաւը:
Վտանգաւոր եւ անընդունելի է ներհանրային համերաշխութիւնը խարխլող եւ Արցախի հայութեան արժանապատւութիւնը վիրաւորող բոլոր այն արարքները, յայտարարութիւններն ու ելոյթները, որոնք դրսեւորւում են ոչ միայն ընկերային ցանցերում լայնօրէն տարածուած իրական կամ կեղծ օգտատէրերի միջոցով, այլեւ Հայաստանի Հանրապետութեան Ազգային ժողովի ամպիոնից` իշխող քաղաքական ուժի ներկայացուցիչների կողմից հնչեցուած:
Հայրենիքի եւ ազգային արժանապատւութեան համար պայքարը իւրաքանչիւր քաղաքացու, բոլոր ժողովուրդների անքակտելի իրաւունքն է, ուստի պահանջում ենք Հայաստանի Հանրապետութեան իշխանութիւններից զերծ մնալ բռնութիւն, ատելութիւն եւ թշնամանք սերմանելու նենգ ու վտանգաւոր դրսեւորումներից:
«ԱՐԴԱՐՈՒԹԻՒՆ» ԽՄԲԱԿՑՈՒԹԻՒՆ
«ՀՅ ԴԱՇՆԱԿՑՈՒԹԻՒՆ» ԽՄԲԱԿՑՈՒԹԻՒՆ
«ԱՐՑԱԽԻ ԺՈՂՈՎՐԴԱՎԱՐԱԿԱՆ ԿՈՒՍԱԿՑՈՒԹԻՒՆ» ԽՄԲԱԿՑՈՒԹԻՒՆ
«ԱԶԱՏ ՀԱՅՐԵՆԻՔ-ՔՄԴ» ԽՄԲԱԿՑՈՒԹԻՒՆ
