ԱՄՆ մի խումբ սենատորներ պէտքարտուղար Էնթօնի Բլինքենին ուղղուած նամակում նախագահ Բայդենի վարչակազմին կոչ են անում ապահովել Ադրբեջանում պահուող հայ ռազմագերիների ազատ արձակումը եւ Լեռնային Ղարաբաղի բնակչութեան՝ իրենց հայրենիք վերադառնալու իրաւունքը։
Այս մասին նշւում է Ամերիկայի հայ դատի յանձնախմբի (ANCA) տարածած հաղորդագրութեան մէջ՝ մանրամասնելով, որ նման կոչով հանդէս են եկել սենատորներ՝ Էդ Մարկին (դէմոկրատ՝ Մասաչուսեթսից), Բիլ Քեսիդին (Հանրապետական՝ Լոս Անջելեսից), Թոմ Թիլիսը (Հանրապետական՝ Հիւսիսային Կարոլինայից) եւ Գարի Փիթերսը (դէմոկրատ՝ Միչիգանից)։
Սենատորներն ընդգծել են, որ Ադրբեջանն աննշան տոյժեր է կրել միջազգային հանրութիւնից՝ կապուած Լեռնային Ղարաբաղի նախկին ղեկավարների եւ այլ պաշտօնեաների շարունակական կալանքի տակ պահելու համար։
«Բայդէն-Հարիսի վարչակազմի անկարողութիւնն՝ Ադրբեջանին պատասխանատուութեան ենթարկելու Արցախում ցեղասպանութեան, Հայաստանի տարածքների օկուպացիայի եւ հայ բանտարկեալների ու քաղաքական առաջնորդների շարունակական կալանքի տակ պահելու համար ոչ միայն խաթարել է կայուն եւ արդար խաղաղութեան ապահովմանն ուղղուած ջանքերը, այլեւ քաջալերել Է Ադրբեջանի կողմից ագրեսիայի վերսկսման աճող սպառնալիքները», — յայտարարել է Ամերիկայի հայ դատի յանձնախմբի գործադիր տնօրէն՝ Արամ Համբարեանը՝ շնորհակալութիւն յայտնելով նամակի հեղինակ սենատորներին վարչակազմի վրայ ճնշում գործադրելու եւ Ադրբեջանին պատասխանատուութեան ենթարկելու կոչի համար։
Նրա պնդմամբ՝ բանակցութիւնների միջոցով ցանկացած կարգաւորում պէտք է համապատասխանի արցախահայութեան՝ իրենց հայրենի հայրենիքում խաղաղ եւ անվտանգ ապրելու հիմնարար իրաւունքներին:
Նամակում, որտեղ կոչ է արւում Պետքարտուղարութեանը Լեռնային Ղարաբաղում տեղի ունեցածը որակել որպէս էթնիկ զտում, ընդգծւում է անհրաժեշտութիւնը, որ Բայդենի վարչակազմը վճռականօրէն պաշտպանի եւ ապահովի հայերի՝ միջազգային երաշխիքներով իրենց տները վերադառնալու իրաւունքը: Թեեւ Բայդենի վարչակազմը մի քանի հրապարակային յայտարարութիւններով պաշտօնապէս հաստատել է Լեռնային Ղարաբաղի բնակչութեան վերադարձի իրաւունքը, այդուհանդերձ որեւէ շօշափելի գործողութիւն չի ձեռնարկել՝ ապահովելու համար այն անվտանգ պայմանները, որոնք անհրաժեշտ են, որպէսզի ապահւուի նաեւ հայերի՝ հետապնդումներից զերծ լինելն այն դէպքում, եթէ նրանց թոյլատրուի վերադառնալ իրենց տները:
Մեկնաբանելով Հայաստանի եւ Ադրբեջանի միջեւ խաղաղութեան բանակցութիւնների ընթացքը՝ սենատորները նշել են, որ Լեռնային Ղարաբաղի քաղաքական ղեկավարութեանը գլխատելու Ադրբեջանի փորձերը «էթնիկ զտումներ իրականացնողների յայտնի մարտավարութիւնն են»:
Նամակում, մասնաւորապէս, ընդգծւում է Լեռնային Ղարաբաղի ներկայ եւ նախկին առաջնորդների, այդ թւում՝ նախկին նախագահներ Արկադի Ղուկասեանի, Բակոյ Սահակեանի եւ Արայիկ Յարութիւնեանի, նախկին պետնախարար Ռուբէն Վարդանեանի, Արտաքին գործերի նախկին նախարար Դաւիթ Բաբայանի, ԱԺ նախկին խօսնակ Դաւիթ Իշխանեանի եւ այլոց շարունակական ապօրինի կալանքի տակ պահելը:
