Վրաստանի նախկին նախագահ Միխեիլ Սաակաշուիլին իր ֆեյսբուքեան էջում գրառում է արել՝ դիմելով Հայաստանի վարչապետ Նիկոլ Փաշինեանին եւ խորհուրդ տալով հնարաւորինս շուտ խզել յարաբերութիւնները Ռուսաստանի հետ։
Նրա խօսքով՝ Ռուսաստանն արգելել է հայկական գրեթէ բոլոր գիւղմթերքների եւ կոնեակի ներկրումը, սակայն այս արգելքը պէտք է նախազգուշացում լինի Փաշինեանի համար, քանի որ Պուտինը ոչ թէ սկսել է չսիրել հայկական կոնեակը, այլ հէնց Փաշինեանին, իսկ էմբարգոն նրան իշխանութիւնից հեռացնելու հերթական քայլն է։
«Ուզում եմ նորից կրկնել Հայաստանի վարչապետի համար. յարգելի՛ Նիկոլ, փախի՛ր։ Փախի՛ր արագ, առանց հետ նայելու ՀԱՊԿ-ից, ԵւրԱզԷՍ-ից, վազիր դէպի Եւրամիութիւն, ՆԱՏՕ, դէպի նոր տարածաշրջանային միութիւններ։
Բայց ամենակարեւորը՝ փախի՛ր Ռուսաստանից, փրկի՛ր քեզ եւ հայոց պետականութիւնը։ Պուտինը նման է բուլդոգի. նա կծում է ու բաց չի թողնում, քանի դեռ ատամները չի սեղմել։ Խուսափեք դրանից՝ ողջ մնալու համար:
Համոզուած եմ՝ դեռ ուշ չէ: Եւ դադարեք դանդաղել ու տատանուել: Ուշացումը նման է մահուան», — գրել է Սաակաշուիլին:
