Այսօր՝ մայիսի 26-ին Հանրապետութեան հրապարակում մեկնարկեց «Տաւուշը հանուն հայրենիքի» շարժման առաջնորդ Բագրատ Սրբազանի հրաւիրած համազգային հանրահաւաքը։
Մինչեւ հանրահաւաքի սկսելը երիտասարդները Մատենադարանի մօտից երթով միացան հրապարակում հաւաքուած բազմահազար քաղաքացիներին:
Կառաւարութեան շէնքի դիմաց վահաններով զինուած բազմաթիւ ոստիկաններ էին բերուել։ Նրանք մի քանի շարքով փակել էին կառավարութեան շէնքի մուտքը։
Հանրահաւաքն սկսուեց զօրակցութեան խօսքերով՝ ուղղուած այսօր Տաւուշում եւ Լոռիում բնական աղէտի հետեւանքով տուժածներին։
Բագրատ Սրբազանն, աղօթք բարձրացնելուց առաջ, կոչ արեց մէկ րոպէ լռութեամբ յարգել աղէտի հետեւանքով զոհուած քաղաքացու յիշատակը։
«Այս իշխանութիւնը ոչ միայն յանցաւոր կերպով յանձնում է մեր պետութիւնը՝ իր ֆիզիկական գոյութեամբ, այլեւ աւելի սարսափելին է անում՝ ձգտում է փոխել մեր Հայրենիքի բովանդակութիւնը, ինքնութիւնն ու արժէքները՝ գողանալով եւ ուրանալով մեր խորհրդանիշները, մեր երազներն ու իղձերը, մեր գոյութեան իրաւունքն ու կենսագրութիւնը՝ մոռանալով, որ ոգին յաղթել է «դուխին», Եռագոյնը՝ սեւ ու սպիտակին»,- հանրահաւաքի ժամանակ ասաց Բագրատ Սրբազանը։
Չնայած սրան, պայքարը հասնելու է իր նպատակին:
Նա ընդգծեց՝ այս շարժումը հայկական օրակարգ, յստակ նպատակ ունենալու մասին է, կարգապահ ու պատասխանատու քաղաքացիներ ունենալու, դիմակայուն ու անվտանգ, կայուն ու հաստատուն պետութիւն ու խաղաղութիւն ունենալու մասին է։
Այս շարժումը Աւէտեաց երկիր ունենալու մասին է. յայտարարեց Բագրատ Սրբազանը՝ այդ նպատակին հասնելու համար վերահաստատելով Նիկոլ Փաշինեանի հրաժարականի պահանջը։
«Այս ճանապարհի խոչընդոտն այսօրուայ իշխանութիւնը, յատկապէս նրա ղեկավարն է, եւ հետեւաբար, նա պէտք է հեռանայ»,- ասաց Սրբազանը։
«Հեռացիր» վանկարկեցին hանրահաւաքի մասնակիցները։
ԵՊՀ արեւելագիտութեան ֆակուլտետի պրոֆէսոր Գուրգէն Մելիքեանը իր ելոյթում ասաց. «Շատ դժուար փուլ է մէզ սպասում, ժողովոյ՛ւրդ, մենք պէտք է այդ դժուարութիւնը յաղթենք, հասկանանք, որ ով էլ ստանձնեց պատասխանատուութիւն, սա նրա համար լինելու է իր կեանքի ամենաբարդ ծառայութիւնը։ Հայաստանը երբեք այսքան ծանր վիճակում իշխանութիւն չի փոխել։ Մեզ պէտք է մէկը, ով կարող է վերցնել այդ պատասխանատուութիւնը, համախմբել բոլորին, եւ կապուած չլինի ոչ մէկից, բացի սեփական խղճից, ժողովրդից ու պետութեան շահից։
«Ճնշող մեծամասնութիւնը եղել է միակարծիք, որ այդ մարդը, իհարկէ, Բագրատ Սրբազանն է։ Եւ կայ արդէն յստակ ձեւաւորուած համախոհութիւն քաղաքական ուժերի ու ժողովրդի մօտ, որ շարժման առաջնորդ Բագրատ Սրբազանը պէտք է լինի նաեւ վարչապետ»,-ասաց նա։
«Սրբազայ՛ն վարչապետ»,- վանկարկեց ժողովուրդը։
Բագրատ սրբազանը յայտարարեց, որ անցումային կառավարութիւնը՝ հաշտութեան կառավարութիւնը, պէտք է լինի մասնագիտական կարողութիւններով, հմտութիւններով օժտուած, պէտք է լինի հայրենատէր եւ աստուածասէր, հանրահաւաքի ժամանակ յայտարարեց
«Հստակ պէտք է ունենայ օրակարգային երեք ուղղութիւններ․
Առաջինը՝ ներքին հաշտութեան օրակարգ՝ հիմնուած արդարութեան եւ արդարադատութեան վրայ։
Երկրորդը՝ արտաքին յարաբերութիւններում պէտք է վարի առանց «հակայ»-ների քաղաքականութիւն, ներկայ վիճակի սառեցում անի, որը չափազանց դժուար է, որովհետեւ տեղեկատուութեան անսահամափակ պակաս կայ այս պահին։ Ամէն գնով պէտք է սառեցնել այն իրավիճակը, որում մենք գտնւում ենք։ Պետք է ձգտի իրական՝ կայուն խաղաղութեան՝ ուժին սպառնալիքի կիրառման վերացմամբ, մեր գերների եւ Արցախի ռազմաքաղաքական ղեկավարութեան վերադարձի իրականացմամբ, խաղաղութեան պայմանագրի շուրջ իրական, խորքային բանակցութիւններ վարելով, ներառեալ՝ արցախցիներիի անվտանգ վերադարձը՝ անվտանգութեան եւ բոլոր իրաւունքների պաշտպանութեան խնդիրների լուծմամբ։ Սահմանազատման եւ սահմանագծման գործընթացը պէտք է մեկնարկի խաղաղութեան պայմանագրի ստորագրումից յետոյ՝ յստակ քարտէզներով։
Երրորդը՝ պէտք է պատրաստի արտահերթ կամ հերթական ընտրութիւններ՝ ազատ եւ թափանցիկ ընտրութիւնների երաշխաւորը լինելով՝ առանց յաւակնելու մասնակցել այդ ընտրութիւններին»,- անցումային կառավարութեան օրակարգը ներկայացրեց Բագրատ Սրբազանը։
Բագրատ սրբազանը նաեւ յայտարարեց, որ Վեհափառ Հայրապետին խնդրել է իր 30-ամեայ հոգեւոր ծառայութիւնը սառեցնել:
Նա նշեց, որ նկատի ունենալով լայն շրջանակների՝ վարչապետի թեկնածու լինելու առնչութեամբ իրեն առաջադրելը, Վեհափառ Հայրապետի եւ հոգեւոր եղբայների հետ քննարկումների արդիւնքում նշուել է, որ իր հոգեւոր հանգամանքի հետ չի կարող համատեղել վարչապետի թեկնածութիւնը։
«Սրբազան վարչապետ»,-վանկարկեց ժողովուրդը։
Ապա Բագրատ սրբազանը կոչ ուղղեց Փաշինեանին․
«Նիկոյ՛լ Փաշինեան, մենք չենք ուզում, որ քո քաղաքական թիմը բաժանուի եւ պառակտուի, մարդուն տրամադրենք մարդու, հային՝ հայի դէմ՝ արդիւնքում քո թիմը եւ նրա իւրաքանչիւր ներկայացուցչի տանելով քաղաքական, արժէքային եւ բարոյական անդառնալի կործանման՝ ներկայ եւ ապագայ սերունդների նզովքին ենթակայ։ Հրաժարական տուր։ Սա վերջին հնարաւորութիւնն է՝ քաղաքակիրթ ճանապարհով հեռանալու եւ քո վերջին հնարաւորութիւնը, որի համար շատ ժամանակ չունես»։
Բագրատ սրբազանը անդրադարձաւ նաեւ իր՝ վարչապետի թեկնածու դառնալու իրաւական գործընթացին։ Նա ասաց, որ ինքը չի թաքցրել եւ ասել է, որ երկքաղաքացիութիւն ունի, իսկ օրէնքը սահմանափակում է երկքաղաքացիներին դառնալ վարչապետ։
«Հետեւաբար, մենք գործելու ենք օրէնքի եւ Սահմանադրութեան պահանջներով եւ իրաւական դաշտում բոլոր հնարաւոր միջոցներով»,-ասաց նա։
Սրբազանը առաջարկեց երթով կառավարական ամառանոց գնալ եւ եթէ այսօր Փաշինեանը չկատարի հրաժարականի պահանջը, վաղուանից ժողովրդի կողմից գործողութիւններ են սկսուելու։
«Այս րոպէից ուզում եմ ասել՝ եթէ մեր պահանջները չիրականանան, վաղը՝ առաւօտեան ժամը 08։00-ից, անհնազանդութեան, բողոքի գործողութիւններով, իւրաքանչիւրիս պատասխանատուութեամբ ստիպելու ենք հաշուի նստել ժողովրդի իշխանութեան պահանջի հետ։
Անհնազանդութեան, բողոքի խաղաղ գործողութիւններով ստիպելու ենք ընդունել ժողովրդի պահանջը։ Աշխատանքից ազատելու ենք այն մարդկանց՝ իրենց ղեկավարով հանդերձ, ովքեր մինչեւ այսօր կեղեքել են մեր մտաւոր ու ֆիզիկական կեանքը»,- յայտարարեց Բագրատ սրբազանը։
