Մարտի 10-ին իրաւապաշտպան կազմակերպութիւնների ներկայացուցիչները հաւաքուել էին Բեռլինի Բրանդէնբուրգի դարպասների մօտ՝ պահանջելու անյապաղ ազատ արձակել Ադրբեջանում ապօրինաբար կալանաւորուած հայ քաղբանտարկեալներին։
«Ձերբակալուածները, այդ թւում՝ Ռուբէն Վարդանեանը, ապրում են անմարդկային պայմաններում՝ խոշտանգումների եւ վատ վերաբերմունքի մասին հաղորդումներով։ Վարդանեանն այս պահին հացադուլի մէջ է, եւ նրա կեանքը մեծ վտանգի տակ է։ Մենք չենք կարող լռել»,- ասել էին ակցիայի մասնակիցները:
Ցուցարարներն ընդգծել են, որ Ադրբեջանի գործողութիւնները խախտում են միջազգային իրաւունքը, այդ թւում՝ ՄԱԿ-ի ցեղասպանութեան կոնուենցիան եւ Մարդու իրաւունքների եւրոպական կոնուենցիան։
Ցուցարարները կոչ են արել Եւրամիութեանը, Գերմանիային եւ Ֆրանսիային իրականացնել հետեւեալ միջոցները.
— Պատժամիջոցներ Ադրբեջանի պաշտօնեաների դէմ. նպատակաուղղուած պատժամիջոցներ այն անձանց եւ հաստատութիւնների նկատմամբ, ովքեր պատասխանատու են հայ բանտարկեալների ապօրինի կալանաւորման եւ կտտանքների համար:
— Բանտէրի պայմանների միջազգային մոնիտորինգ. ճնշում Ադրբեջանի վրայ՝ թոյլ տալու ՄԱԿ-ի Խոշտանգումների դէմ կոմիտեին եւ Միջազգային Կարմիր Խաչին գնահատել բանտարկեալների վերաբերմունքը:
— Անյապաղ ազատ արձակել բոլոր հայ կալանաւորներին. Ադրբեջանից պահանջել կատարել մարդու իրաւունքների պաշտպանութեան միջազգային պարտաւորութիւնները եւ ազատ արձակել քաղբանտարկեալներին առանց նախապայմանների:
— Հայկական մշակութային ժառանգութեան պահպանում. հետաքննել եւ կանխել օկուպացուած Արցախում հայկական մշակութային եւ կրօնական վայրերի յետագայ ոչնչացումը:
— Տեղահանուած հայերի անվտանգ վերադարձի ապահւում. ապահովել միջազգային պաշտպանութեան մեխանիզմները, որոնք թոյլ են տալիս հայերին վերադառնալ իրենց հայրենիք:
Բողոքի բանախօսները դատապարտել են եւրոպական անգործութիւնը եւ Գերմանիայի կանցլեր Օլաֆ Շոլցի կողմից վճռական քայլերի ձախողումը։
Իրաւապաշտպան կազմակերպութիւնների կոալիցիան ծրագրում է ցոյցեր անցկացնել Եւրոպայում եւ պաշտօնական միջնորդութիւն կը ներկայացնի Եւրախորհրդարան՝ կոչ անելով անյապաղ պատժամիջոցներ կիրառել Ադրբեջանի դէմ:
