ՍՏԵՓԱՆԱԿԵՐՏ, 6 յուլիսի, ԱՐՑԱԽՊՐԵՍ
Արցախի Հանրապետութեան ԱԳՆ-ն յայտարարութիւն է տարածել Ադրբեջանի կողմից ռազմատենչ ու ագրեսիւ հռետորաբանութեան ակտիւացման մասին:
«Վերջին շրջանում Ադրբեջանի պետական կառոյցներն ու կառավարութեան կողմից վերահսկուող լրատուամիջոցները լայնածաւալ ապատեղեկատուական արշաւ են սկսել՝ նպատակ ունենալով մոլորեցնել միջազգային հանրութեանը եւ պատրուակ ստեղծել Արցախի Հանրապետութեան եւ նրա ժողովրդի դէմ նոր ագրեսիայի համար։ Արցախի Պաշտպանութեան բանակի մասին յօրինելով եւ առաջ մղելով կեղծ խօսոյթներ՝ Ադրբեջանն, ըստ էութեան, ժխտում է Արցախի ժողովրդի ինքնապաշտպանութեան անքակտելի իրաւունքը եւ ձգտում է նրան զրկել սեփական անվտանգութեան ապահովման բոլոր միջոցներից եւ հնարաւորութիւններից, այն էլ՝ Բաքուի կողմից Արցախի խաղաղ բնակչութեան դէմ մշտական սպառնալիքների եւ ռազմական սադրանքների պայմաններում։
Չնայած այն հանգամանքին, որ Ռուսաստանի Դաշնութեան խաղաղապահ զօրախումբն արցախեան կողմից հրադադարի խախտում երբեք չի արձանագրել՝ պաշտօնական Բաքուն շարունակում է իր դիրքերը գնդակոծելու մասին կեղծ մեղադրանքներ ներկայացնել Արցախի Պաշտպանութեան բանակի հասցէին եւ միեւնոյն ժամանակ սաստկացնել ագրեսիւ ու ռազմատենչ հռետորաբանութիւնը՝ դրանով իսկ տեղեկատուական եւ քարոզչական հող նախապատրաստելով Արցախի Հանրապետութեան դէմ նոր ագրեսիայի համար: Դրա մասին է վկայում նաեւ այն փաստը, որ Ադրբեջանի իշխանութիւնները շարունակում են հետեւողականօրէն մերժել առաջարկները՝ Արցախ, այդ թւում՝ Լաչինի միջանցք ուղարկել միջազգային փաստահաւաք առաքելութիւն, որը կը կարողանայ տեղում գնահատել իրավիճակը եւ միջազգային հանրութեանը ներկայացնել իրականութեան օբյեկտիւ պատկերը:
Արցախի նկատմամբ նման անթաքոյց ռազմաքաղաքական շանտաժը, այդ թւում հրադադարի ռեժիմի շարունակական խախտումները, ռասայական ատելութեան եւ խտրականութեան հրահրումն ու քարոզչութիւնը, հայկական մշակութային ժառանգութեան ոչնչացումը, տրանսպորտային եւ էներգէտիկ ամբողջական շրջափակումը, ինչպէս նաեւ Լաչինի միջանցքում ադրբեջանական հսկիչ անցակէտի ապօրինի տեղադրումն անընդունելի են եւ հանդիսանում են 2020 թուականի նոյեմբերի 9-ի Եռակողմ յայտարարութեամբ Ադրբեջանի ստանձնած պարտաւորութիւնների, ինչպէս նաեւ Արդարադատութեան միջազգային դատարանի 2023 թուականի փետրուարի 22-ի որոշման կոպիտ խախտում։
Ակնյայտ է, որ Ադրբեջանի ագրեսիւ եւ ապակայունացնող գործողութիւնները նպատակ ունեն նաեւ թոյլ չտալ, որ ստեղծուէն պայմաններ հակամարտութեան կարգաւորման խաղաղ գործընթացի եւ կողմերի միջեւ հաւասարութեան ու բարեխղճութեան վրայ հիմնուած կառուցողական երկխօսութեան վերսկսման համար:
Լիակատար անպատժելիութիւնից եւ ամենաթողութիւնից ոգեւորուած՝ Ադրբեջանի իշխանութիւնները հաշուի չէն առնում միջազգային հանրութեան ոչ մի կոչ ու յայտարարութիւն՝ ապակառուցողական գործողութիւնների անթոյլատրելիութեան եւ բոլոր վիճելի հարցերը կառուցողական երկխօսութեան միջոցով լուծելու անհրաժեշտութեան մասին։ Այս առումով անընդունելի ենք համարում, որ միջազգային հանրութիւնը եւ, մասնաւորապէս, Ռուսաստանի Դաշնութիւնը, որի խաղաղապահ զօրախումբը տեղակայուած է Արցախում եւ որի անվտանգութեան երաշխիքների ներքոյ 2020 թուականի պատերազմից յետոյ տասնեակ հազարաւոր արցախցիներ վերադարձել են հայրենիք, առանց պատշաճ ուշադրութեան եւ արձագանքի թողնէն Ադրբեջանի սպառնալիքները:
Այս համատեքստում կրկին ընդգծում ենք, որ միջազգային հանրութեան պատասխանատու անդամները եւ, մասնաւորապէս, խաղաղ գործընթացում ներգրաւուած բոլոր դերակատարները չպէտք է անտեսէն եւ առաւել եւս՝ որոշակի յայտարարութիւններով խրախուսէն Ադրբեջանի կողմից իր միջազգային պարտաւորութիւնների խախտումները, Արցախի ժողովրդի դէմ իրականացուող էթնիկ զտումների քաղաքականութիւնը, որը կարող է վերաճել աւելի լայնածաւալ յանցագործութեան։ Համոզուած ենք, որ միայն Ադրբեջանի գործողութիւնների պատշաճ եւ միանշանակ քաղաքական գնահատականը, ինչպէս նաեւ միջազգային հանրութեան կողմից Ադրբեջանի միջազգայնօրէն հակաիրաւական գործողութիւնների կանխմանն ուղղուած յստակ եւ արդիւնաւետ միջոցների ձեռնարկումը թոյլ կը տան պայմաններ ստեղծել Արցախի ժողովրդի իրաւունքների ու անվտանգութեան ապահովման եւ տարածաշրջանում խաղաղութեան ու կայունութեան հաստատման համար»։
