Մօտալուտ Նոր տարւայ-Նոռուզի տօնի առիթով, սրտանց շնորհաւորում եմ իրանցի մեր հայրենակիցներին մաղթելով, որ սկսւող 1403 տարին լինի խաղաղութեան, սիրոյ, եղբայրութեան, բերրիութեան, նոր նւաճումների, յաջողութեան եւ աստւածային օրհնութեամբ օծուն մի տարի:
Գարնանաբոյր այս օրերին, երբ բնութիւնը նախախնամական տնօրինումով վերանորոգւում է նոր փայլք եւ գեղեցկութիւն պարգեւելով աշխարհին եւ յատկապէս իրանեան մեր հայրենիքին, մենք եւս պարտ ենք մեզ վերանորոգել սիրոյ, եղբայրութեան, հայրենասիրութեան եւ համագործակցութեան ոգիով:
Բոլորս էլ գիտենք, որ նորն ու նորոգութիւնը կեանքից անբաժան երեւոյթներ են: Արդարեւ վերանորոգւած բնութեան նայելիս մենք էլ մեզ վերանորոգենք սիրելի հայրենակիցներ եւ նորոգւած մտքով ու հոգիով կառչած մնանք մեր հայրենիքին եւ հայրենական աւանդութիւններին ու բարեպաշտական սովորութիւններին:
Աղօթում եմ, որ Աստւած զօրացնի եւ փորձանքներից հեռու պահի մեր սիրելի Իրանն ու իրանցիները: Առողջութիւն, առաւել իմաստութիւն շնորհի, երկրի շնորհազարդ հոգեւոր առաջնորդին ու հանրապետութեան նախագահին ու իր կառավարութեան, այլեւ ողջ Իրանի ժդողովուրդը:
Կոչ եմ անում մեր սիրելի հայրենակիցներին, որ աղօթեն Գազայի ժողովրդի համար, մեր տարածաշրջանի խաղաղութեան եւ ժողովրդի բարեկեցութեան համար: Միաստւածեան մեր կրօնների հիմնական եւ առանցքային ուսուցումները խարսխւած են սիրոյ, խաղաղութեան, համերաշխութեան եւ համատեղ գոյակցութեան: Թող 1403 տարին բոլորիս համար լինի Աստծոյ օրհնութեամբ լի մի տարի:
Թող Աստւած անսասան պահի Իրանը իր ժողովրդով:
Շնորհաւոր Նոռուզ:
ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ
