Բռունցքներով, ոտքերով, մահակներով հարուածներ, քաշքշոց բերման ենթարկելու ժամանակ. այս տեսարաններն են արձանագրել եւրոպացի պատգամաւորներն ու եզրակացրել՝ Հայաստանի ոստիկանութեան վերաբերմունքը հաւաքների անցկացման նկատմամբ մտահոգիչ է։
Իրաւապաշտպան Արթուր Սաքունցը նկատում է՝ եւրոպացիները գրել են այն, ինչի մասին իրենք են բարձրաձայնում։
«Թեկուզ մէկ քաղաքացու իրաւունքը խախտուեց, թեկուզ մէկ խոշտանգման կամ բռնութեան դէպք եղաւ, դա արդէն իսկ ինձ համար հիմք է պնդելու, որ համակարգում կայ բարեփոխումներ կամ փոփոխութիւններ կատարելու անհրաժեշտութիւն», — «Ազատութեան» հետ զրոյցում ասաց նա։
Երեկ Եւրոպայի խորհրդի խորհրդարանական վեհաժողովը (ԵԽԽՎ) քուէարկութեամբ ընդունեց «Հայաստանի ստանձնած պարտաւորութիւնների եւ յանձնառութիւնների կատարման մասին» բանաձեւը։ Հեղինակներն ընդգծում են՝ յաւակնոտ բարեփոխումների մասին յայտարարած հայաստանեան ոստիկանութիւնը եթէ նոյնիսկ ուժ է կիրառում, պէտք է այնպէս գործի, որ ցուցարարներին նուազագոյն վնաս հասցնի։
azatutyun.am
