ՀՅԴ Հայաստանի ԳՄ անդամ, ԱԺ «Հայաստան» խմբակցութեան պատգամաւոր Գեղամ Մանուկեանը գրում է. ՀՀ Պաշտպանութեան նախարարութիւնը մամլոյ հաղորդագրութեամբ կոչ է ուղղել լրատուամիջոցներին այն հարցի շուրջ, ինչի մասին խօսում եւ ահազանգում էի օրերս Ազգային ժողովի դահլիճում: Այն անգամ Սուրէն Պապիկեանի հետ թէժ զրոյցի պատճառ դարձաւ, բայց զգուշացումս հէնց սա էր…
Խոսքը վերաբերում է հայկական մամուլում տարբեր երկրներից զինամթերքի, ռազմատեխնիկայի գնումների մասին տարատեսակ, ոչ պաշտօնական լուրերի շատ արագ տարածուելուն:
Արժի որ հայկական լրատուադաշտի մեր գործընկերները ունկնդիր լինէն Պաշտպանութեան նախարարութեանը եւ գործեն համադրուած, միասնական, որովհետեւ դա վերաբերում է մեր երկրի ազգային անվտանգութեանը եւ պետական շահին:
Այնուհանդերձ, մէկ յայտարարութիւնը շատ քիչ է լինելու հարցը կարգաւորելու համար: Առ այդ, կան մի քանի գործողութիւններ, որ պէտք է իրականացնել.
Պաշտպանութեան նախարարութիւնը շատ համադրուած եւ ակտիւ համագործակցի լրատուամիջոցների հետ, ինչը վերջին շրջանում բաւականին յաջող իրականացնում է:
Տարատեսակ ռազմաարդիւնաբերական ձեռնարկութիւնների հետ պայմանագրեր կնքելիլս առաւել նախանձախնդիր լինել, որպէսզի բացառուի որեւէ տեղեկութեան արտահոսքը:
Ցաւօք, այս հարցը դարձել է նաեւ մեր երկրի անվտանգութեան սպառնալիք: Երկրի տեղեկատուական անվտանգութեան համար նաեւ պատասխանատու, ՀՀ բիւջեից միլիարդաւոր դրամներով սնուող «Հանրային կապերի եւ տեղեկատուութեան կենտրոն» ՊՈԱԿ-ը շատ աւելի զբաղուած է ներքաղաքական հարցերով, ֆեյքային գործունեութեամբ, քան երկրի տեղեկատուական անվտանգութեան հարցերով:
