Ֆրանսահայերի հետ հանդիպմանը ՀՀ վարչապետ Նիկոլ Փաշինեանի` ՀՅԴ գաղափախօսութեան մասին յայտարարութիւնները պատահական չէն. նպատակը նոր զիջումների համար հող նախապատրաստելն է։ Sputnik Արմենիայի հետ զրոյցում այս տեսակէտը յայտնեց «Հայաստան» խմբակցութեան պատգամաւոր, ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանը։
Ֆրանսիայի հայ համայնքի հետ հանդիպման ժամանակ վարչապետ Նիկոլ Փաշինեանն ասել է, որ Հայաստանի երրորդ հանրապետութեան հիմնադրման առաջին օրից երկրում եղել է միայն մէկ կուսակցութիւն՝ ՀՅԴ, եւ բոլոր կուսակցութիւնները գործել են Հայ Յեղափոխական Դաշնակցութեան գաղափարախօսութեան ներքոյ։
«Փաշինեանը պէտք է հասկանայ, որ ՀՅԴ նպատակը մշտապէս եղել է Հայաստանը, ՀՀ ինքնիշխանութիւնը, տարածքային ամբողջականութիւնը, եւ դա ամենեւին չպէտք է հակադրութեան մէջ դնել մեր միւս իրաւունքների հետ` կը լինի դա Ցեղասպանութեան միջազգային ճանաչումը կամ Արցախի հայկականութիւնը, որի համար մղուած պայքարը ՀՀ–ի դէմ ուղղուած չէր, ինչպէս փորձում էր այդպէսին դարձնել Նիկոլ Փաշինեանը»,– նշեց Սաղաթելեանը։
Կառաւարութեան ղեկավարի նման յայտարարութիւնները, ըստ նրա, դրդուած են այն կապիտուլեացիայի պայմանագրից, որը Փաշինեանը կոչում է խաղաղութեան պայմանագիր եւ քննարկում Ադրբեջանի նախագահ Իլհամ Ալիեւի հետ։ Սաղաթելեանի կարծիքով` այդ պայմանագրում կայ մի կէտ, որտեղ Փաշինեանն Ալիեւի առաջ պարտաւորւում է, որ կսահմանափակուի բոլոր այն հասարակական–քաղաքական ուժերի գործունէութիւնը, որոնք կարծարծէն վերոնշեալ հարցերը։
«Հետեւաբար Նիկոլ Փաշինեանը հող է նախապատրաստում իր նոր զիջումները հիմնաւորելու համար»,– աւելացրեց ՀՅԴ ներկայացուցիչը։
Նա անդրադարձաւ նաեւ ՀՀ վարչապետի միւս յայտարարութեանը, որ եթէ ի վիճակի լինէինք մեր պատմութիւնից դասէր առնել, գաղափարապէս դաշնակցական չէինք լինի։
«Եթէ պատմութիւնից դասէր քաղեինք, ապա Փաշինեանի նման ապազգային տարրերն իշխանութեան ղեկին չէին յայտնուի, Արցախն այսօր օկուպացուած չէր լինի, թշնամին ՀՀ տարածքում չէր լինի։ Խնդիրը ոչ թէ այն գաղափարախօսութիւնն է, որ մենք դաւանում ենք, այլ խնդիրը Փաշինեանի դաւանած գաղափարախօսութիւնն ու էութիւնն էր, որ մէզ բերեց, հասցրեց այս վիճակին»,– ընդգծեց Սաղաթելեանը։
Դիտարկմանը, որ սփիւռքահայերի հետ Փաշինեանի իւրաքանչիւր հանդիպմանը տարբեր վիճելի հարցերի շուրջ որեւէ մէկը նրան չի հակադարձում, Սաղաթելեանը վստահեցրեց, որ դաշնակցականները այդ հանդիպումներին չէն եղել։ Իսկ ընդհանուր առմամբ, նրա գնահատմամբ, Փաշինեանն այս հանդիպումներով ամէն կերպ փորձում է այն տպաւորութիւնը ստեղծել, թէ իբր նրան դեռ սփիւռքում ընդունողներ կան։
