ՀՀ վարչապետ Նիկոլ Փաշինեանն ու Ադրբեջանի նախագահ Իլհամ Ալիեւն արտգործնախարարներին յանձնարարել են շարունակել խաղաղութեան համաձայնագրի շուրջ բանակցութիւնները՝ հնարաւորինս սեղմ ժամկէտում այն վերջնականացնելու եւ կնքելու նպատակով։ Այս մասին յայտնում է ՀՀ վարչապետի մամուլի ծառայութիւնը։
Հայաստանի եւ Ադրբեջանի ղեկավարներն այսօր հանդիպել են Կազանում ԲՐԻԿՍ–ի 16-րդ գագաթնաժողովի շրջանակում։
Հանդիպմանը մասնակցել են նաեւ փոխուարչապետ Մհեր Գրիգորեանը, Ադրբեջանի փոխուարչապետ Շահին Մուստաֆաեւը, ինչպէս նաեւ Հայաստանի եւ Ադրբեջանի արտգործնախարարներ Արարատ Միրզոյեանն ու Ջեյհուն Բայրամովը:
Հանդիպման ընթացքում քննարկուել են խաղաղութեան օրակարգի առաջմղմանը վերաբերող հարցեր, այդ թւում` խաղաղութեան պայմանագիրը, սահմանազատումն ու սահմանագծումը, փոխադարձ հետաքրքրութիւն ներկայացնող այլ հարցեր։
ԲՐԻԿՍ երկրների գագաթնաժողովը պետութիւնների ղեկավարների մասնակցութեամբ անցկացւում է Կազանում հոկտեմբերի 22-24-ը:
ԲՐԻԿՍ-ը միջպետական միաւորում է, որը ստեղծուել է 2006-ին Ռուսաստանի, Չինաստանի, Հնդկաստանի եւ Բրազիլիայի կողմից, 2011-ին Հարաւային Աֆրիկայի Հանրապետութիւնն է ընդգրկուել կառոյցում:
2024 թուականի սկզբից ԲՐԻԿՍ-ին են միացել նաեւ Եգիպտոսը, Եթովպիան, Իրանը, ԱՄԷ-ն եւ Սաուդեան Արաբիան։
