Մենք ակնկալիք չունենք, որ այս նստացոյցով բոլոր խնդիրները կը լուծուէն, բայց առնուազն հանրային պահանջ ձեւակերպել եւ բողոք արտայայտելու իմաստով դա շատ անհրաժեշտութիւն է այս պահին: Այս մասին NEWS.am-ի հետ զրոյցում ասաց ՀՅԴ Հայաստանի ԳՄ անդամ, ԱԺ Հայաստան խմբակցութեան պատգամաւոր Իշխան Սաղաթելեանը՝ անդրադառնալով վաղը տեցի ունենալիք մէկօրեայ ակցիային: Նշէնք, որ ՀՅԴ Հայաստանի Գերագոյն մարմինը նախաձեռնում է 24 ժամեայ նստացոյց՝ ՀՀ-ում ԱՄՆ-ի, Ռուսաստանի Դաշնութեան, Ֆրանսիայի Հանրապետութեան դեսպանատների եւ ԵՄ ներկայացուցչութեան դիմաց։ նստացոյցի նպատակն է ԵԱՀԿ Մինսկի խմբի համանախագահ երկրներից եւ ԵՄ-ից պահանջել չբաւարարուել լոկ յայտարարութիւններով, այլ գործուն քայլեր ձեռնարկել Ադրբեջանի կողմից Արցախի շրջափակումն անյապաղ վերացնելու ուղղութեամբ։
«Մեր 120 հազար հայրենակիցներ առանց բաւարար սննդի, դեղորայքի կանգնած են էթնիկ զտման եւ ցեղասպանութեան առջեւ, եւ միջազգային հանրութիւնը պարտաւոր է համապատասխան գնահատական տալ եւ քայլեր ձեռնարկել: Սա է մեր նպատակը, որ անտարբեր ու լուռ չհետեւենք, թէ ինչ է տեղի ունենում Արցախում եւ այս խնդիրները բարձրաձայնելու իմաստով մեծապէս կարեւորում եմ, եւ 24 ժամեայ ակցիան ամփոփուելու է ՄԱԿ-ի հայաստանեան գրասենեակի դիմաց»,- ասաց նա:
Հարցին, թէ ինչու այս հարցով կառավարութեանը չէն դիմում, այլ միջազգային հանրութեանը Սաղաթելեանը նշեց, որ այս վիճակը ստեղծուել է օրուայ իշխանութեան վարած քաղաքականութեան պատճառով եւ այդ ուղղութեամբ նոյնպէս քայլեր ձեռնարկուելու են:
«Այս ամէնը նաեւ հետեւանք է Նիկոլ Փաշինեանի վերջին յայտարարութեան, որն ըստ էութեան բանաւոր բաւարարեց Ադրբեջանի ցանկութիւնը եւ յայտարարեց, որ ճանաչում է 86 600 քառ. կմ տարածք նկատի ունենալով Արցախն Ադրբեջանի կազմում: Բոլոր նրանց համար, ովքեր մտածում էին, որ թեկուզ բանաւորն յայտարարութեամբ վերջ կտրուի այս ամէն ինչին, թող յիշէն, որ դրանից յետոյ սկսեցին կրակել Երասխի ուղղութեամբ: Հետեւաբար այս մէն ինչի պատճառը նաեւ ՀՀ կառավարութիւնն է, բայց ամենեւին չի նշանակում, որ միջազգային կառոյցների առաջ բարձրացրած ձայնը ազատում է օրուայ իշխանութիւններին պատասխանատուութիւնից»,- ասաց նա:
Սաղաթելեանն ընդգծում է՝ քանի այս իշխանութիւնները կան աղէտը, դժբախտութիւնը, կորուստը կանգնած է լինելու ժողովրդի գլխին:
Սաղաթելեանը կոչ արեց քաղաքացիներին միանալ ակցիաին, անտարբեր չլինել եւ այսկերպ իրենց աջակցութիւնը ցուցաբերել տոտալ շրջափակման մէջ գտնուող Արցախին:
Մանրամասները տեսանիւթում
