Մեր մաղթանքը, մեր խնդրանքն է մեր Տեր Աստծուն, որպէսզի մեր տղաները տուն վերադառնան, եւ նաեւ շուտափոյթ ազատում թէ Բաքուի բանտերում գտնուող ռազմաքաղաքական մեր ղեկավարութեանը, մեր գերեւարուած տղաներին, թէ Երեւանի բանտերում գտնուող մեր բոլոր զինուորականներին, ովքեր ապօրինի կերպով մինչեւ այսօր գտնւում են կալանքի ներքոյ։ Այս մասին այսօր՝ յունուարի 28-ին, իր կողմից կազմակերպուած ընդունելութեան ժամանակ յայտարարեց «Սրբազան պայքար» շարժման առաջնորդ Բագրատ արքեպիսկոպոս Գալստանեանը:
«Անկախ բոլոր տեսակի խօսակցութիւններից, գնահատականներից, դիտարկումներից, մեր ընթացքը շարունակուելու է, որովհետեւ մենք ուզում ենք դադարեցնել այս պարտութեան ընթացքը, մեր ընթացքը շարունակուելու է, որովհետեւ ուզում ենք վերականգնել մեր տունը, պատիւը, մեր ուրախութիւնը, այնպէս, ինչպէս ապրել ենք։
2025-ին ո’չ պետութիւնը, ո’չ բանակը չպիտի մնան առանց գերագոյն գլխաւոր հրամանատարութեան: Մեր պարտութիւնների շարքը տեղի են ունեցել եւ ունենում են միայն եւ միայն այդ գերագոյն գլխաւոր հրամանատարութեան բացակայութեան պայմաններում։ Եւ, եթէ կուզեք գնահատականն էլ տամ, աեօ, մենք բոլորս այս կամ այն կերպով արդարացի կամ ոչ, հիասթափութիւն, յուսախաբութիւն ունենք այս չորս տարիների ընթացքում արձանագրուած ամենամեծ փաստից, որ մեր ազատագրած երկիրը վերստին նուաճուեց թշնամու կողմից եւ անզօրութեան զգացումով, որ ՀՀ-ում բանակը չկարողացաւ համապատասխան արձագանքը տալ, այնպէս ինչպէս տուել է ժամանակին։
Մեր պարտութիւնը, Արցախի յանձնումը, Արցախի մեր ժողովրդի այսօր այստեղ ներկայ գտնուելը քաղաքական որոշման արդիւնք է, քաղաքական պարտութիւն է»,- յայտարարեց Բագրատ Սրբազանը:
