Կալիֆոռնիայում եւ ի մասնաւորի Լոս Անջելըսի շրջանում հայ համայնքի ստուարացմանը զուգահեռ՝ մեծանում են նաեւ հայութեան հոգեւոր պահանջմունքները։ Յընդառաջ այդ ձգտումների, Արեւմտեան թեմը, Բարեխնամ Առաջնորդ Գերշ. Տ. Յովնան Արք. Տէրտէրեանի առաջնորդութեամբ, վերջին շրջանում ձեռնարկել է տարբեր համայքներում հոգեւոր կեանքի կազմակերպման գործնական քայլեր։ Վերջին օրինակը Նորդ Հոլիվուդում է։
Արեւմտեան թեմի Առաջնորդի Ապրիլ 10-ի որոշումով Նորդ Հոլիվուդի հոգեւոր մատակարար է նշանակուել Արժ. Տէր Նժդեհ Քհնյ. Քեշիշեանը, որ նաեւ Ս. Ղեւոնդեանց Մայր Տաճարի օգնական հովիւն է։ Կարճ ժամանակամիջոցում ձեւաւորուել է համայնքում Առաջնորդ Սրբազանի խորհրդատու մարմին, ձեռնարկուել են առաջին անհրաժեշտ քայլերը, այդ թւում՝ իրազեկելու համայնքի հայորդիներին նոր ծուխի ձեւաւորման մասին, եւ Ապրիլի 25-ին երեկոյեան կայացաւ անդրանիկ՝ իր տեսակի մէջ պատմական հանդիպումը համայնքի բնակիչների եւ Առաջնորդ Սրբազանի եւ հոգեւոր հովիւի հետ։
Bellaire Hall-ում միջոցռմանը Յովնան Արքեպիսկոպոսի եւ Տէր Նժդեհի հետ հանդիպելու էին եկել խորհրդատու մարմնի անդամները, համայնքի բազմաթիւ ու բազմաշերտ բնակիչներ։ Բոլորն իրենց խոսքում թէ՛ հանդիպումից առաջ, թէ՛ ընթացքում նշում էին, որ այս նախաձեռնութիւնը խիստ սպասուած է եւ ճիշտ ժամանակին, քանզի հայ կեանքը մեր եկեղեցու շուրջը կազմակերպելու ձգտումները վաղուց են հասունացել Նորդ Հոլիվուդում։
Հանդիպումը սկսեց հոգեւոր արարողութեամբ։ Այնուհետեւ Տէր Նժդեհ Քհնյ. Քեշիշեանը ներկայացրեց ձեռնարկած առաջին քայլերը, ներկաներին պարզաբանեց ծխական կեանքի կազմակերպման նշանակութիւնն ու ընթացքը՝ յատկապէս կարեւորելով հաւատացեալ հայորդիների ներգրաւուածութիւնը, նախաձեռնողականութիւնը։
Ներկաները հնարաւորութիւն ունեցան ունկնդրելու Արեւմտեան թեմի Առաջնորդ Յովնան Արք. Տէրտէրեանի խօսքը, որ նախ ակնարկ կատարեց ԱՄՆ-ում հայց. Եկեղեցու եւ թեմի հիմնադրումից, որն ունի 125 եւ աւելի տարիների պատմութիւն, իսկ առանձին Արեւմտեան թեմը՝ գրեթէ 100 տարիների։ Այդ ընթացքում ԱՄՆ տեղափոխուուած հայերը, որպէս առաջին քայլ, մշտապէս ի մի են եկել եկեղեցի եւ դպրոց հիմնադրելու համար։ Նման շատ օրինակներ կապուած են անձնապէս Յովնան Սրբազանի հետ, որ բազմաթիւ նոր ծուխեր է հիմնադրել Կանադայի եւ Արեւմտեան թեմերում։ Ընդ որում՝ քայլերը յաճախ սկսկել են փոքր ուժերով, որ յետագայում մերանի նման տուել է իր յստակ արդիւնքը։ Առաջնորդ Սրբազանը խօսեց նաեւ հոգեւոր մատակարարման ու նաեւ երիտասարդաց, կանանց եւ այլ միաւորների ձեւաւորման հարցերի մասին։
Ներկաները հնարաւորութիւն ունեցան իրենց հարցերը ուղղելու Առաջնորդ Սրբազանին, որոնք վերաբերում էին հոգեւոր կեանքի կազմակերպման, եկեղեցու հիմնադրման եւ նման ճշգրտող այլ խնդիրների։ Հարցերից առանձնացրել ենք ի մասնաւորի, սուրբի մասունք ունենալու, Ս. Պատարագը պարզաբանելու, հայց. Հաւատքը այլ միաւորներից զերծ պահելու, համայնքի ձեւաւորման քայլերը լայն իրազակելու թեմաները։ Յովնան Արքեպիսկոպոսի յանձնարարութեամբ բոլոր հարցերը արձանագրուեցին՝ յետագայում աւելի մանրամասն ու հետեւողական պարզաբանելու համար։
Առաջնորդ Սրբազանի հրաւէրով ներկաները ծանօթացան խորհրդատու մարմնի անդամների, ներկայ երիտասարդների հետ։ Սրբազանի խօսքից յետոյ բոլորը հնարաւորութիւն ունեցան ջերմ մթնոլորտում շարունակելու զրոյցները, ծանօթանալու համար ձեռնարկած քայլերին, հոգեւոր հովիւին ու Առաջնորդին։
Հանդիպման ժամանակ շեշտուեց նախաձեռնութիւնները առաւել լայն կերպով իրազեկելու կարեւորութիւնը, որպէսզի համայնքի բնակիչները տեղեակ լինեն նոր ծուխի ձեւաւորման ընթացքին։ Եւ այսու ցանկանում ենք, ինչպէս որ նշեց Առաջնորդ Սրբազանն իր խօսքում, որպէսզի համայնքի բնակիչները հետամուտ լինեն յետագայ ձեռնարկներին մասնակցելու համար, մեր ս. եկեղեցու շուրջը միաւորուելու եւ հոգեւոր, կրթական, մշակութային կեանքը կազմակերպելու համար, «որպէսզի այն ներքնապէս ձեւաւորուի, շնչի եւ կազմակերպուի իր առաքելութեան մէջ»։
Դիւան Առաջնորդարանի
Ապրիլ 26, 2024
