Լիլիան Աւետեան
Հայաստանում ընդդիմադիրները ցոյցեր են կազմակերպել՝ ի պատասխան երկու տղամարդու մահացու հրաձգութեան, սակայն իրաւապահ մարմինները հերքում են, որ այս դէպքում քաղաքական դրդապատճառներ կան:
Յունիսի 19-ին Արագածոտնի մարզի Նիգաւան գիւղում տեղի ունեցած վիճաբանութեան ժամանակ սպանուել են 27-ամեայ Հմայակ Միքայելեանը եւ Տիգրան Յարութիւնեանը։ Ընդդիմադիր քաղաքական կուսակցութիւններն ու ոստիկանութիւնը կրակոցների շարժառիթների վերաբերեալ տարբեր բացատրութիւններ են ներկայացրել։
Հայաստանի քննչական կոմիտէի պաշտօնական հաղորդագրութեան համաձայն՝ կրակոցները տեղի են ունեցել ճանապարհային միջադէպից։
Երեւանի 32-ամեայ բնակիչն ու նրա եղբայրը յունիսի 18-ին Ապարան քաղաքով անցնելիս ճանապարհին վիճաբանութեան են բռնուել մէկ այլ վարորդի հետ, ասւում է ոստիկանութեան հաղորդագրութեան մէջ։ Վիճաբանութեանը խառնուել են տեղի մի խումբ բնակիչներ։ Յաջորդ օրը 32-ամեայ երիտասարդը եւ նրա եղբայրը հանդիպել են բենզալցակայանում վիճաբանութեանը միջամտած տղամարդկանցից մէկին եւ իբր յարձակուել նրա վրայ։ Այդ օրը երեկոյեան խումբը կրկին հանդիպեց Նիգաւանի աղբավայրի մօտ, որտեղ խօսակցութիւնը շարունակուեց «նոյն հարցի» շուրջ։ Պաշտօնեաները նշում են, որ 32-ամեայ տղամարդը կրակել է ինքնաձիգից, ինչի հետեւանքով մահացել է երկու մարդ, իսկ հինգը՝ ծանր վիրաւորուել:
Հրաձգութեան մէջ կասկածուողը ձերբակալուել է, քրէական գործ է յարուցուել սպանութեան եւ ապօրինի զէնք-զինամթերք պահելու մեղադրանքով։
Տեղի ընդդիմադիր լրատուամիջոցները նշում են, որ վիճաբանութիւնը սկսուել է այն բանից յետոյ, երբ ապարանցիները քննադատական արտայայտութիւններ են արել ՀՀ վարչապետ Նիկոլ Փաշինեանի հասցէին։
Politik.am-ը, յղում անելով անանուն աղբիւրներին, յայտնում է, որ կրակոցների մեղաւորներն են «Քաղաքացիական պայմանագիր» կուսակցութեան պատգամաւոր Մաթեւոս Ասատրեանի հարազատները եւ Արագածոտնի փոխմարզպետ Էդգար Փարուանեանի հօրեղբօր որդին։
Այս պնդումները անկախ ստուգումների չեն ենթարկուել։
«Հայաստան» դաշինքը եւ «Պատիւ ունեմ» դաշինքը ՝ երկու ընդդիմադիր խորհրդարանական խմբակցութիւնները , փողոցային ցոյցեր են կազմակերպել մայրաքաղաք Երեւանում՝ մեղադրելով իշխող «Քաղաքացիական պայմանագիր» կուսակցութեանը կրակոցների մէջ:
Երկու ընդդիմադիր կուսակցութիւնների հետեւորդները յունիսի 20-ին հաւաքուել են Ֆրանսիայի հրապարակում եւ երթով շարժուել դէպի ոստիկանութեան բաժին, Ազգային անվտանգութեան ծառայութեան շէնք եւ «Քաղաքացիական պայմանագիր» կուսակցութեան գրասենեակ։ Ցուցարարները ցուցապաստառներ են պահել՝ «Դադարեցրէ՛ք ահաբեկչութեանը», «Կանգնեցէ՛ք մարդասպանին» եւ «Մենք բոլորս նիկոլիզմի զոհ ենք» գրութիւններով։ Նրանք կարմիր ներկ են լցրել «Քաղաքացիական պայմանագիր» կուսակցութեան գրասենեակի մօտ եւ խաղալիք զէնքեր թողել փողոցում։
«Երեկ հերթական արիւնալի միջադէպն է տեղի ունեցել Հայաստանի իշխող իշխանութիւնների մասնակցութեամբ»,- ասուած է «Հայաստան» դաշինքի յայտարարութեան մէջ՝ ժողովրդին հանրահաւաքի հրաւիրելով։ «Այս ամենաթողութեան մթնոլորտի ստեղծման պատասխանատուները պէտք է հեռացուէն»,- շարունակւում է յայտարարութիւնը։
«Պատիւ ունեմ դաշինքի» մաս կազմող Հանրապետական կուսակցութեան փոխնախագահ Արմէն Աշոտեանն ասաց, որ իշխող կուսակցութիւնը բանդայ է դարձել.
«Երեկուայ արիւնալի իրադարձութիւններն ապացուցեցին, որ «Քաղաքացիական պայմանագիր» կուսակցութիւնը վերածուել է բանդայի։ Հայաստանում վարչակարգի փոփոխութիւնից յետոյ պէտք է արգելուի «Քաղաքացիական պայմանագիր» կուսակցութեան գործունէութիւնը, ինչպէս նաեւ նրանց ղեկավարներին պետական պաշտօններ զբաղեցնելը»,- գրել է Աշոտեանը։
«Քաղաքացիական պայմանագիր» կուսակցութեան քարտուղար Արթուր Հովհաննիսեանը հերքեց, որ կրակոցները քաղաքական դրդապատճառներ ունեն։ Նա ասաց, որ «Քաղաքացիական պայմանագիր» կուսակցութեան գրասենեակի մօտ բողոքի ակցիաները «աբսուրդ ժանրի» են։
«Այս երկրում տեղի ունեցող ցանկացած դժբախտ պատահար կապել քաղաքական գործընթացների հետ, առնուազն անբարոյականութիւն է», — լրագրողներին յատնեց Հովհաննիսեանը ։
«Քաղաքացիական պայմանագիր» կուսակցութեան պատգամաւոր Մաթեւոս Ասատրեանը, ով տեղական լրատուամիջոցների տեղեկութիւններով, առնչութիւն ունի մարդասպանի հետ, հերքել է կրակոցների հետ ընտանեկան կապը:
«Մամուլում եւ որոշ անբարոյական քաղաքական գործիչների կողմից արդէն մի քանի ժամ տարածուող լուրերը, թէ ես կամ իմ ընտանիքի անդամները մասնակցել ենք ժամէր առաջ տեղի ունեցած ողբերգական միջադէպին, բացարձակապէս սուտ են եւ իրականութեան հետ կապ չունեն»,- գրել է Ասատրեանը։
«Պարզ է, որ նրանք, ովքեր սպանութիւնը դարձրել են նուիրական համոզմունք, փորձում են մէզ իրենց հետ հաւասարեցնել այս կեղծ հաղորդումներով։ Չի յաջողուի»,- շարունակեց նա:
«Հայաստան» դաշինքը եւ «Պատիւ ունեմ» դաշինքը մէկուկէս ամիս շարունակ ամենօրեայ բողոքի ակցիաներ էին կազմակերպել՝ պահանջելով հեռացնել Փաշինեանին եւ նրա վարչակազմին իշխանութիւնից։ Յունիսի 14-ին ընդդիմադիր շարժումը յայտարարեց, որ փոխելու է իր մարտավարութիւնը։
Բողոքի ցոյցերը սկսուել են ապրիլի 25-ին եւ մեծ թափ են ստացել մայիսի 1-ին, երբ ընդդիմութիւնը վրանային ճամբար է բացել Երեւանի կենտրոնում՝ Ֆրանսիայի հրապարակում։ Շարժումն արձագանքել է Փաշինեանի կոչին՝ « իջեցնել նշաձողը »՝ կապուած Ադրբեջանի հետ խաղաղութեան համաձայնագրի շուրջ բանակցութիւններում Արցախի կարգավիճակի հետ, որը ընդդիմութիւնը ընկալեց որպէս Արցախը Ադրբեջանին զիջելու Փաշինեանի պատրաստակամութիւն։
Յունիսի 15-ին շարժումը ապամոնտաժեց Ֆրանսիայի հրապարակում գտնուող իր վրանային ճամբարը։
«Հայաստան» դաշինքից Ազգային ժողովի փոխնախագահ Իշխան Սաղաթելեանը, որ յայտնուեց որպէս բողոքի ակցիաների առաջնորդ, յունիսի 14-ի ելոյթում ասաց, որ շարժմանը չի յաջողուել գրաւել Փաշինեանի վարչակազմից դժգոհ մարդկանցից շատերին։
«Դեռ կան մարդիկ, ովքեր կարծում են, որ սա պայքար է իշխանութեան համար, նախկին իշխանութիւնների վերադարձի համար»,- ասաց Սաղաթելեանը ։ «Մեզ դեռ չի յաջողուել այդ բոլոր մարդկանց փողոց հանել եւ բերել այս հրապարակ»։
Սաղաթելեանն ասաց, որ ընդդիմադիր պատգամաւորները կը դադարեցնեն իրենց շաբաթներ տեւած խորհրդարանի բոյկոտը` աւելի քիչ յաճախակի հանրահաւաքներ անցկացնելով:
«Նիկոլին անպայման դուրս ենք մղելու, բայց դա անարիւն ենք անելու»,- ասաց նա։
