Հայաստանի եւ Արցախի վերջին իրադարձութիւնների, ՀՀ իշխանութիւնների վարած արտաքին քաղաքականութեան, Արցախի եւ արցախցիների անվտանգութեան երաշխիքների, ինչպէս նաեւ Լիբանանում կայանալիք խորհրդարանական ընտրութիւնների հետ կապուած հարցերով «Վանայ Ձայն» ռադիօկայանը դիմել է ՀՅԴ Բիւրոյի ներկայացուցիչ Յակոբ Տեր-Խաչատուրեանին:
ՀՅԴ Բիւրոյի ներկայացուցիչը անդրադարձ է կատարել հայ-թուրքական յարաբերութիւնների կարգաւորման վերջին փորձերին՝ նշելով, որ մանաւանդ 44-օրեայ պատերազմից յետոյ տարածաշրջանում ակտիւ դերակատարութիւն ստանձնած եւ իր պանթուրքական ծրագրերն առաջ մղող Թուրքիան չէր կարող յարաբերութիւնների կարգաւորման գնալ առանց նախապայմանների, ինչպէս հաւատացնում էին ՀՀ իշխանութիւնները: «Եւ մենք ականատես եղանք, որ արդէն եղածին աւելանում են նոր նախապայմաններ, մասնաւորապէս այսպէս կոչուած Զանգեզուրի միջանցքի պահանջը»,- նշել է Յակոբ Տեր-Խաչատուրեանը:
Խոսելով Արցախի անվտանգութեան ու ստեղծուած իրավիճակում անվտանգութեան յաւելեալ երաշխիքների մասին՝ Յակոբ Տեր-Խաչատուրեանը մտահոգութիւն է յայտնել, որ ՀՀ իշխանութիւնների դրսեւորած վարքագիծը, թէ Արցախի անվտանգութիւնը արցախցիների գործն է, վտանգում է Արցախի ճակատագիրը եւ հաեօց երկրորդ պետականութեան յետագայ կարգավիճակի հարցը:
Ըստ ՀՅԴ Բիւրոյի ներկայացուցչի՝ ռուսական խաղաղապահ ուժերի ներկայութիւնը Արցախում ընդամէնը փխրուն խաղաղութիւն է ապահւում արցախահայութեան համար, ինչը չի կարող նպաստել, որ մարդիկ ամուր կառչած մնան իրենց հողին ու ապրել պարբերաբար յարձակումների ենթարկուող սահմանամերձ բնակավայրերում: «Ճիշտ է, դեռեւս գործում է նաեւ ԵԱՀԿ Մինսկի խումբը, բայց նրա ազդեցութիւնը բաւականին թուլացած է եւ անորոշ յայտարարութիւններից այն կողմ չի անցնում: Ի մասնաւորի բաւականին վտանգաւոր են Հայաստանին ուղղուած յորդորները, թէ Արցախի կարգավիճակի հարցը պէտք է յետաձգել, թողնել աւելի ուշ ժամանակների, երբ կարգաւորուած կը լինէն Հայաստան-Ադրբեջան սահմանազատումներն ու որոշակի վստահութեան մթնոլորտ կստեղծուի երկու ժողովուրդների միջեւ»,- նշել է Յակոբ Տեր-Խաչատուրեանը:
Մանրամասները՝ «Վանայ Ձայն»-ի յատուկ հարցազրոյցում:
