azatutyun.am
Հայաստանի եւ Թուրքիայի միջեւ յարաբերութիւնների կարգաւորման գործընթացի շրջանակում առկայ են շարունակական շփումներ, որոնք դրական դինամիկայ են ապահւում, ասել է ՀՀ ԱԳ նախարար Արարատ Միրզոյեանը Անթալիայի դիւանագիտական ֆորումին մասնակցութեան շրջանակում թուրքական Anadolu լրատուական գործակալութեան տուած հարցազրոյցում:
Մասնաւորապէս, նշել է նախարարը, պայմանաւորուածութիւն է ձեռք բերուել բացել ցամաքային սահմանը երրորդ երկրների քաղաքացիների, ինչպէս նաեւ դիւանագիտական անձնագիր կրողների համար: Միրզոյեանը յայտնել է նաեւ, որ պատմական Անիի կամրջի վերականգնումը եւս քննարկւում է՝ յիշեցնելով, որ որոշ պայմանաւորուածութիւններ են ձեռք բերուել սահմանամերձ շրջաններում ենթակառուցուածքների եւ ճանապարհների կառուցման վերաբերեալ։
«Հայաստանն անկեղծօրէն ցանկանում է, որ պետական սահմանները հնարաւորինս շուտ բացուէն, դիւանագիտական յարաբերութիւններ հաստատուէն եւ ընդլայնուէն երկու ժողովուրդների ու մշակոյթների միջեւ կապերը», — ՀՀ ԱԳՆ լրատուական վարչութեան փոխանցմամբ՝ նշել է Միրզոյեանը:
«Սահմանների բացման առաւելութիւնները ակնյայտ են: Առաջին հերթին սա շատ կարեւոր է մարդկանց համար։ Յարաբերութիւնների զարգացումը, տնտեսական յարաբերութիւնների աճն առաջին հերթին օգուտ կը բերէն մարդկանց, ինչը Հայաստանի քաղաքացիների մեծ մասը գիտակցում է», — ընդգծել է նախարարը:
Անդրադառնալով Հայաստանի եւ Ադրբեջանի միջեւ բանակցային գործընթացին՝ Միրզոյեանը յայտարարել է. — «Ցանկանում եմ օգտագործել այս հնարաւորութիւնը՝ վերահաստատելու մեր յանձնառութիւնը խաղաղութեան օրակարգին: Մենք շարունակում ենք բանակցութիւններն Ադրբեջանի հետ խաղաղութեան համաձայնագրի ստորագրման ուղղութեամբ եւ շարունակում ենք այս գործընթացն ընդհանուր առմամբ Հարաւային Կովկասում կայունութիւնն ու խաղաղութիւնն ամրապնդելու համար»:
Նշելով, որ կողմերի միջեւ խնդիրներից մի քանիսի շուրջ յաջողուել է պայմանաւորուածութիւններ ձեռք բերել՝ Միրզոյեանը շեշտել է, որ երկու կարեւոր հարցերի շուրջ կողմերը տարբեր մօտեցումներ ունեն. — «Այս խնդիրներից առաջինը վերաբերում է երկու երկրների սահմանազատման սկզբունքներին, իսկ միւսը՝ տարածաշրջանային հաղորդակցութիւններին ու փոխկապակցուածութեանը»:
Նախարարը նշել է, որ կողմերն առաջին հերթին պէտք է վերահաստատէն տարածքային ամբողջականութեան փոխադարձ ճանաչումը՝ յաւելելով, որ Հայաստանը պնդում է, որ սահմանազատման գործընթացը պէտք է տեղի ունենայ 1991 թուականին ստորագրուած Ալմայ-Աթայի հռչակագրի համաձայն: Նշելով, որ ոչ ոք նոր սահմաններ գծելու իրաւասութիւն չունի՝ Արարատ Միրզոյեանը յայտնել է, որ Երեւանը ցանկանում է, որ այս հռչակագիրը ներառուի խաղաղութեան պայմանագրի նախագծում։ Արարատ Միրզոյեանը յաւելել է, որ այս հարցում Հայաստանը չի կարողանում դրական արձագանք ստանալ Ադրբեջանից։
Միեւնոյն ժամանակ, տարածաշրջանային հաղորդակցութիւնների վերաբերեալ Արարատ Միրզոյեանը յայտնել է. «Մենք հետաքրքրուած ենք տրանսպորտային կապուղիների բացմամբ: Առաջին հերթին, տարածաշրջանային տրանսպորտային կապուղիների բացումը մէզ համար նոյնպէս շատ կարեւոր է, մէզ համար եւս տնտեսական մեծ օգուտներ է ապահովելու: Հայաստանի կողմից օրակարգ բերուած «Խաղաղութեան խաչմերուկ» ծրագիրը կարեւոր է տնտեսական առումով, ինչպէս նաեւ որպէս տարածաշրջանում կայուն խաղաղութեան երաշխիք»:
«Մենք դէմ ենք, որ Հայաստանի տարածքով անցնող հաղորդակցային ուղիներով ապրանքների եւ մարդկանց անվտանգութիւնն ապահւուի երրորդ երկրների կողմից. տարածաշրջանում տրանսպորտային ուղիները պէտք է լինէն այն երկրի ինքնիշխանութեան եւ իրաւազօրութեան ներքոյ, որտեղ դրանք գտնւում են: Կարեւոր են նաեւ հաւասարութեան եւ փոխադարձութեան սկզբունքները: Գործընթացը պէտք է կառուցուի այդ սկզբունքների հիման վրայ», — ընդգծել է նախարարը՝ յաւելելով, որ նոյն հաւասարութեան սկզբունքը տարածուելու է Ադրբեջանով անցնող տրանսպորտային կապուղիների վրայ, եւ որ այստեղով անցնող ճանապարհների վերաբերեալ նոյն իրաւազօրութիւնը պէտք է պատկանէն Բաքուին։ Միրզոյեանն ընդգծել է, որ թեմայի վերաբերեալ ադրբեջանական կողմը համարժէք արձագանք չի տուել:
Անդրադառնալով այն հարցին, թէ արդյօք Բեռլինում Ադրբեջանի ԱԳ նախարար Ջեյհուն Բայրամովի հետ հանդիպմանը որոշուել է նախարարների առաջիկայ հանդիպման ժամկէտը, Արարատ Միրզոյեանը նշել է, որ առաջիկայ հանդիպման ժամկէտը յայտնի չէ: Նա յայտնել է, որ իրենք մշտական կապի մէջ են Ջեյհուն Բայրամովի հետ, յաւելելով, որ յոյս ունեն շուտով յստակեցնել նոր հանդիպման ժամկէտները։
«Կարծում եմ, որ մեր ժողովուրդները խաղաղութեան կարիք ունեն: Ինչպէս աշխարհի միւս ժողովուրդները, մեր ժողովուրդները եւս արժանի են խաղաղութեան, եւ մէզանից ոչ ոք դատապարտուած չէ մշտական թշնամանքի: Այժմ մենք իսկապէս խաղաղութեան հնարաւորութիւն ունենք», — ասել է նախարարը:
Հայաստանի եւ Եւրամիութեան յարաբերութիւնների սերտացման վերաբերեալ հարցին ի պատասխան՝ Արարատ Միրզոյեանը նշել է, որ Հայաստանը շարունակում է խորացնել յարաբերութիւնները տարբեր ոլորտներում ինչպէս ԵՄ-ի, այնպէս էլ եւրոպական երկրների հետ՝ վկայակոչելով առկայ ինտենսիւ քաղաքական երկխօսութիւնը։
Հայաստանի արտգործնախարարը յայտարարել է, որ Հայաստանը համագործակցում է ԵՄ-ի հետ՝ տնտեսական կայունութիւնը եւ տնտեսական ռեսուրսների դիւերսիֆիկացումն ապահովելու նպատակով:
«Մենք ցանկանում ենք աւելի խորացնել մեր յարաբերութիւնները ԵՄ-ի հետ»,- նշել է Միրզոյեանը՝ մէջբերելով վարչապետ Փաշինեանի հետեւեալ յայտարարութիւնը. — «Հայաստանը պատրաստ է յարաբերութիւնները խորացնել ԵՄ-ի հետ այնքան, որքան Եւրոպական միութիւնը դա հնարաւոր կը համարի»։
