Պաշտպանութեան նախարարութիւնը արձագանքել է Տաւուշի մարզի Կիրանց համայնքում տեղի ունեցող քաղաքական ակցիային զինուորական համազգեստով անձանց միանալու վերաբերեալ համացանցում տարածուած տեսանիւթին:
«ՀՀ պաշտպանութեան նախարարութեան ռազմական ոստիկանութիւնը միջոցներ է ձեռնարկում զինուորական համազգեստով անձանց ինքնութիւնը պարզելու եւ տարածուող տեղեկատուութեանը գնահատական տալու ուղղութեամբ:
Միեւնոյն ժամանակ, ՀՀ պաշտպանութեան նախարարութիւնը զգուշացնում է, որ ՀՀ զինուած ուժերին քաղաքական գործընթացների մէջ ներքաշելու ցանկացած փորձ կարժանանայ համարժէք իրաւական գնահատականի»,- ասուած է ՊՆ հաղորդագրութեան մէջ:
«Գնացել ենք պահի ազդեցութեան տակ եւ զղջում ենք»․ Կիրանցում ցուցարարներին միացած զինծառայողների ուղերձը
Մի խումբ զինծառայողների կողմից զինուորական ծառայութիւնից կամ դրա առանձին պարտականութիւնների կատարումից առերեւոյթ հրաժարուելու դէպքի վերաբերեալ նախաձեռնուել է քրէական վարոյթ։ Կիրանցում ցուցարարներին միացած զինծառայողները ուղերձ են յղել հանրութեանը՝ նշելով, որ ցոյցին միացել են պահի ազդեցութեան տակ եւ զղջում են։ Այս մասին հաղորդում է Քննչական կոմիտէն։
«ՀՀ ՊՆ ռազմական ոստիկանութիւնից ստացուել է հաղորդում այն մասին, որ 2024թ. ապրիլի 26-ին` ժամը 23:30-ի սահմաններում, համացանցում շրջանառուած տեսագրութիւնների ուսումնասիրութիւնից պարզ է դարձել, որ նոյն ժամի սահմաններում ՀՀ պաշտպանութեան նախարարութեան N զօրամասի մի խումբ զինծառայողներ միացել են Տաւուշի մարզի Կիրանց-Ոսկեպար աւտօճանապարհին քաղաքական դրդապատճառներով խմբուած ցուցարարներին՝ յայտարարելով, որ վայր են դրել զէնքերը՝ ի նկատի ունենալով, որ հրաժարւում են կատարել զինուորական ծառայութեան առանձին պարտականութիւնները եւ տուեալ պահից, փաստացի դադարեցնելով դրանց կատարումը, միացել են ցուցարարներին:
Դեպքի առթիւ ՀՀ քննչական կոմիտէի զինուորական քննչական գլխաւոր վարչութեան յատկապէս կարեւոր գործերի քննութեան վարչութիւնում ՀՀ քրէական օրէնսգրքի 529-րդ յօդուածի 2-րդ մասի 1-ին եւ 2-րդ կէտէրի եւ 46-529-րդ յօդուածի 2-րդ մասի 1-ին եւ 2-րդ կէտէրի յատկանիշներով նախաձեռնուած քրէական վարոյթի նախաքննութեամբ պարզուել է, որ 2024թ. ապրիլի 26-ին ՀՀ ՊՆ N զօրամասի զինծառայողներ՝ սպայ Ա.Չ.-ն եւ ենթասպայ Ֆ.Բ.-ն, համացանցից տեղեկանալով Ոսկեպար-Կիրանց աւտօճանապարհին խմբուած ցուցարարների եւ ոստիկանութեան միջեւ տեղի ունեցած միջադէպի մասին, առաջարկել են նոյն զօրամասի զինծառայողներ՝ ենթասպայ Ա.Դ.-ին, շարքային կազմի պայմանագրային զինծառայողներ Ա.Ա.-ին, Ա.Բ.-ին, Գ.Ս.-ին, Ա.Բ.-ին, Կ.Ս.-ին, Է.Մ.-ին, Դ.Զ.-ին, Ս.Մ.-ին, Ա.Գ.-ին. Հ.Ղ.-ին, Ա.Հ.-ին եւ Գ.Թ.-ին մեկնել տուեալ տեղանք՝ տեղում իրավիճակին ծանօթանալու համար, սակայն տեղ հասնելուն պէս՝ անսպասելիօրէն ցուցարարներից ոմանք յայտարարել են, թէ իբր իրենք միացել են նրանց եւ վայր են դրել զէնքերը, իսկ տեղում գտնուող լրագրողները սկսել են նկարահանել իրենց: Հասկանալով, որ տեղում որեւէ արտառոց իրավիճակ չկայ՝ կարճ ժամանակ անց հեռացել են խմբուած ցուցարարների մօտից:
Քրեական վարոյթով կազմուել է քննչական խումբ, իրականացւում են անյետաձգելի քննչական եւ այլ վարութային գործողութիւններ՝ դէպքի հանգամանքները եւ դէպքին առնչութիւն ունեցող անձանց շրջանակը պարզելու նպատակով:
ՀՀ քննչական կոմիտէն յայտարարում է, որ ցուցաբերելու է հետեւողականութիւն եւ զինուորական ծառայութեան կարգի դէմ ուղղուած իւրաքանչիւր յանցագործութեան դէպքով կատարելու է ՀՀ օրէնսդրութեամբ նախատեսուած իր գործառոյթները:
Միաժամանակ յորդորում ենք ՀՀ պաշտպանութեան նախարարութեան պայմանագրային եւ պարտադիր ժամկէտային զինծառայողներին՝ խստօրէն պահպանել ՀՀ օրէնսդրութեան, այդ թւում՝ զինուորական կանոնադրութիւնների պահանջները, բարեխղճօրէն կատարել զինուորական ծառայութեան իրենց պարտականութիւնները, դրսեւորել զսպուածութիւն եւ չտրուել առանձին անձանց սադրանքներին, մանիպուլեատիւ յայտարարութիւններին եւ քաղաքական կոչերին»,- ասւում է Քննչական կոմիտէի հաղորդագրութեան մէջ:
