Կիրօ Մանոյեան․ «Հայաստանի Հանրապետութիւնը համայն հայութեան հայրենիքն է եւ հայ ժողովուրդի բոլոր զաւակները իրաւունք ունին Հայաստանի Հանրապետութեան քաղաքացիներ դառնալու ու վայելելու անոր կողմէ պաշտպանուած ըլլալու իրաւունքը»։
Դամասկահայութեան ցնցութիւնը բազմապատկուեցաւ երկու պատմական առիթներու` Մայիս 28-ի փառաշուք տօնակատարութեան եւ սրահի բացման հանդիսութեան զուգադիպութեամբ։
Նոյն օրը, 27 Մայիս 2022-ի երեկոյեան, գլխաւորութեամբ Բերիոյ Հայոց Թեմի Բարեջան Առաջնորդ Գերշ. Տէր Մասիս Եպս. Զօպուեանի, համալիրի շրջափակէն ներս տեղի ունեցաւ հանդիսաւոր տօնակատարութիւն նուիրուած ՀՀ Անկախութեան կերտման 104-ամեակին։
Հանդիսութեան ներկայ էին նաեւ Բերիոյ Հայոց Թեմի Բարեջան Առաջնորդ Գերշ. Տէր Մասիս Սրբ. Եպս. Զօպուեան, ՀՅԴ Բիւրոյի անդամ եւ Բիւրոյի հայ Դատի եւ քաղաքական գրասենեակի պատասխանատու Կիրօ Մանոյեան, Հալէպէն ազգայիններ Վրէժ Եագուպեան, Յարութ Հայրապետեան, Աւետիս Գաթրճեան եւ Միհրան Վարդապետեան, Ազգ.Վարչութեան ատենապետ Սունպուլ Սունպուլեան, ազգային բարերար Սուրէն Վարդանեան, «Ահարոնեան» պատասխանատու Արմէն Ուրֆալեան, միութիւններու ներկայացուցիչներ եւ հոծ բազմութիւն մը։
Օրուան հանդիսավար Վրէժ Թովմասեան բարի գալուստ մաղթեց ներկաներուն եւ շնորհակալութիւն յայտնեց Սրբազան Հօր հայրական հոգածութեան համար, դիտել տալով որ ան իր ներկայութեամբ առաւել արժեւորեց տօնակատարութիւնը՝ խնդութիւն եւ յոյս ներշնչելով բոլորին։
Ան իր խօսքին մէջ ըսաւ.«Այսօր համախմբուած ենք միասնաբար տօնելու յաղթանակը ՀՀ կերտման 104 -ամեակին, որ իր ստեղծումով ու երկամեայ գոյատեւումով դարձաւ ճակատագրական անկիւնադարձ հայ ժողովուրդին համար։ Հայ ժողովուրդը իր միասնական ու մարտնչող զաւակներուն շնորհիւ մղեց Սարդարապատի, Ղարաքիլիսէի եւ Բաշ Ապարանի հերոսամարտերը, որոնք դարձան որոշիչ ազդակները հայ ժողովուրդի ու երկրի ապագային։
Այսօր նորոգելով մայիսեան յաղթանակի մեր ուխտը, միասնական ճիգով շարունակենք մեր պայքարը, յաղթահարելով մեր առջեւ ծառացած բոլոր մարտահրաւէրները եւ հզօրացնենք մեր հայրենիքը։ Փա՜ռք անկախութեան եւ ազատութեան ճանապարհին վրայ ինկած մեր նահատակներուն»։
«Ահարոնեան» կեդրոնի խօսքը արտասանեց Արմէն Ուրֆալեան։ Ան բարի գալուստ մաղթեց Սրբազան Հօր եւ ներկաներուն ու ըսաւ .«Ինչպէս մեր սրտերը պիտի չտրոփեն ուրախութեամբ, երբ համախմբուած ենք « Զաւարեան» համալիրին մէջ միասնաբար յիշատակելու Մայիս 28-ին տօնը։ Մեր դէմքերուն վրայ կ՚ուրուագծուի ժպիտը ի տես սրահի բացումին եւ դամասկահայութեան յառաջընթացին»։
Ան շնորհակալական խօսք ուղղեց դամասկահայութեան,որ իր լումաներով ու ճակտի քրտինքով կառուցեց այս համալիրը։ Ապա Հայ ժողովուրդի շինարար ոգիին անդրադառնալով ըսաւ.«Մենք շինարար եւ կառուցող ժողովուրդ եղած ենք, քանդուածը շինած ենք։ Դամասկահայութիւնը այս համալիրի վերաշինութենէն ետք կը վայելէ սերունդներու հոգեմտաւոր պատրաստութեան գործընթացին փուլերը։ Այս կառոյցը նիւթական իր արժէքին կողքին, բարոյական արժէք ու դեր ունի եւ պիտի ունենայ։ Այս կը վկայեն ձեր ներկայութիւնն եւ քաջալերանքը»։
Ան անդրադառնալով դպրոցի եւ միութիւններու դերակատարութեան նորահաս սերունդի հայեցի դաստիարակութեան գործին, կոչ ուղղեց ծնողներուն քաջալերելու իրենց զաւակները յաճախելու հայկական վարժարան, ուր կը ստանան հոգեմտաւոր կրթութիւն ու գործեն միութիւններէն ներս՝ ստանալով ազգային դաստիարակութիւն եւ այս երկուքը միաձուլուելով ու ներդաշնակուելով կ’երաշխաւորեն ապագայ երիտասարդ մարդուժի պատրաստութիւնը, որ աննահանջ պիտի շարունակէ մեր երթը։
Ուրֆալեան արաբերէնով երախտագիտութեան խօսք ուղղեց Սուրիոյ վսեմաշուք նախագահ տոքթ.Պաշար ալ- Ասատին, սուրիական քաջարի բանակին եւ յարգանքի ջերմ զգացումներ՝ նահատակներուն։
28 Մայիս պատգամը ուղղեց Հայաստանէն ժամանած ՀՅԴ Բիւրոյի անդամ, Բիւրոյի հայ դատի եւ քաղաքական հարցերու գրասենեակի պատասխանատու Կիրօ Մանոյեան։
Բանախօսը նախ պատմական անդրադարձ կատարեց ՀՀ Ա.անկախութեան կերտման իրադարձութիւններուն, լուսարձակի տակ առնելով ՀՅԴ-ի հիմնարար դերակատարութիւնը ժողովուրդը համախմբելու անկախութեան գաղափարին շուրջ, դիտել տալով, որ եթէ չըլլային 1918-ի մայիսեան այդ պատմական օրերուն հայկական բանակը,որ այդ ժամանակ մեր հայրենիքի տարածքին ամբողջ ժողովուրդն էր, եթէ մեր ժողովուրդը թրքական զօրքերուն Սարդարապատի, Ղարաքիլիսէի եւ Բաշ Ապարանի հերոսամարտերով չյաղթէր, ի՞նչ պիտի ըլլար իր ճակատագիրը։ Այդպիսի դիրքերուն մէջ յաղթելը հրաշքի համազօր արարք մըն էր, սակայն պատահեցաւ հրաշքը ու կարելի եղաւ կասեցնել թշնամիին յառաջխաղացքը։
Ան խօսելով հայ ժողովուրդի սխրանքներուն մասին ըսաւ.« Համաժողովրդային սխրանքը կարելի է վերագրել Ամենայն Հայոց Կաթողիկոսի յորդորին ու կոչին, կարելի է վերագրել Արամ Մանուկեանի կոչին ու կազմակերպական տաղանդին, կարելի է վերագրել զինուորական հրամանատարներուն,բայց եւ նաեւ այս սխրագործութիւնը պէտք է վերագրել ժողովուրդի գիտակցութեան. երբ եկած էր ընտրութեան պահը կեանքի եւ մահուան միջեւ, ժողովուրդը մահուան գնով ընտրեց կեանքը»։
Մանոյեան շարունակեց խօսքը ըսելով. «Հայաստանի Հանրապետութիւնը իր անկախ գոյութեան երկուքուկէս տարուան ընթացքին ահռելի ճիգով եւ հազարաւորներու արեան գնով ամրագրեց ազգային պետականութեան հիմքերը եւ այն սկզբունքները, ըստ որոնց Հայաստանի Հանրապետութիւնը համայն հայութեան հայրենիքն է եւ հայ ժողովուրդի բոլոր զաւակները իրաւունք ունին Հայաստանի Հանրապետութեան քաղաքացիներ դառնալու ու վայելելու անոր կողմէ պաշտպանուած ըլլալու իրաւունքը»։
Ան շեշտը դրաւ հայաստանի հիմնադրութեան ստեղծման, ձեւաւորման եւ պետականութեան վերականգնան ի խնդիր ՀՅ Դաշնակցութեան քաղաքական կամքի եւ ոյժի առկայութեան վրայ ու շեշտեց, որ կարելի չէ տօնախմբել Հայաստանի Հանրապետութեան գոյառումն ու ձեռքբերումները առանց ՀՅ Դաշնակցութեան դերակատարութիւնը գնահատելու։
Բանախօսը ակնարկելով հայաստանի եւ Արցախի ներկայ իրավիճակին եւ մարտահրաւէրներուն յայտնեց, որ ներկայ իշխանութիւնը ոչ միայն իր ապիկար քաղաքականութեամբ այլ ծրագրուած դաւադիր վարքագիծով, Արցախի 44-օրեայ պատերազմէն ետք տակաւին կը շարունակէ կործանարար քայլերու դիմել՝ ոտնահարելով հայրենիքին անվտանգութիւնն ու ժողովուրդին կենսական շահերը, յանձնելով հողային տարածքներ, իսկ այդ հողային կորուստներուն շարանը կրնայ շարունակուիլ իշխանութեան Ատրպէյճանի եւ Թուրքիոյ հետ ստորագրելիք դաւադրական նոր հաձայնագիրներուն հետեւանքով . «Այսօր շատ ծանր է հայաստանի եւ Արցախի հանրապետութիւններուն իրավիճակը։ Թշնամիները նոյնն են՝ Թուրքիան եւ Ատրպէյճանը ու երկուքին հետ տարբեր չափերով մեղսակից այլ պետութիւններ, որոնք բնականաբար կը փորձեն շարժիլ ըստ իրենց ազգային շահերուն։ Այսօրուան հայաստանի իշխանութիւնները եւս մեղսակից են մեր թշնամիներու ծրագիրներու իրականացման գործընթացներուն», ըսաւ Մանոյեան։
Ան իր խօսքը եզրափակեց ըսելով. «Այսօր, սակայն, մեր տօնախմբութիւնը ունի իւրայատուկ խորհուրդ, որ կը կայանայ տօնակատարութեան ճամբով դէպի ազատ անկախ եւ միացեալ հայաստան հասնելու ուխտի վերանորոգման մէջ, յաղթահարելու այսօրուան մեր դիմագրաւած դժուարութիւնները, յարատեւօրէն շարունակելու պայքարը՝ հաւատարիմ մնալով Քրիստափոր Միքայէլեանի պատգամին` յարատեւ կռիւ, մինչեւ յաղթանակ»։
Գեղարուեստական յայտագիրով հանդէս եկաւ Համազգային «Լ.Շանթ» մասնաճիւղի նորակազմ «Աղթամար» երգչախումբը, ազգային երեք երգով, գեղարուեստական ղեկավարութեամբ երաժիշտ Նաթալի Ասպաթիի։ Երգչախումբի անդամներուն ներդաշնակ կատարումը խանդավառեց ներկաները եւ արժանացաւ բոլորին գնահատանքին։
Հուսկ, Սրբազան Հայրը իր սրտի խօսքը ուղղեց ներկաներուն, բարձր գնահատելով ՀՅԴ բիւրոյի անդամ Կիրօ Մանոյանի ներկայութիւնը, որ իր բանախօոսութեամբ առաւել եւս իմաստաւորեց 28 Մայիսի այս տօնակատարութիւնը։
Տէր Մասիս բարձր գնահատեց նորակազմ երգչախումբը, խումբի ղեկավարը, որ բծախնդրութեամբ կատարած է խումբին մարզումը։ Սրբազան Հայրը յաջողութիւն մաղթեց երգչախումբի անդամներուն ու ծնողներուն, որոնք գիտակցութեամբ իրենց զաւակները վստահած են համազգայինին։ Ապա գնահատեց նաեւ ՀՄԸՄ-ի շեփորախումբը, որ միշտ կը խանդավառէ ձեռնարկները՝ իր շուրջ համախմբելով երիտասարդները։
Մայիսեան յաղթանակներուն տօնակատարութիւնը շարունակուեցաւ խանդավառ մթնոլորտի մէջ։ Ազգային յեղափոխական երգերով ելոյթ ունեցաւ Դամասկոսէն Մարտօ Գաթըգլեան, երգեհոնի ընկերակցութեամբ հալէպէն ժամանած Ներսէս Թօփճեանի։
Ազգային եւ հայրենասիրական զգացումներով յախուռն պահեր ապրեցաւ դամասկահայութիւնը՝ յագեցնելով ազգայնաշունչ մթնոլորտի իր ծարաւը։ Ակնյայտ էր մանաւանդ նորահաս սերունդի ազգային առողջ ոգին։ Մեդ երիտասարդները բեմ բարձրանալով իրենց ձայնը միացուցին երգիչին եւ արտայայտեցին իրենց զօրակցութիւնը հայրենիքին, ուխտելով շարունակել 28 Մայիսի երթը մինչեւ յաղթանակ։
Նշենք, որ ՀՅԴ Բիւրոյի անդամ Կիրօ Մանոյեան, ի տես երիտասարդներուն խանդավառութեան ու հայրենասիրութեան սփիւռքի այս հեռաւոր ափերուն վրայ, յուզումնախառն զգացումներով ոտքի կանգնեցաւ ու խոնարհեցաւ դիմացը ներկաներուն, որոնք ազգային գաղափարներով ու շունչով դաստիարակած են իրենց զաւակները։
Տօնակատարութիւնը վերջ գտաւ Սրբազան Հօր «Պահպանիչ» աղօթքով։
«ԱՐՓԻ ՊԵՏԻԿԵԱՆ» ՍՐԱՀԻ ՊԱՇՏՕՆԱԿԱՆ ԲԱՑՈՒՄ ԴԱՄԱՍԿՈՍԻ «ԶԱՒԱՐԵԱՆ» ՀԱՄԱԼԻՐԷՆ ՆԵՐՍ
«Զաւարեան» Համալիրը կը խայտար ու աննախընթաց բերկրանքի եւ ցնծութեան պահ մը կ’ապրէր ի տես իր յարկին տակ դամասկահայութեան համախմբումին։
Արդարեւ, Բերիոյ Հայոց Թեմի Բարեջան Առաջնորդ Գերշ. Տէր Մասիս Եպս. Զօպուեանի բարձր հովանաւորութեամբ եւ կազմակերպութեամբ «Ահարոնեան» կեդրոնի վարչութեան, Ուրբաթ, 27 Մայիս 2022-ի յետմիջօրէին «Զաւարեան» Համալիրէն ներս կատարուեցաւ պաշտօնական բացումն ու անուանակոչութիւնը ճեմարանի ներքնասրահին, որ անուանուեցաւ «Արփի Կարապետ Պետիկեան» սրահ, ի պանծացումն կրթական մշակ, վաստակտաշատ օրդ.Արփի Պետիկեանի յիշատակին։
Ազգ. Միացեալ ճեմարանի շրջափակին մէջ, Բերիոյ Հայոց Թեմի Բարեջան Առաջնորդ Գերշ. Տէր Մասիս Սրբ. Եպս. Զօպուեանն ու անոր ընկերակցող ազգ. պատուիրակութիւնը ջերմապէս դիմաւորուեցան ՀՄԸՄ-ի շեփորախումբին, աշակերտներու, ծնողներու եւ ազգայիններու հոծ բազմութեան կողմէ։
Պատուիրակութեան մաս կը կազմէին Հայաստանէն ժամանած ՀՅԴ Բիւրոյի անդամ եւ Բիւրոյի հայ Դատի եւ քաղաքական հարցերու գրասենեակի պատասխանատու Կիրօ Մանոյեան, Հալէպէն ազգայիններ՝ Վրէժ Եագուպեան, Յարութ Հայրապետեան, Աւետիս Գաթրճեան եւ Միհրան Վաէդապետեան, Ազգ.Վարչութեան ատենապետ Սունպուլ Սունպուլեան, ազգային բարերար Սուրէն Վարդանեան։ Ներկայ էին նաեւ «Ահարոնեան» կեդրոնի պատասխանատու Արմէն Ուրֆալեան, կրթական պատասխանատուներ եւ հիւրեր։
Շեփորախումբը հնչեցուց Սուրիոյ եւ Հայաստանի զոյգ քայլերգները։ Ապա ներկաները ուղղուեցան ներքնասրահ։ Մուտքին հայկական տարազով երկու պարմանուհիներ դիմաւորեցին Սրբազան Հայրն ու հիւրերը, ապա կատարուեցաւ ժապաւէնի հատումն ու սրահի օրհնութիւնը Սրբազան Հօր ձեռամբ։
Ճեմարանի տնօրէնուհի Ծովակ Պաղպուտարեան բարի գալուստ մաղթեց Սրբազան Հօր եւ հիւրերուն ու հակիրճ կերպով անդրադարձաւ օրդ. Արփի Պետիկեանի կենսագրականին, աւելի քան կէս դարու բեղուն վաստակին ու նուիրուածութեան կրթական ոլորտէն ներս ու ըսաւ .«Այսօր, այս սրահին բացումով մեր բոյնը ամբողջացուցած ենք, զայն շիւղ առ շիւղ հաւաքելով ու հին բոյնը յիշելով, երգելով նոր բոյնը շինած ենք։ Սերունդներու սիրելի դաստիարակին՝ օրդ. Արփիին, նիւթական եւ բարոյական ժառանգը այսօր մարմնաւորուեցաւ այս խորանին մէջ, անմահացնելով անոր ծառայութիւնն ու կրթական վաստակը»։ Ապա տեսերիզի ցուցադրութեամբ ներկայացուեցաւ օրդ.Արփի Պետիկեանի կեանքին փուլերը, որպէս Միացեալ վարժարանի հայերէնաւանդ ուսուցչուհի եւ երկար տարիներու տնօրէնուհի, ինչպէս նաեւ գաղութի կողմէ իր վայելած համակրանքն ու գնահատանքը, ստացած պատուոյ շքանշանները եւ վերջապէս սերունդներու հայապահպանման առաքելութեան մէջ իր ունեցած յոյժ կարեւոր ներդրումը։
Գերշ. Տէր Մասիս Սրբ. Եպս. Զօպուեան իր սրտի խօսքը ուղղեց ներկաներուն։ Սրբազան Հայրը իր հայրական օրհնութիւնն ու բարձր գնահատանքը յայտնեց բոլորին, հայապահպանման հզօր կառոյց մը, հայակերտումի դարբնոց մը` Ազգ.Միացեալ ճեմարանը ունենալնուն համար ըսելով. «Բախտաւոր պէտք է զգաք դուք ձեզ, որ Սուրիոյ մայրաքաղաք Դամասկոսի մէջ ունիք նման հսկայ ու հզօր կառոյց մը` Ազգ.Միացեալ ճեմարանը, ուր մեր նոր սերունդի զաւակները կը յաճախեն ստանալով անհրաժեշտ գիտութիւնն ու հայեցի կրթութիւնը, երաշխաւորելով մեր համայնքի ու ազգի ապագան»։
Տէր Մասիս դրուատելով հանգուցեալ օրդ. Արփի Պետիկեանի համակ կեանքի նուիրումն ու զոհողութիւնը կրթական ոլորտէն ներս, վեր առնելով դամասկահայ գաղութին համար անոր տարած հայապահպանման աշխատանքը ըսաւ. «Այսօր իւրաքանչիւրդ հպարտ եւ գօտեպնդուած պէտք է զգաք օրդ.Արփիով, որուն անունով մկրտուեցաւ այս սրահը, որպէսզի անոր յիշատակը միշտ կենդանի մնայ մեզմէ իւրաքանչիւրին եւ մանաւանդ մեր նոր սերունդի զաւակներուն յիշողութեան մէջ»։
Սրբազան Հայրը իր խօսքին մէջ կարեւորութեամբ շեշտեց սփիւռքի մէջ մեր ազգային կառոյցներու եւ կազմակերպութիւններու ազգապահպան առաքելութեան ու դերակատարութեան կեսականութիւնը ըսելով. «Այսօր ձեզմէ իւրաքանչիւրը պէտք է առաւել գօտեպնդուի եւ հպարտանայ մեր ազգային կառոյցներով, որոնք նուիրումով կը գործեն, որպէսզի սփիւռքը, սուրիահայութիւնը շարունակէ իր յաղթական երթը, այն երթը, որուն հիմերը դրին մեր նախահայրերը եւ այս երկիրը ցեղասպանութենէն ետք ծաղկեցուցին»։
Անդրադառնալով վերջին օրերուն Մեծի Տանն Կիլկիոյ Վեհափառ Հայրապետին Տէր Զօր ուխտագնացութեան, Սրբազան Հայրը դիտել տուաւ, որ Տէր Զօրի ցեղասպանութեան յուշահամալիրը կենդանի եւ պերճախօս վկան կը հանդիսանայ հայ ժողովուրդի յարութեան։ Հայը վճռեց յարութեան ապրումով ու շունչով շարունակելու յաղթական երթը, կառուցելու քանդուածը, երբ թշնամին քանդեց հոն, մենք կառուցեցինք հոս, ըսաւ Սրբազան Հայրը։ Ան սրահի բացումը համարեց պատասխան դարաւոր մեր թշնամիին՝ թուրքին, որ իր հզօր ուժերով փորձեց քանդել հայուն կամքը, սակայն հայը իր հաւաքական կամքով ու տեսիլքով վերականգնեցաւ։
Մասիս Եպիսկոպոս բարձր գնահատեց «Ահարոնեան» կեդրոնի տարած հաւաքական աշխատանքը՝ շարունակելու համախմբումը նորահաս սերունդին, երիտասարդութեան ու ժողովուրդին «Զաւարեան» համալիրի նուիրական յարկին տակ։ Ան երախտագիտութեան խօսք ուղղեց Սուրիոյ վսեմաշուք նախագահ տոքթ. Պաշար ալ-Ասատին, անգամ մը եւս հաստատելով, որ սուրիահայութիւնը գիտակցութեամբ, հաւատքով եւ յոյսով պիտի շարունակէ իր ծառայութիւնը Սուրիական Հայրենիքէն ներս։
Սրբան Հայրը իր խօսքը եզրափակեց յարգանքի ու խոնարհումի ջերմ արտայայտութիւններով օրդ.Արփի Պետիկեանի վաստակին եւ անմար յիշատակին:
«Գանձասար»
Հայաստանի Հանրապետութեան անկախութեան 104-րդ ամեակին առիթով, Բերիոյ Հայոց Թեմի Բարեջան Առաջնորդ Գերշ. Տ. Մասիս Սրբ. Եպս. Զօպուեանի տնօրինումով, Թեմի բոլոր եկեղեցիներէն ներս տեղի ունեցաւ Հանրապետական մաղթանք եւ Հայաստանի Հանրապետութեան եռագոյն դրօշի օրհնութիւն:
Առաջնորդ Սրբազան Հայրը նախագահեց Հալէպի Ս. Աստուածածին եկեղեցւոյ Սուրբ եւ Անմահ Պատարագին եւ օրուան պատգամը ուղղեց ժողովուրդին:
Պատարագին ներկայ գտնուեցան Հայաստանի Հանրապետութեան Մարդասիրական Առաքելութեան Խումբի Հիւպատոսութեան ներկայացուցիչ Գնդապետ Արկադի Տօնոյեան, ՀՅԴ Բիւրոյի ներկայացուցիչ Կիրօ Մանոյեան, Մեծի Տանն Կիլիկիոյ Ազգ. Կեդր. Վարչութեան անդամ Հրաչ Յակոբեան, ազգային գործիչ Վրէժ Եագուպեան, ազգայիններ, Ազգ. Վարչութեան անդամներ, Ազգ. Առաջնորդարանի դիւանապետը եւ հաւատացեալ ժողովուրդը:
Օրուան պատարագիչն էր՝ Արժ. Տ. Զարեհ Քհնյ. Շաքարեան: Պատարագի հոգեպարար երգեցողութիւնը կատարեց եկեղեցւոյ դպրաց դասը, ղեկավարութեամբ՝ դպրապետ բարշ. բժ. Սարգիս սրկ. Իսկէնեանի:
Յընթացս Սուրբ եւ Անմահ Պատարագին ընթերցուեցաւ Հանրապետական մաղթանքը եւ Սրբազան Հօր ձեռամբ Հայաստանի Հանրապետութեան եռագոյն դրօշը օրհնուեցաւ: Հայաստանի Հանրապետութեան քայլերգի յոտնկայս երգեցողութեամբ ներկաները պատուեցին եռագոյն դրօշը:
Սրբազան Հօր պատգամին բնաբանը կը կազմէր Պօղոս առաքեալի Գաղատացիներուն գրած նամակի հետեւեալ համարը. «Ամուր պահեցէք այդ ազատութիւնը, եւ վերստին ստրկութեան լուծին տակ մի՛ մտնէք»: Սրբազան Հայրը դիտել տուաւ, որ Քրիստոսի արեամբ ձեռք բերուած ազատութիւնը եւ հոգեւոր փրկութիւնը՝ Աստուծոյ ներկայութեան մէջ ազատօրէն ապրելու հրաւէր է իւրաքանչիւր հաւատացեալի համար: Այլ խօսքով, քրիստոնէական հաւատքը ազատութեան հրաւէր է բոլոր այն ժողովուրդներուն համար, որոնք ստրկութեան լուծին տակ կ’ապրէին: Հայ ժողովուրդը 301-ին ճանչցաւ քրիստոնէական հաւատքը եւ 451-ին վասն հաւատոյ եւ վասն հայրենեայց պատերազմ մղեց եւ պաշտպանեց իր հաւատքը, հայրենիքը, լեզուն եւ մշակոյթը:
Մասիս եպիսկոպոս յայտնեց, որ 28 Մայիս 1918 թուականը մեր պատմութեան կարեւոր հանգրուաններէն մէկը հանդիսացաւ, երբ խաւարէն լոյսին բացուեցանք, մերժեցինք տկարութիւնը եւ հերոսական պայքարով կերտեցինք ՀՀ անկախութիւնը: Ան նշեց, որ Հայաստանի անկախութեան տօնը ամրութեան եւ գիտակցութեան կոչ է Հայաստանի թէ Սփիւռքի մէջ ապրող ողջ հայութեան համար՝ արթուն մնալու եւ մեր արժանապատուութեան համար մնայուն կերպով պայքարելու:
Սրբազան Հայրը գոհաբանական աղօթք բարձրացուց հայրենիքին փառքը հիւսելու եւ փառաբանելու այն բոլոր հերոսները, որոնք իրենց արեամբ անկախութիւնը կերտեցին: Ան աղօթեց, որ ազգովին հաւատարմութեամբ եւ զոհողութեամբ տէր կանգնինք մեր հայրենիքին՝ Ազատ եւ անկախ Հայաստանին եւ Արցախին: «Յաղթանակած Սուրիայէն մեր ձայները կը միացնենք Հայաստանի մեր ժողովուրդին, որ այսօր անգամ մը եւս արդարութիւն կը պահանջէ, կ’աղօթենք անոնց համար եւ ի պահանջեալ hարկին կը պայքարինք հայրենիքի ազատութեան եւ անկախութեան համար», հաստատեց Սրբազան Հայրը:
Մարինա Պօղիկեան «Գանձասար»
