Հայաստանը յայտարարել է, որ նոր գործընկերներ է փնտրում, քանի որ Մոսկւան ձախողել է իր դաշնակցային պարտաւորութիւնները: Այդուհանդերձ, ե՛ւ Փաշինեանը, ե՛ւ իր թիմակիցները յայտարարել են՝ արտաքին քաղաքական վեկտոր փոխելու մտադրութիւն չունեն: Միեւնոյն ժամանակ Հայաստանի վարչապետ Նիկոլ Փաշինեանը նախօրէին յայտարարեց, որ հրաժարւում է մասնակցել Հաւաքական անվտանգութեան պայմանագրի կազմակերպութեան (ՀԱՊԿ) առաջիկայ գագաթնաժողովին: «ԱԼԻՔ»-ի հետ զրոյցում անդրադառնալով այդ որոշմանը, ռազմական փորձագէտ Կարէն Վրթանէսեանն նշեց, որ դժւար է ասել, թէ արդեօք ՀԱՊԿ-ը «անօգուտ կառոյց» կը լինէր Հայաստանի համար, եթէ չլինէին Փաշինեանի հետեւողական եւ ցուցադրական քայլերն ընդդէմ Ռուսաստանի։
Անդրադառնալով պաշտօնական Երեւանի գործողութիւններին, Կարէն Վրթանէսեանը յիշեցրեց, որ Նիկոլ Փաշինեանի եւ իր թիմակիցների իրարամերժ յայտարարութիւնները մեկնաբանելն անշնորհակալ գործ է, սկսած դեռ 2018 թւականի ամառւանից, երբ Փաշինեանի ուղղորդմամբ իշխանութիւնները փորձում էին կալանաւորել ՀԱՊԿ գործող գլխաւոր քարտուղար Իւրի Խաչատուրովին շինծու մեղադրանքներով: Յիշենք նաեւ Փաշինեանի կնոջ ցուցադրական այցը Կիեւ, որտեղ ակնյայտ էր, որ Փաշինեանը հակամարտութիւն է հրահրում Ռուսաստանի հետ։
Արդեօք ռուսական նախաձեռնութիւններից խուսափելը կարող է հետեւանքներ ունենալ Հայաստանի համար հարցին, փորձագէտը պատասխանեց, որ այստեղ ոչ այնքան խուսափելն է, այլ հրապարակային՝ ցուցադրական հակառուսական քայլերն են։
Փորձագէտի խօսքով՝ այնպիսի տպաւորութիւն է, որ Փաշինեանը փորձում է աւելի ուկրաինացի լինել, քան Զելենսկին: Միւս կողմից Ռուսաստանը նշել է, որ հետեւողական քայլեր է ձեռնարկում, որ Երեւանն ու Բաքուն խաղաղութեան պայմանագիր կնքեն, տեղի ունենայ սահմանազատում, բացւեն տրանսպորտային հաղորդակցութիւնները:
Կարէն Վրթանէսեանը նկատեց, որ ըստ 2020 թւականի նոյեմբերի 9-ի եռակողմ յայտարարութեան, որն ըստ էութեան կապիտուլիացիա էր հայկական (ներառեալ արցախեան) կողմի համար, ռուս խաղաղապահները պէտք է 5 կիլոմետր լայնութեամբ անխափան ցամաքային միջանցք ապահովէին Արցախի եւ Հայաստանի Հանրապետութեան միջեւ։
«Շատերը, այդ թւում հէնց Արցախում, վստահ էին, որ ռուսական խաղաղապահ զօրախումբը ոչ միայն կը մնայ մինչեւ 2025 թւականի նոյեմբեր, այլեւ դրանից յետոյ»,- նշեց նա:
Փորձագէտը յիշեցրեց նաեւ, որ քանի-քանի վերլուծաբաններ ու քաղաքական գործիչներ հաւանաբար ծանօթ չլինելով միջազգային խաղաղապահ առաքելութիւնների յաճախ ոչ դրական փորձին, վստահ պնդում էին, թէ խաղաղապահների առկայութիւնն արդէն բաւական է Արցախի հայ բնակչութեան անվտանգութիւնն ապահովելու համար եւ Արցախի Պաշտպանութեան բանակը կարելի է կրճատել։
Հայաստանի Հանրապետութեան անվտանգային միջավայրն այսօր, Կարէն Վրթանէսեանը գնահատում է անբաւարար, այնուամենայնիւ չի տեսնում դրական որեւէ փոփոխութեան հնարաւորութիւն, քանի դեռ Հայաստանում իշխանութեան ղեկին է այն թիմը, որն առաջին հերթին այս աղէտալի անպաշտպանութեան վիճակի գլխաւոր մեղաւորն է։
Սիւնէ Ֆարմանեան
