44-օրեայ պատերազմից յետոյ՝ կապիտուլեացիայի, հազարաւոր զոհերի, կորսուած տարածքների, իսկ աւելի ուշ՝ Արցախում ամիսներ շարունակ շուրջ 120 հազար մարդու գերութեան ու սովամահութեան շեմին գտնուելու փաստն անգամ չխանգարեց Փաշինեանի վարչախմբին բազմաթիւ միջոցառումներ, ճոխ ճամփորդութիւններ ու մեծածախս փառատօններ կազմակերպել։ Yerkir.am-ը փորձել է ճշտել` կառավարութիւնը այս երեք տարիներին պետական բիւջեից որքա՞ն գումար է յատկացրել մշակութային ծրագրերին՝ համերգներին ու փառատօններին։
Կառաւարութեան տրամադրած 2021-ի, 2022-ի եւ նաեւ 2023-ի գրաւոր տեղեկատուութեան ցուցակից բացակայում են Ազգային Բանակի, Անկախութեան կամ Առաջին Հանրապետութեան օրուան նուիրուած միջոցառումները։
2021-ի սեպտեմբերի 21-ին Հանրապետութեան հրապարակում կայացած Հայաստանի Հանրապետութեան անկախութեան 30-ամեակին նուիրուած շքեղ միջոցառման համար, որի կազմակերպումը հանրային լայն քննարկման առիթ էր դարձել, կառավարութիւնը տեղեկացրել էր, որ պետբիւջեից միջոցներ չի յատկացրել։ Իսկ կազմակերպիչ «Դոմինոյ փրոդաքշն» ՍՊԸ-ն յայտարարել էր, որ անհրաժեշտ գումարը ներգրաւել է մասնաւոր հովանաւորներից։ Սակայն այդպէս էլ չպարզուեց, թէ ովքեր կամ ինչ կազմակերպութիւններ են եղել դրանք։
2019-ից ի վեր՝ ՀՀ անկախութեան տօնին կառավարութիւնը կազմակերպում է «Մեր ժամանակների հերոսը» մրցանակաբաշխութիւնը։ 2022-ին, Հայաստանի դէմ սանձազերծուած ագրեսիայի պատճառով՝ կառավարութիւնը յետաձգեց Անկախութեան օրուայ միջոցառումը եւ այն կայացաւ դեկտեմբերի 28-ին։ Իսկ այս տարի, այն չեղարկուեց արցախեան վերջին ողբերգական իրադարձութիւնների պատճառով։ Տրամադրուած տեղեկութեան մէջ այս մրցանակաբաշխութեան անունը նոյնպէս գոյութիւն չունի եւ պարզ չէ, թէ կառավարութիւնը ինչքան գումար է ծախսում այս մրցանակաբաշխութեան համար։ Ըստ ոչ պաշտօնական տեղեկութիւնների, օրինակ՝ 2022-ին կառավարութիւնը 150 մլն դրամից աւել գումար է յատկացրել այս մրցանակաբաշխութեանը։
Հակասահմանադրական բազում քայլերի դիմած ու պետական խորհրդանիշերը վարկաբեկած իշխանութիւնը այս տարի 28 մլն 445 հազար դրամ յատկացրել է Սահմանադրութեան եւ պետական խորհրդանիշերի օրուան նուիրուած տօնական միջոցառմանը, որն անգոյն էր ու չոգեշնչող եւ որին չափազանց քիչ էր մարդկանց մասնակցութիւնը։
2021-ին բաւական կոկիկ գումարով՝ 1 մլն 224 հազար դրամով կառավարութիւնը կազմակերպել էր «Արցախի համն ու հօտը» փառատօնը՝ նպատակ ունենալով ուշադրութիւն հրաւիրել անյապաղ պաշտպանութեան կարիք ունեցող հայկական ոչ նիւթական մշակութային ժառանգութեան՝ արցախեան խոհանոցի, կենցաղի, արհեստների կենսունակութեան պահպանմանը: Արցախից հրաժարուելու քաղաքականութիւնն արտացոլանքը նաեւ մշակոյթի ոլորտում է գտել եւ կառավարութիւնը փաստացի նպատակայարմար չի գտել այդ փառատօնի կազմակերպումը շարունակական դարձնել։
Այս տարուայ միջոցառումների ցանկում ամենածախսատարներից է եղել Հանրային հեռուստաընկերութեան կազմակերպած «Ֆեստիվառ» երաժշտական-զբօսաշրջային փառատօնը, որին պետբիւջեից տրամադրուել է 176 մլն 798 հազար դրամ։
Գործող իշխանութիւնը ինչքան էլ փորձում է ցուցադրական տօնական տրամադրութիւն ստեղծել ու հասարակութեանը հրամցնել «միայն խաղաղութիւն լինի» եւ «կեանքը շարունակւում է» կեղծ արժէքները, մի բան յստակ է՝ օր օրի խորանում է ազգային աղէտը։
Մեղրի Ղուկասեան
ԵՐԿԻՐ
