2 Սեպտեմբերին, ՀՅԴ Հայաստանի Գերագոյն մարմինին կազմակերպութեամբ տեղի պիտի ունենայ «Վերադարձ» խորագիրով ձեռնարկը։ Այս առիթով, ՀՅԴ Գերագոյն Մարմինի ներկայացուցիչ Իշխան Սաղաթէլեան գրած է հետեւեալը.
«1991 թ. Սեպտեմբերի 2ին, Լեռնային Ղարաբաղի մարզային եւ Շահումեանի շրջանի Ժողովրդական պատգամաւորների խորհուրդների համատեղ նստաշրջանը հռչակեց Լեռնային Ղարաբաղի Հանրապետութիւնը, որը վերահաստատուեց ԼՂՀ Գերագոյն խորհրդի առաջին նստաշրջանում ընդունուած Անկախութեան հռչակագրով։
«Հայկական Արցախի լինելիութեան խնդիրը ոչ միայն չի կորցրել իր գոյաբանական նշանակութիւնը, այլեւ համազգային նոր յանձնառութիւնների եւ այս կործանարար ընթացքը կանխելու հրամայականն է թելադրում։
«ՀՅԴ Հայաստանի Գերագոյն մարմնի կազմակերպած՝ «Վերադարձ» խորագրով ձեռնարկը, որը տեղի կ՛ունենայ ս․թ Սեպտեմբերի 2ին, «Հարսնաքար» համալիրում, նպատակ ունի ստեղծուած ծանրագոյն իրավիճակում արժեւորել պատմական օրուայ խորհուրդը, նաեւ ներկայացնել մօտեցումներ եւ առաջարկներ՝ Արցախի հիմնախնդրի մարտահրաւէրների եւ քաղաքական լուծումների, համազգային յանձնառութիւնների եւ Արցախահայութեան անօտարելի իրաւունքների իրացման վերաբերեալ։
«Ձեռնարկին հրաւիրուած են ՀՀ պետական քաղաքական գործիչներ, հոգեւոր եւ հանրային տարբեր շրջանակների ներկայացուցիչներ։
««Վերադարձ» խորագրով ձեռնարկին կը ցուցադրուի Սեպտեմբերի 19ի դէպքերի մասին պատմող փաստագրական ֆիլմ, ինչպէս նաեւ հանդէս կը գան Արցախի պետական մի շարք մշակութային կոլեկտիւներ (կազմեր)»։
