ՀՀ ԱԺ «Հայաստան» խմբակցութեան շնորհաւորական ուղերձը Դաւիթ Իշխանեանին Արցախի Հանրապետութեան Ազգային ժողովի նախագահ ընտրուելու առիթով
Արցախի Հանրապետութեան Ազգային ժողովի նախագահ
մեծարգոյ պարոն Դաւիթ Իշխանեանին
Ողջունում ենք Արցախի եւ ողջ հայ ժողովրդի համար այս ճակատագրական հանգրուանում Արցախի Հանրապետութեան Ազգային ժողովի որոշումը՝ Ձեզ Ազգային ժողովի նախագահ ընտրելու առթիւ։
Արժեւորելով Ձեր անցած մարտական ուղին, Արցախի անկախութեանն ու պետականութեանը անմնացորդ նուիրումը՝ մեր զօրակցութիւնն ու անուէրապահ աջակցութիւնն ենք յայտնում Ձեզ եւ Արցախի ժողովրդին։
Համոզուած ենք, որ Ձեր ընտրութիւնը նոր լիցք կը հաղորդի Հայաստան-Արցախ-Սփիւռք եռամիասնութեան վերականգնման գործին եւ Արցախի ժողովրդի ինքնորոշման իրաւունքի համար մղուող պայքարին։
ՀՀ ԱԺ «Հայաստան» խմբակցութիւն
8 օգոստոսի, 2023 թ․
ք․ Երեւան
ՀՀ ԱԺ «Պատիւ ունեմ» խմբակցութեան յայտարարութիւնը Արցախի Հանրապետութեան Ազգային Ժողովի նախագահ Դաւիթ Իշխանեանի ընտրութեան վերաբերեալ
Ս.թ. օգոստոսի 7-ին Արցախի Հանրապետութեան Ազգային Ժողովի նախագահ է ընտրուել «Մարտական խաչ» 1-ին աստիճանի շքանշանակիր, ՀՅԴ բիւրոյի անդամ Դաւիթ Իշխանեանը։
ՀՀ ԱԺ «Պատիւ ունեմ» խմբակցութիւնը արձանագրում է.
Ադրբեջանի կողմից Արցախի ապօրինի շրջափակման հետեւանքով առաջացած հումանիտար աղէտի յաղթահարումից է կախուած ոչ միայն Արցախի, այլ նաեւ Հայաստանի Հանրապետութեան անվտանգութիւնը
Արցախի Ազգային Ժողովը, լինելով առաջնային մանդատով օժտուած պետական մարմին, մեծ դերակատարում ունի Արցախի առջեւ ծառացած ոչ միայն ներպետական, այլեւ միջազգային մարտահրաւէրների յաղթայարման հարցում
Հայաստանի Հանրապետութեան այսօրուայ կառավարիչների կրաւորական կեցուածքը Արցախի ճակատագրի հարցում հանդիսանում է պետական լծակներին տիրապետող, սակայն մարգինալացուած մի խմբակի կարծիք եւ չի արտացոլում ՀՀ քաղաքացիների մօտեցումները
Արցախի Հանրապետութեան ներքաղաքական դաշտում որոշ գործիչների արկածախնդիր, իսկ առանձին դէպքերում՝ ադրբեջանական շահերից բխող յայտարարութիւնները, ինչպէս նաեւ ստեղծուած իրավիճակը իշխանութեան հասնելու համար օգտագործումը կարող է կասկածի տակ դնել Արցախի Հանրապետութեան գոյութիւնը։
Ելնելով վերոշարադրուածից՝ ՀՀ ԱԺ «Պատիւ ունեմ» խմբակցութիւնը.
Շնորհաւորում է Դաւիթ Իշխանեանին այս բարդ իրավիճակում Արցախի Հանրապետութեան Ազգային Ժողովի նախագահի բարձր եւ պատասխանատու պաշտօնում ընտրուելու կապակցութեամբ
Ողջունում է Արցախի Հանրապետութեան Ազգային Ժողովի, որպէս ընտրուած ներկայացուցչական մարմին, դերակատարման բարձրացմանն ուղղուած քայլերը։ Ստեղծուած իրավիճակում ազգային կարող եւ առողջ ուժերի համախմբումը այլընտրանք չունի
Հաստատակամ է իր տիրապետութեան տակ գտնուող ողջ գործիքակազմով շարունակել ծառայել Արցախի Հանրապետութեան շահերի պաշտպանութեանը՝ չզատելով ու նոյնականացնելով դրանք Հայաստանի Հանրապետութեան շահերին
Վստահ է, որ Արցախի Հանրապետութեան Ազգային Ժողովի նորընտիր նախագահը հետեւողական աշխատանք է տանելու Արցախի ինքնորոշման իրաւունքի իրացման ուղղութեամբ եւ պատրաստ է շարունակել կուսակցական ու խորհրդարանական դիւանագիտութեան խողովակներով նպաստել այդ գործընթացին։
08.08.2023թ.
