«alikonline.ir» — Օրուայ իշխանութիւնը մեր երկրի համար կարեւորագոյն հարցերով 2021-ին հանդէս է եկել մի տեսակէտով եւ հիմա իրականացնում է լրիւ հակառակ քաղաքականութիւնը: Դրանով իսկ իշխանութիւնը յայտնուել է ոչ լեգիտիմութեան դաշտում: Այս մասին իր ֆէյսբուքեան էջում գրել է պատգամաւոր Անդրանիկ Թեւանեանը:
«1. Խոստացուել էր Արցախի ինքնորոշման իրաւունքի հարցի պաշտպանութիւն՝ բացառելով Ադրբեջանի կազմում յայտնուելը: 2022-ի հոկտեմբերի 6-ից սկսած իշխանութիւնը որդեգրել է Արցախն Ադրբեջանինն է քաղաքականութիւնը՝ դրանով իսկ հնարաւորութիւն տալով թշնամուն շրջափակել Արցախը եւ սպառնալ Հայաստանի գոյութեանը:
2. Բացառուել էր Հայաստանի տարածքաների յանձնումը: Հիմա առնուազն չեն բացառում Հայաստանի գիւղերի ու ճանապարհների յանձնում Ադրբեջանին, ինչը վերջինիս ախորժակը բարձրացրել է մինչեւ «Հայաստանն Արեւմտեան Ադրբեջան է» մակարդակի:
3. Խոստացուել է հայ-ռուսական դաշնակցային յարաբերութիւնների զարգացում, սակայն վարւում է ճիշտ հակառակ քաղաքականութիւն, ինչը լրջագոյն սպառնալիք է մեր անվտանգութեանը:
Ահա այս երեք ռազմավարական հարցերում տեղի է ունեցել մեծ խաբէութիւն (միւս մանր ու միջին ստերը դեռ մի կողմ դրած): Սա նշանակում է, որ ունենք ոչ լեգիտիմ իշխանութիւն, որն ապօրինաբար հանդէս է գալիս ժողովրդի ու պետութեան անունից: Սրա քաղաքական կապիտալիզացիան պէտք է դրսեւորւի իշխանափոխութեան ձեւով:
Որքան էլ որ առաջին հայեացքից պարզունակ թուայ, իշխանափոխութեան աղբիւրը պէտք է լինի ժողովուրդն իր հաւաքական կամքով: Զուտ վերնախաւային գործընթացով հնարաւոր չէ լուծել ոչ լեգիտիմութեան խնդիրը: Ուստի՝ պէտք է գնալ տնից տուն, բակից բակ, շփուել հանրութեան տարբեր շերտերի հետ, բացատրել իրականութիւնը, լսել մարդկանց կարծիքները՝ այն յստակ գիտակցութեամբ, որ նոր իշխանութեան լեգիտիմութիւնը պէտք է ստանալ ժողովրդից: «Մայր Հայաստան» շարժումն առաջնորդւում է այդ սկզբունքով ու աշխատում է այդ տրամաբանութեամբ»,- գրել է Թեւանեանը
