ՎԱՇԻՆԳՏՈՆ, ԱՄՆ
Նախորդ շաբաթ Կապիտոլի քարոզչութեան օրերի ընթացքում Ամերիկայի Հայ Դատի Յանձնախումբը յայտարարութեամբ ողջունեց Գեւ Իսկաջեանի մուտքը որպէս իր զանգուածային կազմակերպման տնօրէն ազգային մակարդակում: Ամերիկայի Հայ Դատի Յանձնախումբը Իսկաջեանի միանալն բացատրեց որպէս իր շարունակական յանձնառութեան մաս՝ մի կողմից ընդլայնելու համար Ամերիկայի հայութեան մասնակցութիւնը դաշնային, նահանգային եւ տեղական քաղաքականութեան մշակմանը եւ միւս կոշմից կոալիցիաներ ստեղծելով առաջ մղել Արցախամէտ, Հայաստանեան եւ համայնքային առաջնահերթութիւնները:
«Մենք ոգեւորուած ենք ողջունելու Գեւ Իսկաջեանին՝ ղեկավարելու մեր զանգուածային կազմակերպման զարգացման ջանքերը, քանի որ մենք սկսում ենք նոր համարձակ ճանապարհորդութիւն՝ ամրապնդելու մեր տեղական համայնքները եւ ուժեղացնելու Ամերիկայի հայութեան ձայնը Միացեալ Նահանգներում», — ասաց Ամերիկայի Հայ Դատի Յանձնախմբ-ի(ԱՀԴՅ) նախագահ Րաֆֆի Համբարեանը: «Գևի ղեկավարութեամբ, սերտօրէն համագործակցելով մեր տարածաշրջանային եւ տեղական մասնաճիւղերի հետ, մենք առաջ ենք շարժւում՝ միաւորուած մեր ժողովրդին հզօրացնելու եւ մեր ընդհանուր գործը առաջ տանելու մեր յանձնառութեան մէջ: Միասին մենք կը կառուցենք նոր եւ աւելի ամուր կամուրջներ, կբարձրացնենք ձայները եւ կապահովենք, որ մեր ներկայութիւնը արձագանքի ամբողջ երկրի մակարդակում ընտրուած պաշտօնեաներին»,- յաւելեց ԱՄՆ Հայ Դատի նախագահը:
Գեւ Իսկաջեանը վերջին երկու տարին անցկացրել է Արցախում՝ ծառայելով որպէս Հայ Դատի Արցախի գործադիր տնօրէն՝ աշխատելով արտերկրում դիւանագիտական ջանքերի վրայ, լոյս սփռելով Արցախի ժողովրդի ծանր վիճակի վրայ եւ օգնելով հայրենիքում օգնութեան ջանքերին: Իսկաջեանը նախկինում աշխատել է Հայ Դատի Արեւմտեան շրջանի վարչութիւնում, նախագահել է Արեւմտեան Ամերիկայի Հայ Երիտասարդաց Դաշնակցութիւնը (AYF) եւ եղել է ՀԵԴ-ի «Հայդուկ» ամսագրի խմբագիր: Որպէս All-ASA հայ ուսանողական խորհրդի անդամ 2016 թուականին Իսկաջեանն օգնեց գլխաւորել «Divest Turkey» նախաձեռնութիւնը: Հայոց ցեղասպանութեան 100-րդ տարելիցին Իսկաջեանը եղել է Ցեղասպանութեան 100 Ամեակի ոգեկոչման յանձնաժողովի գործադիր տնօրէն, որը համախմբել է աւելի քան 100,000 ամերիկահայերի «Արդարութեան երթին» մասնակցելով: Իսկաջեանը նաեւ գրել է բազմաթիւ հրատարակութիւնների համար, այդ թւում՝ Time Magazine եւ Newsweek, եւ ցուցադրուել է այնպիսի լրատուամիջոցների կողմից, ինչպիսիք են CNN-ը, BBC-ն, Politico-ն եւ LA Times-ը: Նա յաճախել է Քալ Փոլի համալսարան – Փոմոնա, Քալիֆորնիա որտեղ սովորել է Քաղաքագիտութիւն եւ Փիլիսոփայութիւն:
«Ամերիկայի Հայ Դատի Յանձնախմբի եւ նրա պատմական ժառանգութեան մաս լինելը եւ՛ պատիւ է, եւ՛ արտօնութիւն: Երբ մենք անցնում ենք հայ ազգի համար դժուար ժամանակներ, մեր աշխատանքն ու հայութեան իրաւունքների պաշտպանութիւնը աւելի քան երբեւէ կենսական են դառնում: Մենք ոչ միայն կ’աշխատենք պահպանել եւ ամրապնդել մեր ունեցած համայնքներն ու մասնաճիւղերը Միացեալ Նահանգներում, այլ նաեւ ընդլայնելու ենք մեր հասանելիութիւնն ու ազդեցութիւնը, խթանելով նոր համայնքները, ոգեշնչելով նոր պաշտպաններ եւ նոր մասնաճիւղեր բացելով ամբողջ երկրում»:
Իսկաջեանը սերտօրէն կաշխատի Հայ Դատի Յանձնախմբի մասնաճիւղերի, փաստաբանների եւ ԱՄՆում հայամէտ դաշնակիցների հետ՝ առաջ մղելով ՀԴՅ դաշնային քաղաքականութեան առաջնահերթութիւնները եւ ուսումնասիրելով նոր նախաձեռնութիւնները նահանգային եւ տեղական մակարդակներում: Առաջիկայ ամիսները նա կը տրամադրի երկրի համայնքից համայնք անցնելով ելոյթներ եւ հանդիպումներ ունենալուն տեղական մասնաճիւղերի, կազմակերպութիւնների եւ երիտասարդական խմբերի հետ՝ լաւագոյնս օգտագործելու Հայ Դատի համազգային ցանցը՝ ընդլայնելու հայ-ամերիկեան քաղաքացիական մասնակցութիւնը:
