Ամրապնդել ՌԴ-ի հետ ռազմավարական դաշնակցային յարաբերութիւնները, Իրանի հետ կնքել ռազմաքաղաքական դաշինք. Ռուստամեան
Աշխարհաքաղաքական ներկայ զարգացումների խորապատկերի վրայ Հայաստանի շուրջ ձեւաւորուող անվտանգային սպառնալիքները օրէցօր դառնում են առաւել անմիջական եւ խիստ վտանգաւոր։ Այս մասին ԱԺ-ում յայտարարութիւնների ժամին իր ելոյթում նշեց ՀՅԴ Բիւրոյի քաղաքական ներկայացուցիչ, «Հայաստան» խմբակցութեան պատգամաւոր Արմէն Ռուստամեանը:
Նա, մասնաւորապէս, նշեց. «Ադրբեջանի ղեկավարութեան հայատեաց ռազմաշունչ եւ ծաւալապաշտական յայտարարութիւններն ու քայլերը աւելի ու աւելի սանձարձակ բովանդակութիւն են ստանում եւ վերածւում վերջնագրերի։ Հայաստանի իշխանութիւններն իրենց հերթին ահաբեկելով սեփական ժողովրդին վերահաս պատերազմի հնարաւորութեամբ եւ այդ պատերազմում անխուսափելի պարտութեամբ, լծուել են թուրք-ադրբեջանական տանդէմի անվերջանալի պահանջները հիմնաւորելու եւ բաւարարելու ազգակործան գործին։
Հայ ժողովրդի եւ նրա ազգային ուժերի պատմական առաքելութիւնն է ազատուել «կապիտուլեացիա, թէ պատերազմ» այս կործանարար երկընտրանքից եւ հաստատել իրական, անշրջելի եւ արդար խաղաղութիւն։
Յետագայ անդառնալի կորուստներից խուսափելու եւ Հայաստանի դիմագրաւուած գոյութնական մարտահրաւէրները յաղթահարելու նպատակով անհրաժեշտ է բեկում մտցնել ստեղծուած իրավիճակի մէջ, ձեւաւորելով նոր որակի իշխանութիւն եւ հաստատելով երկրի զարգացման ազգային պետական ուղեգիծ:
Հրատապ անհրաժեշտութիւն է ամրապնդել եւ արմատապէս փոխել կառավարութեան քաղաքականութիւնը հետեւեալ երեք առաջնահերթ ուղղութիւններով.
Հայկական ինքնութեան եւ հաեօց պետականութեան պահպանման օրակարգի շուրջ համահայկական ազատորդաշարժի իրականացում.
Հայոց ցեղասպանութեան վերաբերեալ թուրքական ժխտողականութեանը նպաստելը, Արցախի ժողովրդի էթնիկ զտումները եւ հայրենազրկումը անհետեւանք թողնելը գոյութենական սպառնալիք է հայկական ինքնութեանը, Հայաստանի ինքնիշխանութեանը եւ վաւերացնում է ուժի դիրքերից հարցեր լուծելու նախադէպը։
Պաշտպանութեան գործում համաժողովրդական մասնակցութիւն ապահովելու տրամաբանութեամբ համահայկական առաջնահերթ որակալ դարձնել բանակի եւ պաշտպանութեան անվտանգութեան համակարգերի հրատապ վերակառուցումը առկայ մարտահրաւէրների հաշուառմամբ։
Որդեգրել անվտանգային նոր ճարտարապետութեան ձեւաւորմանը եւ դիւանագիտական դիրքերի վերականգնմանը միտուած որակապէս այլ բովանդակութիւն ունեցող արտաքին քաղաքականութիւն, ինչը ենթադրում է ռազմավարական յարաբերութիւնների հաստատում ընդհանուր աշխարհաքաղաքական նպատակներ հետապնդող երկրների ու դաշինքների հետ, որոնց անմիջական շահերից է բխում հայկական կենսունակ պետութեան գոյութիւնը։
Այս մօտեցումը ամրապնդել Ռուսաստանի հետ ռազմավարական դաշնակցային յարաբերութիւնները, Իրանի հետ կնքել ռազմաքաղաքական դաշինք, զարգացնել տարածաշրջանից դուրս այլ ուժային կենտրոնների եւ Արեւմուտքի հետ փոխլրացնող յարաբերութիւններ։
Կոչ ենք անում ազգային բոլոր ուժերին միաւորել իրենց ժամքերը այս օրակարգի շուրջ։ Դաշնակցութիւնը պատրաստակամ է համագործակցել բոլորի հետ, որոնք կիսում են այս մօտեցումները եւ պատրաստ են պայքարել հանուն արժանապատիւ եւ անվտանգ Հայաստանի ու Արցախի»:
