Այս շաբաթ հրապարակուած երկու զեկոյցներն ահազանգում են՝ ԱՄՆ նախագահական ընտրութիւնները խափանելուն ուղղուած ջանքերն աճել են։ Նշուած է՝ աւելացել են տեղեկատուական մանիպուլեացիաները, բռնութեան կոչերը եւ առցանց ահաբեկումները:
ԱՄՆ ընտրողներն աւելի յաճախ են յայտնւում այն դերակատարների թիրախում, որոնք կեղծ տեղեկութիւններ են տարածում առաջիկայ նախագահական ընտրութիւնների վերբերեալ: Այս մասին ասուած է Freedom House իրաւապաշտպան կազմակերպութեան զեկոյցում:
Կազմակերպութեան աւագ վերլուծաբան Կիան Վեստեյնսոնը նշում է.
«Միացեալ Նահանգներում մարդիկ դաւադրապաշտական տեսութիւններ եւ ապակողմնորոշող տեղեկատուութիւն են տարածում քաղաքականութեան վերաբերեալ: Հանրապետականներին հարող ընտրողների մօտ 70%-ը ուշադրութիւն է դարձրել 2020 թուականի նախագահական ընտրութիւնների արդիւնքների մասին դաւադրապաշտական տեսութիւններին, թէ իբր այդ արդիւնքները կեղծ են»:
Յետազոտողի խօսքով՝ աճում են նաեւ ընտրական պաշտօնեաների նկատմամբ առցանց ահաբեկման եւ ոտնձգութիւնների դէպքերը:
«Նկատել ենք, որ թեկնածուներն ուղղակի յարձակումների են ենթարկւում։ Այստեղ, իհարկէ, պէտք է խօսել նախկին նախագահ Թրամփի դէմ իրականացուած մահափորձի մասին։ Աճում են նաեւ ատելութեան հիմքով յանցագործութիւնները»,- ասում է նա:
Թեեւ քուէարկութեան համակարգը պաշտպանուած է, սակայն կիբեռյարձակումները տակաւին մտահոգիչ են՝ ընդգծում է Վեստեյնսոնը:
ԱՄՆ Յետաքննութիւնների դաշնային բիւրոն ներկայում քննում է Թրամփի եւ Բայդէն-Հարիսի նախընտրական թիմերի դէմ ուղղուած ենթադրեալ իրանական հաքերային յարձակումները:
Կիբեռանվտանգութեան գծով Recorded Future ընկերութեան հաղորդում է Իրանի, Ռուսաստանի եւ Չինաստանի կողմից իրականացուած կիբեռգրոհների եւ ապատեղեկատուական արշաւների աճի մասին՝ արհեստական բանականութեան օգտագործմամբ, որի միջոցով պատրաստւում են կեղծ լուրեր:
Recorded Future-ի ներկայացուցիչ Շոն Մինորն ասում է․ «Ներկայացւում է կողմնակալ բովանդակութիւն՝ հիմնուած համապատասխան կառավարութեան աշխարհաքաղաքական նպատակների վրայ»:
Թէ որքանով են արդիւնաւետ այդ ջանքերը, Մինորը նշել է․ «Այս պահին չունենք տուեալներ՝ եզրակացնելու, որ այդ գործողութիւններն, իրականում, ազդել են ընտրութիւնների արդիւնքների վրայ»:
https://www.amerikayidzayn.com/a/7744998.html
VOA
