Լոյս է տեսել ՀՅԴ պաշտօնաթերթ «Դրօշակ»ի 2023 թ․ եօթերորդ համարը
Այսօրուանից ընթերցողին է ներկայացւում «Դրօշակի» 2023 թ․յուլիսի համարը։ Հրապարակուող նիւթերի ցանկում գերակշռում է Հայաստան-Արցախի թեման՝ տարածաշրջանային եւ աշխարհաքաղաքական գործընթացների խորապատկերի վրայ։
Լուսինէ Մխիթարեանը քննութեան է ենթարկում «Սիւնիքը աշխարհաքաղաքական հետաքրքրութիւնների կիզակէտում» հիմնահարցը, մասնաւորապէս անդրադառնալով, այսպէս կոչուած, Զանգեզուրի միջանցքի ծրագրին՝ թուրք-ադրբեջանական տանդէմի համար։ Հեղինակը փաստէրի շարադրմամբ բացայայտում է Սիւնիք ներթափանցելու ճանապարհով Հայաստանում շօշափելի լծակներ ձեռք բերելու թշնամի պետութիւնների նախագծերը։
Սարգիս Սարգսեանը քննում է նախկին խորհրդային հանրապետութիւնների նկատմամբ Ռուսաստանում ձեւաւորուող նոր քաղաքականութեան խնդիրը եւ այդ ծիրում Հայաստան-Ռուսաստան փոխյարաբերութիւնների, ինչպէս եւ Արցախի հարցի նկատմամբ Ռուսաստանի ներկայ քաղաքականութեան առանձնայատկութիւնները։
Արցախից Տաթեւիկ Աղաջանեանը ներկայացնում է հայկական երկրորդ հանրապետութիւնում ներկայումս ստեղծուած տագնապալի սոցիալ-տնտեսական վիճակը, արցախահայութեան դիմագրաւած ներքին ու արտաքին քաղաքական մարտահրաւէրները։
Պատմաբան Արարատ Յակոբեանը անդրադառնում է 19-րդ դարի հայ հասարակական-քաղաքական մտքի նշանաւոր ներկայացուցիչ Ստեփանոս Նազարեանցի կողմից իր խմբագրած «Հիւսիսափայլ» թերթում արծարծուած քաղաքական թե՞ կրօնական անկախութիւն երկընտրանքային հարցին։
Աւոյ Գաթրճեանը այս անգամ ներկայացնում է դարասկզբի ազգային-յեղափոխական պայքարի գործչի, «Նեմեսիս» գործողութեան ամենախորհրդաւոր անդամի՝ Հրաչ Փափազեանի ապրած ազգանուէր ու վաստակաշատ կեանքին։ Հայաստանում քիչ ծանօթ այս անունը արժանի է համընդհանուր ճանաչման եւ յարգանքի։ Աւոյ Գաթրճեանի այս յօդուածը յուսանք կնպաստի այդ ճանաչմանը։ «Դրօշակի» սոյն թուականի 8-րդ համարում ներկայացուած են հետաքրքրական այլ յօդուածներ եւս։
