Պաշտպանութեան նախարարութիւնը դարձել է «պարտիզան» եւ որեւէ կերպ արդէն մի քանի ամիս չի կարողանում արձագանգել Հայոց Բանակն արատաւորող փաշինեանական աղմկարայարոյց յայտարարութիւններին։ Կամ չգիտի ինչ ասի, կամ էլ պարզապէս չի ցանկանում իրականութիւնն արձանագրելով յայտարարել, որ Փաշինեանն անպատասխանատու սուտասան է։ Այս մասին իր «Ֆէյսբուք»-եան էջում գրել է ՀՅԴ Հայաստանի ԳՄ անդամ, ՀՀ ԱԺ «Հայաստան» խմբակցութեան պատգամաւոր Գեղամ Մանուկեանը։
«Այս մասին բարձրաձայնել էի դեռ նախորդ տարի։ 2023-ի դեկտեմբերի 4-ին Պաշտպանութեան նախարար Սուրէն Պապիկեանին գրաւոր հարցում էի ուղարկել, որ պարզեմ, թէ 2023 թւականի նոյեմբերի 24-ի մամուլի ասուլիսում Փաշինեանի յայտարարութիւնը, թէ «այսօր բանակում ազատւել ենք 5-րդ շարասիւնից», ինչպէս է արտայայտւել ՀՀ Զինւած ուժերում։
Պապիկեանին ուղղել էի ընդհանուր վեց հարց։ Դրանց պատասխանելու համար օրէնքով նախատեսւած 5 օրւայ փոխարէն Պապիկեանից պահանջւել էր քսան օր, իսկ արդիւնքում ստացել էի մէկ նախադասութեամբ պատասխան՝ «ՀՀ պաշտպանութեան նախարարութիւնն այլ պարզաբանումներ, քան տրւել է ՀՀ վարչապետի կողմից՝ չունի»:
Ուշագրաւ է, որ գլխաւոր դատախազութիւնը նոյն «5-րդ շարասեան» մասին հարցմանս, թէ Փաշինեանի նշած այլ պետութիւնների շահերին ծառայելու, ասել է թէ՝ լրտեսութեան յօդւածով քանի քրէական գործ է յարուցւել 2021-2023 թւականներին, աւելի յստակ էր պատասխանել՝ ընդամէնը մէկ քրէական գործ է յարուցւել։ Ընդամէնը ՄԷԿ քրէական գործ…. Եւ դեռ պէտք է ապացուցւի….
ՊՆ-ի դէպքում յամառեցի. կրկին գրաւոր հարցում ուղարկեցի՝ յիշեցնելով, որ ՀՀ օրէնսդրութեան համաձայն Պապիկեանը ՊԱՐՏԱՒՈՐ է հարցերիս առանձնաբար պատասխանել, կէտ առ կէտ։ Էլի նախարարութիւնը տեւական ժամանակ պապանձւել էր, անցնում էին օրերը, իսկ պատասխան չէին կարողանում գտնել։
Միայն յունւարի կէսին ստացայ կրկնակի հարցման պատասխան-ծաղրանկար: Այս անգամ էլ Պապիկեանն իր առաջին պատասխանի բառերը յետ ու առաջ էր արել ու կրկին լեզուն կծել։ Պատասխանել է, թէ «Փաշինեանի պատասխանից եւ պարզաբանումներից զատ, ՀՀ պաշտպանութեան նախարարութիւնն այլ պարզաբանումներ եւ մեկնաբանութիւններ չունի»։
Յունւարի 28-ին Հայոց Բանակի մասին դիֆերամբներ կը ձօնեն պաշտօնեաները, թէ բարձրացնում են ԶՈՒ հեղինակութիւնը։ Իսկ իրականում մեր անվտանգութեան երաշխաւորի դէմ թշնամական յարձակումներն անդադար շարունակւում են։ Եթէ սահմանում թշնամին դիպուկահար ու այլ զէնքեր է կիրառում, ապա ներսում թշնամական այլ, աւելի ծանր զէնք է գործում՝ կեղծիք, զրպարտութիւն, անպատասխանատու յայտարարութիւն։ Այդ զէնքերը, ցաւօք արդէն Փաշինեանի ձեռքում են գործում»,- գրել է Գեղամ Մանուկեանը:
