ԱՄՆ պէտքարտուղար Էնթօնի Բլինքէնը հեռախօսազրոյց է ունեցել ՀՀ վարչապետ Նիկոլ Փաշինեանի հետ՝ քննարկելով Հայաստանի եւ Ադրբեջանի միջեւ խաղաղութեան հասնելու ջանքերը եւ Վաշինգտօնի աջակցութիւնը յայտնելով Հայաստանի ինքնիշխանութեանն ու տարածքային ամբողջականութեանը։ Այս մասին հաղորդում է «Արմենպրես»-ը՝ վկայակոչելով ԱՄՆ պէտքարտուղարութեան տարածած հաղորդագրութիւնը։
«Նրանք քննարկել են ԱՄՆ-ի աջակցութիւնը Հայաստանի եւ Ադրբեջանի միջեւ տեւական եւ արժանապատիւ խաղաղութեան համաձայնագրի հասնելու ջանքերին։ Պետքարտուղարը վերահաստատել է Միացեալ Նահանգների շարունակական աջակցութիւնը Հայաստանի ինքնիշխանութեանը եւ տարածքային ամբողջականութեանը եւ ընդգծել Հայաստանի հետ երկկողմ համագործակցութիւնը մեծացնելու ջանքերը, մինչ մենք աշխատում ենք՝ աջակցելու բարեկեցիկ եւ ժողովրդավարական ապագայի նրա տեսլականին», — նշուած է յայտարարութիւնում։
Էնթօնի Բլինքէնը հեռախօսազրոյց է ունեցել նաեւ Ադրբեջանի նախագահ Իլհամ Ալիեւի հետ եւ ողջունել «Ադրբեջանի եւ Հայաստանի միջեւ տեւական եւ արժանապատիւ խաղաղութեան համաձայնագիր կնքելու՝ նախագահ Ալիեւի յանձնառութիւնը»։
«Պետքարտուղարն ընդունել է, որ այս երկարատեւ հակամարտութիւնը տառապանքներ է պատճառել թէ՛ադրբեջանցիներին, թէ՛ հայերին, եւ ընդգծել է այն օգուտները, որ կարող է բերել խաղաղութիւնը տարածաշրջանում բոլորին», — նշուած է գերատեսչութեան յայտարարութիւնում։
Բլինքէնը նաեւ Ալիեւի հետ քննարկել է երկու երկրների յարաբերութիւնների միջեւ մտահոգութիւն առաջացնող թեմաները եւ «խօսել համագործակցութիւնն ամրապնդելու հնարաւորութիւնների մասին, յատկապէս խաղաղութեան գործընթացի շուրջ», ինչպէս նաեւ շեշտել բարձր մակարդակով ներգրաւուածութեան կարեւորութիւնը։
