Բագրատ Սրբազանը գործակալ չէ, միլիոնաւոր դոլարներ չի ստացել․ ԱԱԾ-ն պաշտօնապէս հերքել է
ԱԱԾ-ն պաշտօնապէս հերքել է Բագրատ Սրբազանի գործակալ լինելու մասին իշխանական շրջանակների կողմից շրջանառութեան մէջ դրուած տեղեկատուութիւնը. այս մասին յայտնում է Pastinfo.am լրատուականը։
Իշխանական «Սիւիկ» լրատուականի լրագրող Դաւիթ Լեւոնեանի յայտարարութիւնները, թէ Սրբազանը «ԿԿԲ» գործակալ է, միլիոնաւոր դոլարներ է ստացել Կրեմլից եւ այդ յայտարարութիւնների առնչութեամբ՝ Լեւոնեանի նկատմամբ սուտ մատնութեան համար վարոյթ նախաձեռնելու հաղորդումը շուրջ մէկ ամիս ստուգման առարկայ է դարձուել ԱԱԾ-ում, սակայն Բագրատ Սրբազանի դէմ ոչինչ չէն յայտնաբերել։ ՀՀ գլխաւոր դատախազութիւնից «Փաստինֆոյ»-ին յայտնեցին, որ ստուգման ընթացքում նման տուեալներ չէն ստացուել: Ինչ վերաբերում է Դաւիթ Լեւոնեանի կողմից ենթադրաբար սուտ մատնութիւն կատարելուն, ապա այդ դրուագով եւս քրէական վարոյթ չի նախաձեռնուել։
«Սուտ մատնութիւն է համարւում` իրաւասու մարմնին յանցագործութեան դէպքի կամ անձի կողմից յանցանք կատարելու մասին սուտ տեղեկութիւն տալը։ Տվեալ պարագայում ՀՀ գլխաւոր դատախազութիւն կամ որեւէ այլ իրաւասու մարմին յանցագործութեան մասին հաղորդում չի ներկայացուել»,- յայտնեցին դատախազութիւնից։
Յիշեցնենք, որ ապրիլի 29-ին «Տաւուշը հանուն հայրենիքի» շարժումը յանցագործութեան մասին հաղորդում է ներկայացրել՝ պահանջելով 24 ժամուայ ընթացքում կայ՛մ քրէական վարոյթ նախաձեռնել եւ պատասխանատուութեան կանչել Բագրատ Սրբազանին, կայ՛մ սուտ մատնութեան համար պատասխանատուութեան կանչել իշխանական «Սիւիկ նիւզ» լրատուականի լրագրողին։ Վերջինս փաստազուրկ մեղադրանքներ ու զրպարտանքներ է հնչեցրել սրբազանի հասցէին՝ մեղադրելով նրան իբրեւ թէ «ռուսական ԿԳԲ-ի գործակալ լինելու, «Կրեմլից» միլիոնաւոր դոլարներ ստանալու, հայ-ադրբեջանական պատերազմ հրահրելու» մէջ։
««Լրագրողական արհեստաւարժ, առարկայական եւ անաչառ բովանդակութիւնից, մասնագիտական էթիկայից եւ բարեւարքութիւնից զուրկ, աւելի շուտ՝ բլոգերային մենախօսութեան տպաւորութիւն գործող նշեալ տեսանիւթում հնչում են պնդումներ, թէ իբր նա ունի «ապացոյցներ», ըստ որոնց՝ Հայ եկեղեցու Սրբազանը «միլիոնաւոր դոլարներ է ստացել»։
Սա ոչ այլ ինչ է, եթէ ոչ՝ առանձնապէս ծանր յանցագործութեան մասին հաղորդում։ Իսկ համաձայն ՀՀ Քրեական դատաւարութեան օրէնսգրքի 173-րդ յօդուածի 4-րդ մասի՝ ԶԼՄ-ով կատարուած հրապարակումը քրէական գործ յարուցելու առիթ է։
Այսպիսով, իրաւապահ մարմիններից պահանջում ենք՝ նշուած անձի հաղորդման հիման վրայ, 24 ժամուայ ընթացքում կամ քրէական պատասխանատուութեան կանչել Բագրատ Սրբազանին, կամ՝ սուտ մատնութեան համար ՀՀ Քրեական օրէնսգրքի 476-րդ յօդուածով քրէական պատասխանատուութեան կանչել «լրագրող» ներկայացող նշուած անձին եւ նրա տեսանիւթը հրապարակած՝ «Յութուբ» մուլտիմեդիայ էլեկտրոնային հարթակի «Civic News» ալիքին»,- նշել էր շարժումը։
Նշուած հաղորդման առնչութեամբ ստուգումներ են իրականացուել ԱԱԾ-ում, որի արդիւնքում, փաստօրէն, հաստատուել է, որ իշխանամերձ շրջանակները զրպարտել են Բագրատ Սրբազանին։ Նշէնք, որ Բագրատ Սրբազանի անունից արդէն իսկ հայցադիմում է ներկայացուել Երեւանի քաղաքացիական դատարան՝ ընդդէմ Դաւիթ Լեւոնեանի եւ «ՔՊ»-ի՝ (civic.am)-ի՝ զրպարտութիւն համարուող տուեալների հերքման պահանջով։
Ամբողջական հոդվածը կարող եք կարդալ այս հղումով. https://abcmedia.am/glxavor-noruthyunner/67108/
ABC MEDIA © 2024. Բոլոր իրավունքները պաշտպանված են
