Բագրատ Սրբազանն տեսաուղերձով ժողովրդին է դիմել Անկախութեան հռչակագրի ընդունման 34-րդ տարելիցի առթիւ, որում ասում է.
«Անկախութեան հռչակագրով ամրագրուեցին մեր վերաանկախացած պետութեան ուղղութունը, իղձերն ու երազանքները, որով հիմք դրուեց մեր պետականութեան եւ թէ ինչ արժէքներ է դաւանում նորաստեղծ պետութիւնը՝ փաստացիօրէն դառնալով մեր նոր պետութեան ծննդեան վկայականը։
Այն ծնուեց չափազանց ծանր պայմաններում, սակայան հակառակ բոլոր դժուարութիւնների՝ այն սահմանեց մեր գոյութեան իրաւունքը եւ միեւնոյն ժամանակ խտացրեց մեր ազատութեան եւ անկախութեան տեսիլքը եւ պատմական արդարութիւնը վերականգնելու ձգտումը։
Մեզ համար մեր պետութիւնը մեր միակ ու բարձրագոյն վայրն է, միջավայրն ու կառոյցը, որը մենք ստեղծել ենք մեր ձեռքերով ու ջանքերով, մեր հազարաւոր քոյրերի եւ եղբայրների կեանքի գնով եւ վճարումով՝ ցանկանալով հաւատարիմ մնալ մեր այն տեսիլքին, որն ունեցել են մեր նախնիները, եւ որով ուրուագծել են մեր գալիքը։
Դժբախտաբար, այսօր մեր իսկ պետութեան մէջ կանգնած ենք առաւել ծանր մարտահրաւէրների առջեւ, երբ գողացուած են մեր պատիւը,, մեր կենսագրութիւնը, մեր իղձերն ու երազանքները։ Երբ յանձնուած է մեր հայրենիքը՝ Արցախ աշխարհը, երբ անվտանգ չէն մեր պետութեան սահմանները, երբ բոլոր առումներով խախտուած են քաղաքացիների ապրելու իրաւունքները, երբ հարցականի տակ է դրաւած Ցեղասպանութեան ճանաչումը, երբ ամբողջութեամբ խախտուած են թէ՛ Հռչակագրի, թէ՛ նրանից բխած մեր Սահմանադրութեան դրոյքները։ Երբ չարիքի կողմից զաւթուած է մեր պետականութիւնը եւ վերջապէս՝ թշնամու պահանջով ու թելադրանքով փորձ է արւում փոփոխութեան ենթարկել մեր Սահմանադրութիւնը, որը յայտարարուած մասով վերաբերում է Սահմանադրութեան նախաբանին ու դրանում եղած յղմանը՝ Անկախութեան հռչակագրին։
Փաստօրէն այսօր վերստին կանգնած ենք մեր համբուրելի պետութիւնը վերաանկախացնելու եւ վերաազատագրելու իրականութեան առջեւ։
Աեօ, մենք պէտք է հասկանանք, որ սեփական պետականութիւն ունենք եւ որ կոչուած ենք այն դարձնելու մեր աւետեաց երկիրը, մեր իղձերի եւ երազանքների իրացման եւ իրականացման սրբազան երկիրը։
Հայացքներս ուղղած մեր իսկ ժողովրդի հարազատ ներուժին եւ կարողականութեանը, հոգեւոր եւ բարոյական հիմքերին, առանց դրսի որեւէ ուժի թելադրանքի, կամ պարտադրանքի, եւ կամ նրանցից ողորմութիւն մուրալու հոգեբանութեան, այլ արտաքին յարաբերութիւններում վերադառնալու կանխատեսելի եւ վստահելի գործընկերոջ կարգավիճակին։
Անկախութեան հռչակագրին համահունչ մենք կոչուած ենք սեփական հայկական օրակարգով կրելու բոլոր պարտաւորութիւններն ու պատասխանատուութիւնները, որը ենթադրում եւ թելադրում է ազատ եւ անկախ պետականութիւն ունենալու մեծ գաղափարը։
Մաղթում եմ, որ մեր պետութիւնը, թէ՛ ներսից եւ թէ՛ արտաքին մարտահրաւէրների առջեւ, մնա խաղաղ եւ հաստատուն, հաւատարիմ իր ճանապարհին ու իր Աստծուն, եւ մենք կարողանանք ունկդիր լինել աստուածային խօսքին, թէ. «Դուք ընտիր ցեղ եք, թագաւորութիւն, քահանայութիւն, սուրբ ազգ, Աստծու ժողովուրդ, եւ ապրեք որպէս ազատներ»։
Շնորհաւոր մեր Անկախութեան հռչակագրի օրը։ Թող Աստուած զօրացնի Հայաստանի Հանրապետութիւնը՝ մեր ժողովրդին նոր յաղթանակների եւ նոր կեանքի տեսիլքով, Հոգեւոր Հայաստանի հաստատումով եւ հիմնադրումով, մեր կեանքի նոր ճանապարհի մէջ»;
Ուղերձն ամբողջութեամբ՝ տեսանիւթում։
