ԱՄՆ պէտքարտուղարութիւնը վերահաստատել է իր վճռական աջակցութիւնը Հայաստանի ինքնիշխանութեանն ու տարածքային ամբողջականութեանը՝ պատասխանելով «Ամերիկայի ձայնի» հայկական ծառայութեան հարցմանը՝ կապուած Լեմկինի ինստիտուտի՝ Հայաստանի ու Ադրբեջանի մասին օրերս հնչեցրած մտահոգութեան հետ:
Յիշեցնենք, որ Լեմկինի Ցեղասպանութեան կանխարգելման ինստիտուտը հոկտեմբերի 31-ին յայտարարել էր կարմիր դրօշի ահազանգ եւ խորը մտահոգութիւն յայտնել առաջիկայ օրերին եւ շաբաթներին Ադրբեջանի կողմից Հայաստան ներխուժելու հաւանականութեան մասին:
Պատասխանելով «Ամերիկայի ձայնի» հարցմանը՝ ԱՄՆ պէտքարտուղարութիւնը շեշտել է՝ Հայաստանի «ինքնիշխանութեան եւ տարածքային ամբողջականութեան ցանկացած խախտում կը բերի լուրջ հետեւանքների»: Պետքարտուղարութեան մեկնաբանութեան մէջ ասուած է.
«Միացեալ Նահանգները վճռականօրէն աջակցում է Հայաստանի ինքնիշխանութեանը եւ տարածքային ամբողջականութեանը: Մենք ընդգծել ենք, որ այդ ինքնիշխանութեան եւ տարածքային ամբողջականութեան ցանկացած խախտում կը բերի լուրջ հետեւանքների։ Մենք պարբերաբար շեշտում ենք մեր ակնկալիքները, ինչպիսին է ուժի կիրառման դէմ յորդորը, եւ շարունակաբար հետեւում իրավիճակին։ Հայաստանը Միացեալ Նահանգների մտէրիմ գործընկերն է ու բարեկամը, եւ մենք ակնկալում ենք աշխատել Հայաստանի իշխանութիւնների հետ՝ ամրապնդելու համար Հայաստանի քաղաքական եւ տնտեսական անվտանգութիւնը»,- նշել է Միացեալ Նահանգների պէտքարտուղարութիւնը:
