Հայոց ցեղասպանութիւնը ժխտելու, կասկածի տակ դնելու, պահանջատիրութիւնից հրաժարուելու Օվերտօնի պատուհանը պաշտօնապէս բացուած է։ Բացումն անձամբ իրականացրեց Նիկոլ Փաշինեանը, ով շաբաթ օրը «ՀՀ սոցիալ-հոգեբանութիւնը» թեմայով դասախօսութիւն է կարդացել ՔՊ Ժողովրդաւարութեան դպրոցում։
ՔՊ-ական շրջանակներում այլեւս կասկած չունեն, որ Թուրքիան ցեղասպանութիւնից հրաժարուելու նախապայման է առաջ քաշել` խաղաղութեան պայմանագիր ստորագրելու համար։ 1 ժամ տեւած դասախօսութեան գլխաւոր ասելիքն այն էր, թէ Հայոց ցեղասպանութեան պահանջատիրութեան թեման սրել է Ռուսաստանը, աւելի ճիշտ՝ ԽՍՀՄ-ը՝ 1946-ից սկսած, երբ Ռուսաստանի եւ Թուրքիայի յարաբերութիւնները սրուեցին, եւ ստեղծուեց ՆԱՏՕ-ն։ Փաշինեանի խօսքով՝ ՌԴ-ն եղեռնից մազապուրծ գաղթականների վերադարձ կազմակերպեց, որն աւելի սրեց պահանջատիրութեան հարցը։
Ողջ դասախօսութեան ընթացքում Փաշինեանը չի օգտագործում «ցեղասպանութիւն» բառը, կայ՛մ «Մեծ եղեռն», կայ՛մ «դժբախտութիւն», ինչում հայերը մեղադրում էին ԱՄՆ նախագահներին, որոնք ապրիլի 24-ի ուղերձներում խուսափում էին «ցեղասպանութիւն» ասելուց: Դասախօսութիւնից 1 օր անց արդէն ՔՊ-ական Անդրանիկ Քոչարեանը շարունակեց Փաշինեանին՝ բացայայտ կասկածի տակ դնելով ցեղասպանութեան փաստը եւ կոչ անելով ճշտել ու արձանագրել Օսմանեան կայսրութիւնում Հայոց ցեղասպանութեան բոլոր զոհերի անունները։
«Ի վերջոյ, պէտք է ունենալ բոլոր զոհերի ցուցակը: Յանկարծ աւելի կամ պակաս է լինում` 1,5 միլիոնից, ինչպէս ընդունուած է համարել»,- խորհրդարանական ճեպազրոյցների ժամանակ իր ասածը պարզաբանել է Քոչարեանը։ Նիկոլ Փաշինեանը թերեւս հող է նախապատրաստում՝ մի քանի օր անց ցեղասպանութեան տարելիցի օրն աշխարհացունց ուղերձ հրապարակելու համար, որով, հաւանաբար, կուրանայ հայոց պատմութեան այս մի էջը նոյնպէս՝ փորձելով բաւարարել թշնամու հերթական պահանջը։
